ప్రతిపక్షం, జూలై 09: కేంద్ర ఆరోగ్య, కుటుంబ సంక్షేమ శాఖ మంత్రి, భారతీయ జనతా పార్టీ జాతీయ అధ్యక్షుడు జేపీ నడ్డా నేడు హైదరాబాద్కు రానున్నారు. ఒకరోజు పర్యటనలో భాగంగా ఆరోగ్య రంగంతో పాటు పార్టీ కార్యక్రమాల్లోనూ ఆయన పాల్గొననున్నారు. ఈ పర్యటనకు రాజకీయంగా ప్రాధాన్యం సంతరించుకుంది.
హైదరాబాద్ చేరుకున్న అనంతరం జేపీ నడ్డా నేరుగా యాదాద్రి భువనగిరి జిల్లా బీబీనగర్లోని అఖిల భారత వైద్య విజ్ఞాన సంస్థ (ఎయిమ్స్)ను సందర్శించనున్నారు. అక్కడ ఆసుపత్రి అభివృద్ధి, వైద్య సేవలు, మౌలిక సదుపాయాలు, నిర్మాణ పనుల పురోగతిపై అధికారులతో సమీక్ష నిర్వహించనున్నారు. అలాగే ఎయిమ్స్లో అమలవుతున్న వివిధ ఆరోగ్య కార్యక్రమాలపై అధికారుల నుంచి వివరాలు తెలుసుకోనున్నారు.
అనంతరం హైదరాబాద్లోని బీజేపీ రాష్ట్ర కార్యాలయానికి చేరుకుని పార్టీ రాష్ట్ర ముఖ్య నాయకులతో ప్రత్యేక సమావేశం నిర్వహించనున్నారు. రాష్ట్రంలో పార్టీ బలోపేతం, సభ్యత్వ విస్తరణ, సంస్థాగత వ్యవహారాలు, రానున్న రాజకీయ కార్యక్రమాలు, ఎన్నికల వ్యూహాలపై నాయకులతో చర్చించే అవకాశం ఉన్నట్లు పార్టీ వర్గాలు తెలిపాయి.
సాయంత్రం బంజారాహిల్స్లోని తాజ్ డెక్కన్ హోటల్లో వివిధ రంగాలకు చెందిన మేధావులు, ప్రముఖులతో జేపీ నడ్డా సమావేశం కానున్నారు. దేశాభివృద్ధి, ఆరోగ్య రంగం, ప్రజా విధానాలు, సమకాలీన అంశాలపై అభిప్రాయాలు, సూచనలు స్వీకరించే అవకాశం ఉన్నట్లు సమాచారం.
రోజంతా వివిధ కార్యక్రమాల్లో పాల్గొన్న అనంతరం జేపీ నడ్డా రాత్రి శంషాబాద్ రాజీవ్ గాంధీ అంతర్జాతీయ విమానాశ్రయం నుంచి ఢిల్లీకి తిరుగు ప్రయాణం కానున్నారు.
