ప్రతిపక్షం, జూన్ 04: తెలంగాణలో సంచలనం రేపిన ఫోన్ ట్యాపింగ్ వ్యవహారంలో మరో కీలక పరిణామం చోటుచేసుకుంది. ఈ కేసులో ఆరోపణలు ఎదుర్కొంటున్న సస్పెండైన అదనపు పోలీసు అధికారి నాయిని భుజంగరావును అవినీతి నిరోధక శాఖ అధికారులు అరెస్టు చేశారు. ఆదాయానికి మించిన ఆస్తులు కూడబెట్టారనే ఆరోపణలపై నమోదైన కేసులో ఆయనను అదుపులోకి తీసుకుని న్యాయస్థానంలో హాజరుపరచగా, న్యాయస్థానం రిమాండ్ విధించింది. అనంతరం ఆయనను చంచల్గూడ కేంద్ర కారాగారానికి తరలించారు.
ఫోన్ ట్యాపింగ్ కేసు దర్యాప్తులో భాగంగా వెలుగులోకి వచ్చిన ఆర్థిక లావాదేవీల ఆధారంగా అవినీతి నిరోధక శాఖ ప్రత్యేక విచారణ చేపట్టింది. ఈ క్రమంలో భుజంగరావు తన అధికారిక ఆదాయానికి మించి ఆస్తులు సంపాదించినట్లు ప్రాథమికంగా గుర్తించిన అధికారులు కేసు నమోదు చేశారు.
దర్యాప్తులో భాగంగా హైదరాబాద్లోని హఫీజ్పేటతో పాటు సూర్యాపేట, నల్గొండ జిల్లాల్లో ఆయన కుటుంబ సభ్యులు, బంధువులకు సంబంధించిన పలు ప్రాంతాల్లో సోదాలు నిర్వహించారు. ఈ తనిఖీల్లో స్థిర, చరాస్తులకు సంబంధించిన పత్రాలు స్వాధీనం చేసుకున్న అధికారులు, వాటి విలువ సుమారు రూ.5.92 కోట్లుగా గుర్తించినట్లు వెల్లడించారు.
స్వాధీనం చేసుకున్న ఆస్తుల మూలాలు, ఆర్థిక లావాదేవీలపై మరింత లోతుగా విచారణ కొనసాగుతోందని అధికారులు తెలిపారు. అవసరమైతే మరికొందరిని కూడా విచారణకు పిలిచే అవకాశం ఉన్నట్లు సమాచారం.
