ప్రతిపక్షం, జూన్ 20: రాష్ట్రంలోని విద్యార్థుల్లో దాగి ఉన్న ప్రతిభను వెలికితీసి వారిని సమాజానికి ఉపయోగపడే గొప్ప పౌరులుగా తీర్చిదిద్దడమే ప్రభుత్వ ప్రధాన లక్ష్యమని ముఖ్యమంత్రి రేవంత్ రెడ్డి స్పష్టం చేశారు. తెలంగాణను దేశంలోనే విద్యా, క్రీడా రంగాలకు ఆదర్శ రాష్ట్రంగా తీర్చిదిద్దేందుకు ప్రభుత్వం కట్టుబడి పనిచేస్తోందని తెలిపారు. విద్యార్థులకు నాణ్యమైన విద్యతో పాటు అవసరమైన అన్ని సౌకర్యాలు కల్పించి వారి భవిష్యత్తుకు బలమైన పునాదులు వేయాలని ప్రభుత్వం సంకల్పించిందన్నారు.
విద్యా సంవత్సరం ప్రారంభం సందర్భంగా హైదరాబాద్లోని ఎల్బీ క్రీడా మైదానంలో నిర్వహించిన కార్యక్రమంలో రాష్ట్ర గవర్నర్తో కలిసి ముఖ్యమంత్రి విద్యార్థులకు విద్యా కిట్ల పంపిణీ కార్యక్రమాన్ని ప్రారంభించారు. అలాగే విద్యా రంగానికి సంబంధించిన పలు అభివృద్ధి కార్యక్రమాలకు శ్రీకారం చుట్టారు. ఈ సందర్భంగా వేలాది మంది విద్యార్థులు, ఉపాధ్యాయులు, ప్రజాప్రతినిధులు, అధికారులు పాల్గొన్నారు.
రాష్ట్రంలోని నివాస పాఠశాలల్లో చదువుతున్న లక్షలాది మంది విద్యార్థులకు అవసరమైన విద్యా సామగ్రితో కూడిన ప్రత్యేక కిట్లను అందిస్తున్నామని ముఖ్యమంత్రి తెలిపారు. విద్యార్థులు ఆత్మగౌరవంతో, ఆత్మవిశ్వాసంతో చదువుకునే వాతావరణం కల్పించడం ప్రభుత్వ బాధ్యతగా భావిస్తున్నామని చెప్పారు. ఇప్పటికే పాఠశాలల్లో అల్పాహారం, మధ్యాహ్న భోజనం, సాయంత్రం అల్పాహారం అందిస్తున్నామని, భవిష్యత్తులో విద్యార్థులకు రవాణా సౌకర్యాన్ని కూడా కల్పించే అంశాన్ని పరిశీలిస్తున్నామని వెల్లడించారు.
రాష్ట్రవ్యాప్తంగా సుమారు 27 లక్షల 50 వేల మంది విద్యార్థులకు విద్యా కిట్లు అందజేస్తున్నామని పేర్కొంటూ, ప్రతి విద్యార్థి నాణ్యమైన విద్యను అందుకోవాలన్నదే ప్రభుత్వ సంకల్పమని చెప్పారు. విద్య కోసం ప్రభుత్వం చేస్తున్న ఖర్చును వ్యయంగా కాకుండా భవిష్యత్తుపై పెట్టుబడిగా భావిస్తోందన్నారు. ఈ నేపథ్యంలో విద్యా రంగానికి ఈ ఏడాది బడ్జెట్లో రూ.26,600 కోట్ల భారీ నిధులు కేటాయించినట్లు గుర్తుచేశారు.
గ్రామీణ ప్రాంతాల్లోని పేద, మధ్యతరగతి కుటుంబాల పిల్లలకు కూడా అత్యుత్తమ విద్య అందాలన్న లక్ష్యంతో ప్రభుత్వ పాఠశాలల్లోనే నర్సరీ, ఎల్కేజీ, యూకేజీ తరగతులను ప్రారంభించామని తెలిపారు. పేద తల్లిదండ్రుల కలలను నిజం చేయడం కోసం విద్యా వ్యవస్థలో సమగ్ర మార్పులు తీసుకొస్తున్నామని చెప్పారు. నర్సరీ నుంచి ఇంటర్ వరకు స్పష్టమైన విద్యా విధానాన్ని అమలు చేస్తున్నామని వెల్లడించారు.
ప్రభుత్వ పాఠశాలలను బలోపేతం చేయడంలో ఉపాధ్యాయుల పాత్ర కీలకమని కొనియాడిన ముఖ్యమంత్రి, గతంలో విద్యార్థులు లేక వెలవెలబోయిన పాఠశాలలు ఇప్పుడు ప్రవేశాల కోసం ఎదురుచూసే స్థాయికి చేరుకోవడం ఆనందకర పరిణామమన్నారు. ప్రతి నియోజకవర్గంలో ఒక నమూనా ప్రభుత్వ పాఠశాలను ఏర్పాటు చేసి విద్యా ప్రమాణాలను మరింత మెరుగుపరుస్తామని తెలిపారు.
విద్యార్థులు కేవలం చదువుల్లోనే కాకుండా క్రీడలు, సాంస్కృతిక కార్యక్రమాలు, నాయకత్వ లక్షణాల్లోనూ రాణించాలని ముఖ్యమంత్రి ఆకాంక్షించారు. తెలంగాణను విద్యా, క్రీడా రంగాల్లో దేశానికి ఆదర్శంగా నిలబెట్టడమే తమ లక్ష్యమని చెప్పారు. రాష్ట్రంలోని విద్యార్థులు దేశ భవిష్యత్తును తీర్చిదిద్దే నాయకులుగా ఎదగాలని పిలుపునిచ్చారు.
ఈ సందర్భంగా మాదకద్రవ్యాల నిర్మూలనపై కూడా ప్రత్యేక అవగాహన కార్యక్రమం నిర్వహించారు. విద్యార్థులందరితో డ్రగ్స్కు దూరంగా ఉంటామని, సమాజాన్ని మాదకద్రవ్యాల బారిన పడకుండా కాపాడేందుకు కృషి చేస్తామని ప్రతిజ్ఞ చేయించారు. యువత ఆరోగ్యకరమైన జీవనశైలిని అలవర్చుకొని రాష్ట్ర అభివృద్ధిలో భాగస్వాములు కావాలని సూచించారు.
అలాగే చదువులో విశేష ప్రతిభ కనబరిచిన విద్యార్థులకు నగదు ప్రోత్సాహకాలు, ప్రశంసా పత్రాలు అందజేసి అభినందించారు. విద్యార్థుల విద్యా, వ్యక్తిత్వ వికాసానికి తోడ్పడే “అన్న–అక్క మార్గదర్శకత్వ కార్యక్రమం”ను కూడా ఆవిష్కరించారు. ఈ కార్యక్రమం ద్వారా అనుభవజ్ఞులైన వ్యక్తులు విద్యార్థులకు మార్గనిర్దేశం చేసి వారి లక్ష్య సాధనకు తోడ్పడనున్నారని తెలిపారు.
విద్యార్థుల భవిష్యత్తు కోసం ప్రభుత్వం ఎలాంటి సహాయానికైనా సిద్ధంగా ఉందని, బాగా చదివి ఉన్నత శిఖరాలను అధిరోహించాలని ముఖ్యమంత్రి విద్యార్థులకు పిలుపునిచ్చారు. “మీరు చదవండి.. మీ భవిష్యత్తు కోసం అవసరమైన ప్రతి సదుపాయం కల్పించే బాధ్యత మాది” అంటూ ఆయన భరోసా ఇచ్చారు.
