ప్రతిపక్షం, జూన్ 01,హైదరాబాద్: తెలంగాణ రక్షణ సేన ఆధ్వర్యంలో నిర్వహించిన “తెలంగాణ ఉద్యమకారుల ఆకాంక్షలు – సాధన” రౌండ్ టేబుల్ సమావేశంలో టీఆర్ఎస్ అధ్యక్షురాలు కల్వకుంట్ల కవిత పాల్గొన్నారు. ఈ సందర్భంగా ఆమె తెలంగాణ ఉద్యమకారులు, అమరవీరుల కుటుంబాలు, ప్రజా సంఘాలు, రాజకీయ పార్టీల ప్రతినిధులతో కలిసి రాష్ట్ర భవిష్యత్తు, ఉద్యమ ఆకాంక్షల సాధనపై చర్చించారు.
తెలంగాణ రాష్ట్ర సాధన కోసం వేలాది మంది చేసిన త్యాగాలను గుర్తు చేసిన కవిత, అమరవీరుల కుటుంబాలకు ఇప్పటికీ పూర్తి స్థాయిలో న్యాయం జరగలేదని అన్నారు. ఉద్యమ సమయంలో తెలంగాణ ప్రజలు శాంతియుతంగా పోరాడి దేశానికి ఆదర్శంగా నిలిచారని పేర్కొన్నారు.
ప్రస్తుతం తెలంగాణ అస్తిత్వం, హక్కులు, సంస్కృతిపై దాడి చేసే ప్రయత్నాలు జరుగుతున్నాయని ఆమె ఆరోపించారు. రాష్ట్ర రాజకీయాల్లో ఇతర రాష్ట్రాల నాయకుల జోక్యాన్ని తెలంగాణ ప్రజలు సహించరని హెచ్చరించారు. తెలంగాణలో స్థిరపడిన ప్రతి ఒక్కరినీ తమ వారిగానే భావిస్తామని, అయితే రాష్ట్ర హక్కులు, రాజకీయాల విషయంలో జోక్యం చేసుకోవడాన్ని వ్యతిరేకిస్తామని స్పష్టం చేశారు.
ఆంధ్రప్రదేశ్లో రాజధాని నిర్మాణం, మౌలిక సదుపాయాల అభివృద్ధిలో వైఫల్యాలను కప్పిపుచ్చుకునేందుకే కొందరు నాయకులు తెలంగాణపై వ్యాఖ్యలు చేస్తున్నారని కవిత విమర్శించారు. తెలంగాణలో రాజకీయ విస్తరణ ప్రయత్నాలు చేస్తున్న పార్టీలకు ప్రజలు ఇప్పటికే సమాధానం చెప్పారని అన్నారు.
రాష్ట్రంలో కాంగ్రెస్ ప్రభుత్వం ఏర్పడి రెండున్నరేళ్లు గడిచినా ఉద్యమకారులకు ఇచ్చిన హామీలు అమలు కాలేదని ఆమె ఆరోపించారు. తెలంగాణ ఆవిర్భావ దినోత్సవం సందర్భంగా ఉద్యమకారుల సంక్షేమానికి సంబంధించిన నిర్ణయాలను ప్రభుత్వం ప్రకటించాలని డిమాండ్ చేశారు.
టీఆర్ఎస్ పార్టీ తెలంగాణ హక్కులు, అస్తిత్వ పరిరక్షణ కోసమే పనిచేస్తోందని పేర్కొన్న కవిత, రైతుల సంక్షేమం, యువతకు ఉపాధి అవకాశాలు, సామాజిక తెలంగాణ నిర్మాణమే పార్టీ ప్రధాన లక్ష్యాలని వెల్లడించారు. రాష్ట్ర భవిష్యత్తు అభివృద్ధికి ప్రజలు, ఉద్యమకారులు తమ సూచనలు అందించాలని ఆమె కోరారు.
