ప్రతిపక్షం, జూలై 14: తెలంగాణ రాష్ట్రంలో పెండింగ్లో ఉన్న జాతీయ రహదారి ప్రాజెక్టులు, మౌలిక సదుపాయాల అభివృద్ధి పనులను వేగవంతం చేయాలనే లక్ష్యంతో ముఖ్యమంత్రి ఎ. రేవంత్ రెడ్డి సోమవారం ఢిల్లీలో కేంద్ర రహదారులు, రవాణా శాఖ మంత్రి నితిన్ గడ్కరీతో సమావేశమయ్యారు. ఈ సందర్భంగా రాష్ట్రానికి సంబంధించిన కీలక రహదారి ప్రాజెక్టులు, కొత్త జాతీయ రహదారి ప్రతిపాదనలు, కేంద్ర అనుమతుల కోసం ఎదురుచూస్తున్న అభివృద్ధి కార్యక్రమాలపై సుదీర్ఘంగా చర్చించినట్లు సమాచారం.
రాష్ట్రంలో ప్రస్తుతం నిర్మాణ దశలో ఉన్న జాతీయ రహదారుల పనులు వేగంగా పూర్తయ్యేలా చర్యలు తీసుకోవాలని సీఎం కోరారు. అలాగే, తెలంగాణ అభివృద్ధికి కీలకమైన కొత్త రహదారి మార్గాలకు కేంద్ర ప్రభుత్వం త్వరితగతిన ఆమోదం తెలిపి, అవసరమైన నిధులను విడుదల చేయాలని విజ్ఞప్తి చేసినట్లు తెలిసింది.
రాష్ట్రంలో పారిశ్రామిక అభివృద్ధి, పెట్టుబడుల ఆకర్షణ, రవాణా సౌలభ్యం, ప్రాంతీయ అనుసంధానాన్ని మెరుగుపరచడానికి జాతీయ రహదారుల విస్తరణ అత్యంత కీలకమని సీఎం రేవంత్ రెడ్డి కేంద్ర మంత్రికి వివరించినట్లు అధికార వర్గాలు తెలిపాయి. ఇప్పటికే పెండింగ్లో ఉన్న పలు ప్రాజెక్టులు త్వరగా ప్రారంభమైతే రాష్ట్ర ఆర్థికాభివృద్ధికి ఊతమిస్తాయని ఆయన అభిప్రాయపడ్డారు.
ఇటీవల పార్లమెంట్ సభ్యులతో నిర్వహించిన సమావేశంలో రాష్ట్రానికి సంబంధించిన పెండింగ్ ప్రాజెక్టుల కోసం కేంద్రం నుంచి అనుమతులు, నిధులు సాధించేందుకు సమిష్టిగా కృషి చేయాలని సీఎం పిలుపునిచ్చిన నేపథ్యంలో, ఢిల్లీలో జరుగుతున్న ఈ భేటీకి ప్రాధాన్యం ఏర్పడింది. రాష్ట్ర ప్రయోజనాలను దృష్టిలో ఉంచుకుని కేంద్ర ప్రభుత్వంతో సమన్వయం కొనసాగిస్తూ అభివృద్ధి కార్యక్రమాలను వేగవంతం చేయడమే ప్రభుత్వ లక్ష్యమని అధికార వర్గాలు పేర్కొన్నాయి.
