ప్రతిపక్షం, జూలై 13: కాళేశ్వరం ప్రాజెక్టుకు సంబంధించిన అన్నారం, సుందిళ్ల బ్యారేజీల పరిస్థితిపై బీజేపీ ఎంపీ ఈటల రాజేందర్ కీలక వ్యాఖ్యలు చేశారు. ఆయా బ్యారేజీల పిల్లర్లు కుంగిపోయాయన్న ప్రచారం వాస్తవం కాదని, అక్కడ కేవలం బుంగలు (చిన్న గుంతలు) మాత్రమే ఏర్పడ్డాయని ఆయన పేర్కొన్నారు.
కాళేశ్వరం ప్రాజెక్టుపై నిర్వహించిన రౌండ్ టేబుల్ సమావేశంలో మాట్లాడిన ఈటల రాజేందర్, గ్రామీణ ప్రాంతాల్లో చెరువులకు కూడా ఇలాంటి బుంగలు ఏర్పడతాయని, రైతులు ఇసుక బస్తాలు వేసి వాటిని పూడ్చి నీటిని వినియోగించుకుంటారని ఉదాహరణగా చెప్పారు. అదే తరహాలో బ్యారేజీల విషయంలో కూడా సాంకేతిక పరిష్కారాలతో ముందుకు వెళ్లే అవకాశం ఉందని ఆయన అభిప్రాయపడ్డారు.
ప్రస్తుతం ఎల్నినో ప్రభావం ఉన్న నేపథ్యంలో రాష్ట్రంలో నీటి అవసరాలు పెరుగుతున్నాయని పేర్కొన్న ఈటల, అన్నారం, సుందిళ్ల బ్యారేజీల్లో నీటిని నిల్వ చేయడానికి అనుమతి కోరుతూ జాతీయ ఆనకట్టల భద్రతా సంస్థ (NDSA)ను రాష్ట్ర ప్రభుత్వం ఎందుకు సంప్రదించడం లేదని ప్రశ్నించారు.
రాష్ట్ర ప్రభుత్వం కాళేశ్వరం ప్రాజెక్టుపై స్పష్టమైన వైఖరితో ముందుకు రావాలని, రైతుల ప్రయోజనాలను దృష్టిలో ఉంచుకుని అందుబాటులో ఉన్న నీటి వనరులను సమర్థంగా వినియోగించాలని ఈటల రాజేందర్ సూచించారు.
