ప్రతిపక్షం, జూలై 10: తెలంగాణ ప్రభుత్వం ఇందిరమ్మ చీరల పంపిణీ కార్యక్రమంపై కీలక నిర్ణయం తీసుకుంది. రాష్ట్రంలోని సుమారు కోటి మంది మహిళలు, డ్వాక్రా (స్వయం సహాయక సంఘాల) సభ్యులకు ప్రతి ఏడాది అందించే ఇందిరమ్మ చీరలను ఇకపై ఒకే విడతలో పంపిణీ చేయాలని నిర్ణయించింది. వచ్చే ఏడాది నుంచి ప్రతి సంవత్సరం అక్టోబర్ 15లోపే అర్హులైన మహిళలందరికీ చీరలు అందేలా కార్యాచరణ రూపొందిస్తోంది.
ఈ మేరకు చీరల తయారీ ప్రక్రియను ముందుగానే ప్రారంభించేందుకు ప్రభుత్వం చర్యలు చేపట్టింది. చేనేత కార్మికులకు పనిలో అంతరాయం లేకుండా, ఉత్పత్తి వేగవంతం చేసేందుకు ముందస్తుగా రూ.142 కోట్ల నిధులను మంజూరు చేసింది. దీంతో చీరల తయారీ సకాలంలో పూర్తయ్యే అవకాశం ఉందని అధికారులు భావిస్తున్నారు.
ప్రభుత్వం తీసుకున్న ఈ నిర్ణయం వల్ల చేనేత కార్మికులకు ఏడాది పొడవునా ఉపాధి లభించడంతో పాటు మహిళలకు పండుగల సీజన్కు ముందే చీరలు అందే అవకాశం ఉంటుంది. ఒకే విడతలో పంపిణీ చేయడం ద్వారా పంపిణీ ప్రక్రియలో జాప్యం తగ్గడంతో పాటు పరిపాలనా వ్యయాలు కూడా తగ్గుతాయని అధికారులు పేర్కొంటున్నారు.
ఇక 2026 సంవత్సరానికి సంబంధించిన ఇందిరమ్మ చీరల పంపిణీ కార్యక్రమాన్ని నవంబర్ 19 నుంచి ప్రారంభించేందుకు ప్రభుత్వం ఇప్పటికే ఏర్పాట్లు చేస్తోంది. జిల్లాల వారీగా చీరల నిల్వలు, రవాణా, పంపిణీ కేంద్రాల ఏర్పాటుపై అధికారులు కార్యాచరణ సిద్ధం చేస్తున్నారు.
ఇందిరమ్మ చీరల పథకం ద్వారా మహిళలకు సంక్షేమాన్ని అందించడమే కాకుండా రాష్ట్ర చేనేత రంగానికి ఊతమివ్వడమే ప్రభుత్వ ప్రధాన లక్ష్యమని అధికారులు తెలిపారు. ముందస్తు ప్రణాళికతో అమలు చేయనున్న ఈ విధానం వల్ల చీరల పంపిణీ మరింత పారదర్శకంగా, సమర్థవంతంగా సాగుతుందని ప్రభుత్వం ఆశాభావం వ్యక్తం చేస్తోంది.
