ప్రతిపక్షం, జూలై 07: ఫిఫా ప్రపంచకప్ సందర్భంగా అర్జెంటీనా–ఈజిప్ట్ జట్ల మధ్య జరగనున్న హైఓల్టేజ్ ఫుట్బాల్ మ్యాచ్ను తెలంగాణ ముఖ్యమంత్రి రేవంత్ రెడ్డి విద్యార్థులతో కలిసి వీక్షించనున్నారు. ఈ సందర్భంగా హైదరాబాద్లోని శిల్పకళావేదికలో భారీ ఎల్ఈడీ స్క్రీన్ను ఏర్పాటు చేసి మ్యాచ్ ప్రత్యక్ష ప్రసారాన్ని నిర్వహించేందుకు ఏర్పాట్లు చేస్తున్నారు.
క్రీడల పట్ల యువతలో ఆసక్తిని పెంపొందించడం, అంతర్జాతీయ స్థాయి క్రీడలను మరింత చేరువ చేయాలనే ఉద్దేశంతో ఈ కార్యక్రమాన్ని నిర్వహిస్తున్నట్లు తెలుస్తోంది. విద్యార్థులతో కలిసి మ్యాచ్ను వీక్షించడం ద్వారా క్రీడాస్ఫూర్తి, జట్టు భావన వంటి విలువలను ప్రోత్సహించాలని ప్రభుత్వం భావిస్తోంది.
ప్రపంచ ఫుట్బాల్ దిగ్గజం లియోనెల్ మెస్సీ అర్జెంటీనా జట్టు తరఫున బరిలోకి దిగనున్న నేపథ్యంలో ఈ మ్యాచ్పై అభిమానుల్లో భారీ ఆసక్తి నెలకొంది. రాష్ట్ర వ్యాప్తంగా ఫుట్బాల్ అభిమానులు ఈ పోరును ఆసక్తిగా ఎదురుచూస్తున్నారు.
గతంలో హైదరాబాద్ పర్యటన సందర్భంగా మెస్సీతో కలిసి ముఖ్యమంత్రి రేవంత్ రెడ్డి ఫుట్బాల్ ఆడిన సందర్భం కూడా అప్పట్లో విశేషంగా చర్చనీయాంశమైంది. ఇప్పుడు మరోసారి మెస్సీ మ్యాచ్ను విద్యార్థులతో కలిసి వీక్షించనుండటంతో ఈ కార్యక్రమానికి మరింత ప్రాధాన్యం ఏర్పడింది.
ఈ కార్యక్రమానికి విద్యార్థులు, క్రీడాభిమానులు, వివిధ విద్యాసంస్థల ప్రతినిధులు హాజరయ్యే అవకాశం ఉందని అధికారులు తెలిపారు. రాష్ట్రంలో క్రీడల అభివృద్ధికి ప్రభుత్వం తీసుకుంటున్న చర్యల్లో భాగంగానే ఈ ప్రత్యేక కార్యక్రమాన్ని నిర్వహిస్తున్నట్లు పేర్కొన్నారు.
