ప్రతిపక్షం, ఆగస్టు 23: చెన్నైలో చోటుచేసుకున్న దారుణ హత్య కేసు తీవ్ర కలకలం రేపుతోంది. తమిళనాడు సూపర్ఫాస్ట్ ఎక్స్ప్రెస్లో లభించిన సూట్కేస్లో మహిళ మృతదేహం భాగాలు బయటపడటంతో పోలీసులు దర్యాప్తు చేపట్టారు. ఆగస్టు 5న జరిగిన ఈ ఘటనకు సంబంధించిన ఆధారాలను సేకరించిన పోలీసులు, సుమారు 350 సీసీటీవీ కెమెరాల దృశ్యాలను పరిశీలించి నిందితుల కదలికలను గుర్తించినట్లు సమాచారం.
ఉత్తరప్రదేశ్లోని ఆగ్రా రైల్వే స్టేషన్కు చేరుకున్న రైలులోని ఓ బోగీలో ఎరుపు రంగు సూట్కేస్ నుంచి దుర్వాసన రావడంతో ప్రయాణికులు పోలీసులకు సమాచారం అందించారు. సూట్కేస్ను తెరిచి పరిశీలించగా మానవ శరీర భాగాలు కనిపించాయి. దర్యాప్తులో ఆ సూట్కేస్ను చెన్నై సెంట్రల్ స్టేషన్లో రైలులోకి ఎక్కించినట్లు పోలీసులు గుర్తించారు.
దీంతో చెన్నై సెంట్రల్ పరిసరాల్లోని సీసీటీవీ దృశ్యాలను పోలీసులు విస్తృతంగా పరిశీలించారు. ఓ మహిళ, ఓ పురుషుడు కలిసి ఎరుపు రంగు సూట్కేస్తో స్టేషన్లోకి వచ్చిన దృశ్యాలు కెమెరాల్లో నమోదైనట్లు గుర్తించారు. అనంతరం వారు చెన్నై పార్క్ స్టేషన్ నుంచి స్థానిక రైలులో గూడువాంచేరి వైపు వెళ్లినట్లు పోలీసులు గుర్తించారు.
గూడువాంచేరి పరిసరాల్లోని సీసీటీవీ దృశ్యాలను అనుసరిస్తూ పోలీసులు వారు ప్రయాణించిన ఆటోను గుర్తించినట్లు తెలుస్తోంది. ఆ ఆటో వెళ్లిన మార్గాన్ని పరిశీలిస్తూ మసీదు వీధిలోని ఓ అద్దె ఇంటికి చేరుకున్నారు. అక్కడ తనిఖీలు నిర్వహించగా రక్తపు మరకలు సహా హత్యకు సంబంధించిన కీలక ఆధారాలు లభించినట్లు సమాచారం.
మృతురాలిని ఒడిశాకు చెందిన హయత్ నిషాగా పోలీసులు గుర్తించినట్లు తెలుస్తోంది. ఆమె భర్తతో విడిపోయి తాంబరం ప్రాంతంలోని ఓ ఎగుమతి సంస్థలో పనిచేస్తున్నట్లు సమాచారం. ఆమె కుమారుడు ఏసీ మెకానిక్గా పనిచేస్తున్నట్లు తెలిసింది. నిషా.. మాణిక్ ఉత్తిన్, లస్కర్ అనే దంపతులతో కలిసి నివసిస్తున్నట్లు దర్యాప్తులో వెల్లడైనట్లు సమాచారం.
హత్య అనంతరం మృతదేహాన్ని ముక్కలుగా చేసి ఆధారాలు లేకుండా చేసేందుకు నిందితులు ప్రయత్నించినట్లు పోలీసులు అనుమానిస్తున్నారు. మిగిలిన శరీర భాగాలను వేరే విధంగా ధ్వంసం చేసేందుకు ప్రయత్నించినట్లు దర్యాప్తులో గుర్తించినట్లు సమాచారం. మృతురాలి తల కోసం పోలీసులు ఇంకా గాలింపు కొనసాగిస్తున్నట్లు తెలుస్తోంది.
అయితే ఈ హత్యకు అసలు కారణం ఏమిటన్నది ఇంకా పూర్తిగా వెల్లడికాలేదు. డబ్బు, నగలు లేదా ఇతర వ్యక్తిగత కారణాలే హత్యకు దారితీశాయా అనే కోణంలో పోలీసులు దర్యాప్తు చేస్తున్నారు. సీసీటీవీ ఆధారాలతో నిందితుల కదలికలను అనుసరించిన పోలీసులు కేసులో మరిన్ని వివరాలను వెలుగులోకి తీసుకొచ్చే పనిలో ఉన్నారు.
