ప్రతిపక్షం, జూలై 11: దేశ రైల్వే చరిత్రలో మరో కీలక ఘట్టానికి రంగం సిద్ధమైంది. పూర్తిగా స్వదేశీ సాంకేతికతతో రూపొందించిన తొలి హైడ్రోజన్ ఫ్యూయల్ సెల్ రైలు జూలై 17న పట్టాలెక్కనుంది. ప్రధానమంత్రి నరేంద్ర మోదీ ఈ రైలును వర్చువల్ లేదా ప్రత్యక్షంగా ప్రారంభించనున్నట్లు సమాచారం. హరిత ఇంధన వినియోగాన్ని ప్రోత్సహిస్తూ, కాలుష్యరహిత రవాణా వ్యవస్థ దిశగా భారత రైల్వే అడుగులు వేస్తున్న నేపథ్యంలో ఈ ప్రాజెక్టు విశేష ప్రాధాన్యతను సంతరించుకుంది.
ఉత్తర రైల్వే పరిధిలోని హర్యానా రాష్ట్రంలోని జింద్–సోనిపత్ రైల్వే మార్గాన్ని ఈ ప్రాజెక్టుకు పైలట్ కారిడార్గా ఎంపిక చేశారు. ఈ మార్గంలో 10 కోచ్లతో కూడిన హైడ్రోజన్ ఫ్యూయల్ సెల్ రైలు గంటకు గరిష్ఠంగా 75 కిలోమీటర్ల వేగంతో ప్రయాణించనుంది. డీజిల్కు ప్రత్యామ్నాయంగా హైడ్రోజన్ ఇంధనాన్ని వినియోగించే ఈ రైలు నుంచి కార్బన్ ఉద్గారాలు దాదాపు ఉండవు. నీటి ఆవిరి మాత్రమే విడుదల కావడం వల్ల ఇది పర్యావరణ హిత రవాణా వ్యవస్థగా గుర్తింపు పొందుతోంది.
ఈ హైడ్రోజన్ రైలును భారతీయ ఇంజినీర్లు, రైల్వే నిపుణులు స్వదేశీ సాంకేతిక పరిజ్ఞానంతో అభివృద్ధి చేశారు. దేశంలోనే రూపకల్పన చేసి తయారు చేయడం “మేక్ ఇన్ ఇండియా” కార్యక్రమానికి మరో విజయంగా భావిస్తున్నారు. భవిష్యత్తులో డీజిల్ రైళ్ల స్థానంలో దశలవారీగా హైడ్రోజన్ ఆధారిత రైళ్లను ప్రవేశపెట్టే దిశగా రైల్వే శాఖ కార్యాచరణ రూపొందిస్తోంది.
హైడ్రోజన్ ఫ్యూయల్ సెల్ సాంకేతికతను విజయవంతంగా అమలు చేస్తున్న దేశాల జాబితాలో ఇప్పటికే జర్మనీ, జపాన్, చైనా, అమెరికా వంటి దేశాలు ఉన్నాయి. ఇప్పుడు భారత్ కూడా ఆ జాబితాలో చేరడం విశేషంగా మారింది. ఈ ప్రాజెక్టు విజయవంతమైతే దేశంలోని ఇతర మార్గాల్లో కూడా హైడ్రోజన్ రైళ్లను విస్తరించే అవకాశాలు ఉన్నాయి.
పర్యావరణ పరిరక్షణ, స్వచ్ఛమైన ఇంధన వినియోగం, ఆధునిక రవాణా వ్యవస్థల అభివృద్ధి దిశగా భారత రైల్వే చేపడుతున్న ఈ హైడ్రోజన్ రైలు ప్రాజెక్టు దేశ రవాణా రంగంలో కొత్త అధ్యాయానికి నాంది పలుకుతుందని అధికారులు భావిస్తున్నారు. భవిష్యత్తులో గ్రీన్ ట్రాన్స్పోర్ట్ లక్ష్యాలను సాధించడంలో ఈ సాంకేతికత కీలక పాత్ర పోషించే అవకాశం ఉందని నిపుణులు అభిప్రాయపడుతున్నారు.
