ప్రతిపక్షం, జూన్ 06: హైదరాబాద్లో పెరుగుతున్న ట్రాఫిక్ రద్దీకి శాశ్వత పరిష్కారం చూపేందుకు రాష్ట్ర ప్రభుత్వం కీలక ప్రణాళికను సిద్ధం చేస్తోంది. నగర బస్సుల కోసం ప్రత్యేక మార్గాలను ఏర్పాటు చేసే కొత్త రవాణా విధానాన్ని పరిశీలిస్తోంది.
ఈ విధానంలో బస్సుల కోసం ప్రత్యేక రహదారి మార్గాలు ఏర్పాటు చేస్తారు. ఈ మార్గాల్లో కేవలం ప్రజా రవాణా బస్సులు మాత్రమే ప్రయాణించేలా చర్యలు తీసుకోనున్నారు. దీంతో ట్రాఫిక్లో చిక్కుకోకుండా బస్సులు వేగంగా గమ్యస్థానాలకు చేరుకునే అవకాశం ఉంటుంది.
ప్రయాణికుల సౌకర్యార్థం బస్సు నిలయాల వద్దనే టికెట్ సదుపాయాలు, ప్రత్యేక ప్రయాణికుల వేదికలు ఏర్పాటు చేయాలని అధికారులు ఆలోచిస్తున్నారు. అలాగే కూడళ్ల వద్ద బస్సులకు ప్రాధాన్యత ఇచ్చే ప్రత్యేక సంకేత వ్యవస్థను కూడా అమలు చేసే అవకాశాలు ఉన్నాయి.
నగర జనాభా, వాహనాల సంఖ్య రోజురోజుకూ పెరుగుతున్న నేపథ్యంలో ప్రజా రవాణాను మరింత వేగవంతం చేయడమే ఈ ప్రణాళిక లక్ష్యంగా అధికారులు చెబుతున్నారు. ప్రస్తుతం దీనికి సంబంధించిన సాధ్యాసాధ్యాలపై అధ్యయనం జరుగుతుండగా, నివేదిక అందిన తర్వాత ప్రభుత్వం తుది నిర్ణయం తీసుకోనుంది.
ఈ ప్రతిపాదన అమలైతే నగర బస్సు ప్రయాణికులకు వేగవంతమైన, సౌకర్యవంతమైన ప్రయాణం అందడంతో పాటు ట్రాఫిక్ రద్దీ కూడా కొంత మేర తగ్గే అవకాశం ఉందని అధికారులు భావిస్తున్నారు.
