ప్రతిపక్షం, జూన్ 11: ప్రభుత్వ పాఠశాలల్లో విద్యార్థుల పోషకాహారాన్ని మెరుగుపర్చే లక్ష్యంతో రాష్ట్ర ప్రభుత్వం అల్పాహార పథకాన్ని దశలవారీగా అమలు చేయాలని నిర్ణయించింది. అన్ని పాఠశాలల్లో ఒకేసారి వంటశాలల సౌకర్యం అందుబాటులో లేకపోవడంతో ఈ పథకాన్ని విడతల వారీగా అమలు చేయనున్నారు.
ఈ నెల 15వ తేదీ నుంచి తొలి విడత ప్రారంభం కానుంది. మొదటగా హైదరాబాద్ మహానగర పరిసర జిల్లాలతో పాటు ఎంపిక చేసిన ఇతర ప్రాంతాల్లోని 1,220 ప్రభుత్వ పాఠశాలల్లో ఈ పథకాన్ని అమలు చేయనున్నారు. ఈ కార్యక్రమం ద్వారా సుమారు 1.20 లక్షల మంది విద్యార్థులకు ప్రతిరోజూ ఉదయం పౌష్టికాహారం అందించనున్నారు.
విద్యార్థులు ఆకలితో తరగతులకు హాజరుకాకుండా, ఆరోగ్యంగా ఉండి చదువుపై మరింత దృష్టి సారించేందుకు ఈ పథకం ఉపయోగపడుతుందని ప్రభుత్వం భావిస్తోంది. పౌష్టికాహారం అందించడం ద్వారా విద్యార్థుల హాజరు శాతం పెరగడంతో పాటు వారి ఆరోగ్య పరిస్థితుల్లో కూడా మెరుగుదల కనిపిస్తుందని అధికారులు ఆశాభావం వ్యక్తం చేస్తున్నారు. రాష్ట్రవ్యాప్తంగా అవసరమైన మౌలిక సదుపాయాలు అందుబాటులోకి వచ్చిన తర్వాత ఈ పథకాన్ని అన్ని ప్రభుత్వ పాఠశాలలకు విస్తరించనున్నారు.
