ప్రతిపక్షం, జూలై 13: హైదరాబాద్లోని నాంపల్లిలో టీపీసీసీ వర్కింగ్ ప్రెసిడెంట్ జగ్గారెడ్డి బీఆర్ఎస్ సీనియర్ నేత హరీశ్రావుపై తీవ్ర విమర్శలు చేశారు. కాంగ్రెస్ పార్టీ ఇచ్చిన మాటకు కట్టుబడి ఉండే రాజకీయ సంస్కృతి కలిగిన పార్టీ అని పేర్కొంటూ, బీఆర్ఎస్ నాయకత్వం మాత్రం ప్రజలకు ఇచ్చిన హామీలను నిలబెట్టుకోలేదని ఆరోపించారు.
మీడియాతో మాట్లాడిన జగ్గారెడ్డి, కాంగ్రెస్ పార్టీ ప్రజలకు ఇచ్చిన హామీల అమలుకు ఎల్లప్పుడూ ప్రాధాన్యం ఇస్తుందని చెప్పారు. కానీ హరీశ్రావు మాటలు చెప్పడంలోనే ముందుంటారని, వాటిని అమలు చేయడంలో విఫలమయ్యారని విమర్శించారు.
తెలంగాణ ఉద్యమాన్ని ప్రస్తావిస్తూ, ఉద్యమ సమయంలో ఎంతో మంది యువకులు ఆత్మత్యాగాలు చేసిన సందర్భంలో హరీశ్రావు పెట్రోల్ పోసుకుంటానంటూ డ్రామాలు చేశారని జగ్గారెడ్డి ఆరోపించారు. ఉద్యమ భావోద్వేగాలను రాజకీయ ప్రయోజనాల కోసం ఉపయోగించుకోవడమే బీఆర్ఎస్ నాయకుల లక్ష్యమని విమర్శించారు.
రాజకీయాల్లో ప్రజల విశ్వాసాన్ని నిలబెట్టుకోవాలంటే మాట ఇచ్చిన తర్వాత దానిని అమలు చేయాలని, అదే కాంగ్రెస్ పార్టీ విధానమని జగ్గారెడ్డి అన్నారు. ప్రజలను మభ్యపెట్టే రాజకీయాలకు కాలం చెల్లిందని, వాస్తవాలతో ప్రజల ముందుకు వెళ్లాల్సిన అవసరం ఉందన్నారు.
