ప్రతిపక్షం, జూన్ 19: హైదరాబాద్లోని మణికొండలో జనసేన పార్టీ తెలంగాణ రాష్ట్ర కార్యాలయం నేడు ప్రారంభం కానుంది. ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్ చేతుల మీదుగా ఈ కార్యాలయం ప్రారంభించబడనుంది.
తెలంగాణలో పార్టీ సంస్థాగత నిర్మాణాన్ని మరింత బలోపేతం చేయడం, గ్రామస్థాయి నుంచి రాష్ట్ర స్థాయి వరకు పార్టీ కార్యకలాపాలను విస్తరించడం లక్ష్యంగా ఈ కార్యాలయాన్ని ఏర్పాటు చేసినట్లు పార్టీ నాయకులు తెలిపారు. రాష్ట్రవ్యాప్తంగా పార్టీ కార్యక్రమాల సమన్వయం, సభ్యత్వ నమోదు కార్యక్రమాలు, ప్రజా సమస్యలపై ఉద్యమాలు, సమావేశాలు నిర్వహించేందుకు ఈ కార్యాలయం ప్రధాన కేంద్రంగా పనిచేయనుంది.
కార్యాలయ ప్రారంభోత్సవానికి పార్టీ నాయకులు, కార్యకర్తలు, అభిమానులు పెద్ద సంఖ్యలో హాజరుకానున్నారు. తెలంగాణలో పార్టీ భవిష్యత్ కార్యాచరణ, రాజకీయ వ్యూహాలపై కూడా ఈ సందర్భంగా కీలక చర్చలు జరిగే అవకాశం ఉన్నట్లు తెలుస్తోంది.
రాష్ట్రంలో జనసేన బలోపేతానికి ఈ కార్యాలయం కీలక మైలురాయిగా నిలుస్తుందని పార్టీ వర్గాలు ఆశాభావం వ్యక్తం చేస్తున్నాయి.
