ప్రతిపక్షం, జూలై 06: తెలంగాణలో మాదకద్రవ్యాల అక్రమ రవాణాను పూర్తిగా అరికట్టేందుకు రాష్ట్ర పోలీస్ శాఖ సమగ్ర కార్యాచరణను అమలు చేయనున్నట్లు తెలంగాణ డీజీపీ సీవీ ఆనంద్ ప్రకటించారు. భద్రాద్రి కొత్తగూడెం జిల్లా మణుగూరులో నూతన పోలీస్ స్టేషన్ను ప్రారంభించిన అనంతరం ఆయన పోలీసు అధికారులను ఉద్దేశించి మాట్లాడారు. రాష్ట్రంలో గంజాయి సాగు, రవాణా, విక్రయాలపై ఎలాంటి రాజీ లేకుండా కఠిన చర్యలు తీసుకుంటామని స్పష్టం చేశారు.
ప్రతి పోలీసు అధికారి డ్రగ్స్పై పోరాటాన్ని తన బాధ్యతగా భావించాలని డీజీపీ పిలుపునిచ్చారు. గంజాయి సాగు చేసి యువత భవిష్యత్తును నాశనం చేసే వారిని తీవ్రవాదుల కంటే ప్రమాదకరంగా పరిగణిస్తామని హెచ్చరించారు. అలాంటి నేరస్థులపై ప్రత్యేక నిఘా ఏర్పాటు చేసి, వారి నెట్వర్క్ను పూర్తిగా ఛేదించేందుకు పోలీసు శాఖ వ్యూహాత్మకంగా ముందుకు సాగుతోందన్నారు.
రాష్ట్రంలో శాంతి భద్రతల పరిరక్షణకు అత్యంత ప్రాధాన్యం ఇస్తున్నామని సీవీ ఆనంద్ తెలిపారు. ప్రజలకు ఎలాంటి అసౌకర్యం కలగకుండా సమర్థవంతమైన పోలీసింగ్ అందించాలని అధికారులకు సూచించారు. ఆధునిక సాంకేతిక పరిజ్ఞానాన్ని వినియోగించి ప్రజలకు మరింత వేగవంతమైన, పారదర్శకమైన సేవలు అందించాలని కోరారు. ముఖ్యంగా కృత్రిమ మేధస్సు (ఏఐ) ఆధారిత సాంకేతికతను పోలీసింగ్లో విస్తృతంగా వినియోగించి నేరాల నియంత్రణ, దర్యాప్తు సామర్థ్యాన్ని పెంచాలని సూచించారు.
యువత మాదకద్రవ్యాలకు బానిస కాకుండా నిరోధక చర్యలను మరింత బలోపేతం చేయాలని డీజీపీ ఆదేశించారు. విద్యాసంస్థలు, తల్లిదండ్రులు, స్థానిక ప్రజాప్రతినిధులు, స్వచ్ఛంద సంస్థలతో సమన్వయం చేసుకుంటూ డ్రగ్స్ దుష్పరిణామాలపై విస్తృత అవగాహన కార్యక్రమాలు నిర్వహించాలని చెప్పారు. డ్రగ్స్ సరఫరా చేసే ముఠాలపై కఠిన నిఘా కొనసాగించాలని, రాష్ట్ర సరిహద్దుల వద్ద తనిఖీలను మరింత పటిష్ఠం చేయాలని సూచించారు.
మావోయిస్టు కార్యకలాపాలను రాష్ట్రంలో సమర్థవంతంగా అదుపులోకి తీసుకువచ్చినట్లు గుర్తుచేసిన డీజీపీ, ప్రస్తుతం పోలీస్ శాఖ దృష్టి కొత్త తరహా నేరాలపై కేంద్రీకృతమైందన్నారు. ముఖ్యంగా మాదకద్రవ్యాల అక్రమ రవాణా, సైబర్ నేరాలు, పెరుగుతున్న రోడ్డు ప్రమాదాల నివారణపై ప్రత్యేక కార్యాచరణ రూపొందిస్తున్నామని తెలిపారు. ఈ మూడు రంగాల్లో ఆధునిక సాంకేతికత, సమన్వయంతో కూడిన పోలీసింగ్ను అమలు చేయాలని అధికారులను ఆదేశించారు.
ప్రజలకు నమ్మకమైన, స్నేహపూర్వక పోలీసింగ్ అందించడమే రాష్ట్ర ప్రభుత్వ లక్ష్యమని డీజీపీ పేర్కొన్నారు. ప్రతి పోలీస్ స్టేషన్ ప్రజలకు అందుబాటులో ఉండే సేవా కేంద్రంగా మారాలని, ఫిర్యాదుల పరిష్కారంలో వేగం, పారదర్శకత ఉండాలని సూచించారు. చట్టవ్యతిరేక కార్యకలాపాలపై రాజీలేని వైఖరితో ముందుకు సాగుతూ, తెలంగాణను డ్రగ్స్ రహిత రాష్ట్రంగా తీర్చిదిద్దేందుకు పోలీసు శాఖ కట్టుబడి పనిచేస్తుందని సీవీ ఆనంద్ స్పష్టం చేశారు.
