ప్రతిపక్షం, సెప్టెంబర్ 02: ఆరోగ్యకరమైన ఆహారం తీసుకోవడం ఎంత ముఖ్యమో.. దాన్ని సరైన సమయంలో తీసుకోవడం కూడా అంతే ముఖ్యమని నిపుణులు సూచిస్తున్నారు. ముఖ్యంగా కొన్ని ఆహార పదార్థాలను ఉదయం తీసుకోవడం వల్ల రోజంతా శరీరానికి అవసరమైన శక్తి, పోషకాలు అందుతాయని చెబుతున్నారు. అదే వాటిని రాత్రివేళ తీసుకుంటే కొందరిలో జీర్ణ సంబంధిత సమస్యలు తలెత్తే అవకాశం ఉందని పేర్కొంటున్నారు.
డ్రై ఫ్రూట్స్లో కార్బోహైడ్రేట్లు, సహజ చక్కెరలు, విటమిన్లు, ఖనిజాలు వంటి పోషకాలు ఉంటాయి. వీటిని ఉదయం తీసుకోవడం వల్ల శరీరానికి త్వరగా శక్తి లభించడంతో పాటు అవసరమైన పోషకాలు అందుతాయని నిపుణులు చెబుతున్నారు. అయితే రాత్రి సమయంలో ఎక్కువగా డ్రై ఫ్రూట్స్ తినడం వల్ల జీర్ణం కావడంలో ఇబ్బందులు ఎదురయ్యే అవకాశం ఉందని సూచిస్తున్నారు.
అలాగే పండ్లు కూడా ఆరోగ్యానికి ఎంతో మేలు చేస్తాయి. అయితే రాత్రివేళ పండ్లు తీసుకునే విషయంలో వ్యక్తుల ఆరోగ్య పరిస్థితిని పరిగణనలోకి తీసుకోవాలని నిపుణులు సూచిస్తున్నారు. ముఖ్యంగా సహజ చక్కెరలు ఎక్కువగా ఉండే పండ్లను రాత్రిపూట తీసుకోవడం వల్ల కొందరిలో రక్తంలో చక్కెర స్థాయిలు పెరిగే అవకాశం ఉందని చెబుతున్నారు.
పెరుగును కూడా చాలామంది రాత్రి భోజనం తర్వాత తీసుకుంటారు. అయితే కొందరికి రాత్రివేళ పెరుగు తీసుకోవడం వల్ల చలి, ముక్కుదిబ్బడ, జలుబు వంటి ఇబ్బందులు కలిగే అవకాశం ఉందని నిపుణులు సూచిస్తున్నారు. అందుకే వ్యక్తిగత ఆరోగ్య పరిస్థితిని బట్టి పెరుగు తీసుకునే సమయాన్ని నిర్ణయించుకోవడం మంచిదని చెబుతున్నారు.
ఉదయం పూట పోషక విలువలు కలిగిన ఆహారం తీసుకోవడం, రాత్రి సమయంలో తేలికపాటి ఆహారానికి ప్రాధాన్యం ఇవ్వడం ఆరోగ్యానికి ఉపయోగకరంగా ఉంటుందని నిపుణులు సూచిస్తున్నారు. అయితే ప్రతి ఒక్కరి శరీర తత్వం, జీవనశైలి, ఆరోగ్య పరిస్థితులు భిన్నంగా ఉంటాయి కాబట్టి ఒకే ఆహార నియమం అందరికీ వర్తించదని గుర్తుంచుకోవాలి.
