ప్రతిపక్షం, ఆగస్టు 26: నేపాల్లో ఆకస్మికంగా సంభవించిన వరదలు తీవ్ర బీభత్సం సృష్టిస్తున్నాయి. భారీ వర్షాలు, వరదల కారణంగా పెద్ద సంఖ్యలో ప్రయాణికులు గల్లంతైనట్లు అధికారులు గుర్తించారు. ఇప్పటివరకు మొత్తం 384 మంది ఆచూకీ లభించకపోగా.. వారిలో 105 మంది భారతీయులు ఉన్నట్లు సమాచారం. మరో 37 మంది భారత సంతతికి చెందిన విదేశీ పౌరులు గల్లంతైనట్లు అధికారులు గుర్తించారు. అలాగే 93 మంది నేపాలీ పౌరులు కూడా వరదల ప్రభావంతో కనిపించకుండా పోయినట్లు తెలుస్తోంది.
వరదల ఉద్ధృతి కారణంగా పలు ప్రాంతాల్లో రహదారులు, వంతెనలు దెబ్బతినడంతో సహాయక చర్యలకు తీవ్ర ఆటంకం ఏర్పడుతోంది. వరదల్లో చిక్కుకున్నవారి ఆచూకీ కోసం ట్రావెల్ ఏజెన్సీలు, స్థానిక పోలీసులు, భద్రతా బలగాలు సమన్వయంతో గాలింపు చర్యలు చేపడుతున్నాయి. గల్లంతైన ప్రయాణికుల వివరాలను సేకరించడంతోపాటు వారి కుటుంబ సభ్యులతో అధికారులు సంప్రదింపులు జరుపుతున్నారు.
ప్రయాణికులు ఏ మార్గంలో ప్రయాణించారు, చివరిసారిగా ఎక్కడ కనిపించారు అనే వివరాలను సేకరిస్తూ గాలింపు చర్యలను ముమ్మరం చేస్తున్నారు. వరద ప్రభావిత ప్రాంతాల్లో సహాయక బృందాలను రంగంలోకి దించి, ప్రమాదంలో చిక్కుకున్నవారిని సురక్షిత ప్రాంతాలకు తరలించే ప్రయత్నాలు కొనసాగుతున్నాయి. గల్లంతైన వారి సంఖ్య మరింత పెరిగే అవకాశం ఉందా అనే అంశంపై కూడా అధికారులు వివరాలు సేకరిస్తున్నారు.
భారీ వర్షాలు కొనసాగితే పరిస్థితి మరింత తీవ్రంగా మారే అవకాశం ఉండటంతో స్థానిక ప్రజలు, పర్యాటకులు అప్రమత్తంగా ఉండాలని అధికారులు సూచిస్తున్నారు. గల్లంతైన వారిలో భారతీయులు అధిక సంఖ్యలో ఉండటంతో వారి ఆచూకీ కోసం సంబంధిత అధికారులు ప్రత్యేకంగా చర్యలు చేపడుతున్నారు.
