ప్రతిపక్షం, ఆగస్టు 30, హైదరాబాద్: హైదరాబాద్లో ప్రపంచంలోనే అతిపెద్ద క్రికెట్ స్టేడియం నిర్మించేందుకు ప్రణాళికలు సిద్ధమవుతున్నట్లు సమాచారం. నగర శివార్లలో అభివృద్ధి చేస్తున్న ఫ్యూచర్ సిటీలో ఈ భారీ స్టేడియాన్ని నిర్మించనున్నట్లు తెలుస్తోంది. ప్రస్తుతం గుజరాత్లోని నరేంద్ర మోదీ స్టేడియం 1.32 లక్షల మంది ప్రేక్షకుల సామర్థ్యంతో ప్రపంచంలోనే అతిపెద్ద క్రికెట్ స్టేడియంగా కొనసాగుతోంది. అయితే దీనికంటే ఎక్కువ మంది ఒకేసారి మ్యాచ్ను వీక్షించేలా హైదరాబాద్లో కొత్త స్టేడియాన్ని నిర్మించాలనే ప్రతిపాదన ఉన్నట్లు సమాచారం.
ఈ భారీ ప్రాజెక్టుకు ఈ ఏడాది డిసెంబరులో ముఖ్యమంత్రి రేవంత్రెడ్డి శంకుస్థాపన చేసే అవకాశం ఉందని వార్తలు వస్తున్నాయి. స్టేడియం నిర్మాణం కోసం అవసరమైన భూమిని రాష్ట్ర ప్రభుత్వం కేటాయించనుందని, నిర్మాణంతో పాటు భవిష్యత్తులో నిర్వహణ బాధ్యతలను భారత క్రికెట్ నియంత్రణ మండలి చేపట్టనున్నట్లు తెలుస్తోంది.
ప్రపంచస్థాయి మౌలిక వసతులతో స్టేడియాన్ని నిర్మించేలా ప్రణాళికలు రూపొందిస్తున్నట్లు సమాచారం. భారీ ప్రేక్షక సామర్థ్యంతో పాటు అంతర్జాతీయ స్థాయి క్రికెట్ మ్యాచ్లకు అనుగుణంగా అన్ని సౌకర్యాలు కల్పించే అవకాశం ఉంది. ప్రాజెక్టు కార్యరూపం దాల్చితే హైదరాబాద్ ప్రపంచ క్రికెట్ పటంలో మరింత కీలక కేంద్రంగా మారడంతో పాటు, అంతర్జాతీయ మ్యాచ్ల నిర్వహణకు నగరానికి మరింత ప్రాధాన్యం లభించే అవకాశం ఉంది.
అయితే స్టేడియం నిర్మాణానికి సంబంధించిన తుది స్థలం, పూర్తి సామర్థ్యం, నిర్మాణ వ్యయం, అధికారిక శంకుస్థాపన తేదీ వంటి వివరాలపై ప్రభుత్వం లేదా భారత క్రికెట్ నియంత్రణ మండలి నుంచి అధికారిక ప్రకటన వెలువడాల్సి ఉంది.
