అధికారికంగా వెల్లడించనున్న హైకమాండ్
హైదరాబాద్, ప్రతిపక్షం స్టేట్ బ్యూరో: కాంగ్రెస్ అధిష్టాన వర్గం వద్ద సీఎం రేవంత్ రెడ్డి మాటే చెల్లుబాటు అవుతోంది. తనకు నమ్మిన బంటుగా ఉంటూ ప్రదేశ్ కాంగ్రెస్ వ్యవహారాలను చక్కబెడుతున్న మహేశ్ కుమార్ గౌడ్ కు పీసీసీ అధ్యక్షుడిగా ఎంపిక దాదాపు ఖరారు చేసినట్లు విశ్వసనీయ సమాచారం. అధిష్టాన వర్గం అధికారికంగా పేరు వెల్లడించడమే ఆలస్యం. పీసీసీ పగ్గాలు చేపట్టే విషయంలో రేవంత్ రెడ్డి వారసుడు ఎవరు అన్న ఉత్కంఠకు తెర పడింది. తెలంగాణ పీసీసీ నూతన అధ్యక్షుడిగా ప్రస్తుత వర్కింగ్ ప్రసిడెండ్, ఎమ్మెల్సీ మహేశ్ కుమార్ గౌడ్ ను కాంగ్రెస్ హైకమాండ్ ఖరారు చేసినట్లు సమాచారం. ఒకట్రెండు రోజుల్లో ఆయన పేరును కాంగ్రెస్ అధిష్టానం అధికారికంగా వెళ్లడించనుంది. పీసీసీ అధ్యక్షుడి రేసులో కాంగ్రెస్ మంత్రులు సహా ముఖ్యనేతలు కొందరు పోటీ పడ్డారు. తెలంగాణ డిప్యూటీ సీఎం భట్టి విక్రమార్కతో పాటు కోమటిరెడ్డి బ్రదర్స్, జగ్గారెడ్డి, మధుయాష్కీ గౌడ్, బలరాం నాయక్, సీతక్క పేర్లు పరిశీలనలో ఉన్నట్లు ప్రచారం సాగింది. అయితే చివరికి రేసులో మహేశ్ కుమార్ గౌడ్, బలరాం నాయక్ లు పోటీ పడ్డారు.
