ప్రతిపక్షం, జూన్ 13: ఆంధ్రప్రదేశ్ ఉప ముఖ్యమంత్రి, జనసేన అధ్యక్షుడు పవన్ కళ్యాణ్ తెలంగాణలో రాజకీయ కార్యకలాపాలు నిర్వహించేందుకు పూర్తి స్వేచ్ఛ ఉందని ముఖ్యమంత్రి రేవంత్ రెడ్డి స్పష్టం చేశారు. తెలంగాణలో ఏ రాజకీయ పార్టీ అయినా ప్రజాస్వామ్యబద్ధంగా కార్యకలాపాలు నిర్వహించవచ్చని, పవన్ కళ్యాణ్ కూడా ఎన్నికల్లో పోటీ చేయాలనుకుంటే స్వాగతమేనని పేర్కొన్నారు.
ఢిల్లీలో మీడియాతో నిర్వహించిన చిట్చాట్ సందర్భంగా సీఎం రేవంత్ రెడ్డి మాట్లాడుతూ, హైదరాబాద్లో పవన్ కళ్యాణ్ సభకు అనుమతి నిరాకరించడాన్ని రాజకీయ కోణంలో చూడవద్దని అన్నారు. శాంతిభద్రతల పరిస్థితులను దృష్టిలో ఉంచుకుని మాత్రమే నిర్ణయం తీసుకున్నామని, ప్రజల భద్రతకు విఘాతం కలిగే అవకాశాలు ఉన్నప్పుడు ప్రభుత్వం తగిన చర్యలు తీసుకోవాల్సి ఉంటుందని వివరించారు.
తెలంగాణలో పవన్ కళ్యాణ్కు ఎలాంటి ఆంక్షలు లేవని, ఆయన ఎప్పుడైనా రాష్ట్రానికి వచ్చి రాజకీయ కార్యక్రమాలు నిర్వహించవచ్చని చెప్పారు. రాష్ట్రంలో ఇప్పటికే పలు జాతీయ, ప్రాంతీయ పార్టీలు చురుకుగా పనిచేస్తున్నాయని, ప్రజాస్వామ్యంలో ప్రతి రాజకీయ నాయకుడికి సమాన హక్కులు ఉంటాయని పేర్కొన్నారు.
అయితే సభలు, సమావేశాల పేరుతో శాంతిభద్రతలకు భంగం కలిగించే పరిస్థితులను ప్రభుత్వం సహించబోదని సీఎం హెచ్చరించారు. ఈ అంశంపై ఇప్పటికే మంత్రి పొన్నం ప్రభాకర్ సమాధానం ఇచ్చారని గుర్తుచేశారు. అదే సమయంలో ఆంధ్రప్రదేశ్లో ప్రతిపక్ష నేత వైఎస్ జగన్ మోహన్ రెడ్డి సభలకు ఎందుకు అనుమతులు ఇవ్వడం లేదనే విషయంపై అక్కడి ప్రభుత్వం సమాధానం చెప్పాలని రేవంత్ రెడ్డి ప్రశ్నించారు.
రాజకీయ స్వేచ్ఛ, ప్రజాస్వామ్య హక్కులను తెలంగాణ ప్రభుత్వం గౌరవిస్తుందని, అయితే చట్టవ్యవస్థకు భంగం కలిగించే చర్యల విషయంలో రాజీ పడబోదని సీఎం రేవంత్ రెడ్డి స్పష్టం చేశారు. ఈ వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి.
