ప్రతిపక్షం, జూలై 02: గురుకులాల టెండర్ల అంశంపై అధికార కాంగ్రెస్, ప్రతిపక్ష బీఆర్ఎస్ మధ్య రాజకీయ విమర్శలు మరింత ముదిరాయి. బీఆర్ఎస్ వర్కింగ్ ప్రెసిడెంట్ కేటీఆర్ కాంగ్రెస్ మంత్రులపై తీవ్రస్థాయిలో విమర్శలు గుప్పిస్తూ, చర్చకు రావాలని సవాల్ విసిరి ఇప్పుడు వెనక్కి తగ్గుతున్నారని ఆరోపించారు.
గన్పార్క్ వద్ద చర్చకు తాను వస్తున్నానని ప్రకటించిన కేటీఆర్, పోలీసులను ప్రయోగించి ప్రతిపక్ష నేతలను అడ్డుకోవడం వెనుక ఎవరి ఆదేశాలు ఉన్నాయో చెప్పాలని ప్రభుత్వాన్ని ప్రశ్నించారు. గురుకులాల టెండర్ల వ్యవహారంలో ప్రభుత్వం పారదర్శకంగా వ్యవహరించడం లేదని విమర్శించారు.
అదే సమయంలో మంత్రి జూపల్లి కృష్ణారావు గన్పార్క్ వద్దే ఉండాలని, తాను కూడా అక్కడికి వస్తానని కేటీఆర్ తెలిపారు. ప్రభుత్వ నిర్ణయాలపై సంబంధిత మంత్రులకే అవగాహన లేదని ఆరోపిస్తూ, పాలన తీరుపై తీవ్ర అసంతృప్తి వ్యక్తం చేశారు. ఈ వ్యాఖ్యలతో గురుకులాల టెండర్ల వివాదం రాజకీయంగా మరింత వేడెక్కింది.
