హైదరాబాద్, ప్రతిపక్షం, జూన్ 12: గురుకుల విద్యాసంస్థల కోసం సామగ్రి కొనుగోలు టెండర్లలో భారీ అవినీతి జరిగిందంటూ మాజీ మంత్రి హరీష్ రావు చేసిన ఆరోపణలను రాష్ట్ర మంత్రి అట్లూరి లక్ష్మణ్ కుమార్ తీవ్రంగా ఖండించారు. ప్రభుత్వం పారదర్శకంగా వ్యవహరిస్తున్నప్పటికీ రాజకీయ ప్రయోజనాల కోసం నిరాధార ఆరోపణలు చేయడం సరికాదని ఆయన విమర్శించారు.
మీడియాతో మాట్లాడిన మంత్రి లక్ష్మణ్ కుమార్, గురుకుల విద్యాసంస్థలకు సంబంధించిన టెండర్ల మొత్తం విలువ సుమారు రూ.650 కోట్ల మేర మాత్రమే ఉందని తెలిపారు. అలాంటి పరిస్థితిలో రూ.2,000 కోట్ల అవినీతి జరిగిందని చెప్పడం పూర్తిగా వాస్తవ విరుద్ధమని అన్నారు. టెండర్ల అసలు విలువకన్నా మూడింతలు ఎక్కువగా అవినీతి జరిగిందని ఆరోపించడం ప్రజలను తప్పుదోవ పట్టించే ప్రయత్నమేనని పేర్కొన్నారు.
ప్రభుత్వం చేపట్టిన ప్రతి టెండర్ ప్రక్రియ నిబంధనల ప్రకారమే జరిగిందని, అన్ని దశల్లో పారదర్శకత పాటించామని మంత్రి స్పష్టం చేశారు. గురుకుల విద్యార్థులకు మెరుగైన సౌకర్యాలు కల్పించేందుకు ప్రభుత్వం కట్టుబడి పనిచేస్తోందని, విద్యా రంగ అభివృద్ధిని రాజకీయ విమర్శలతో దెబ్బతీయడం తగదని అన్నారు.
అవినీతి జరిగిందని ఆరోపిస్తున్న హరీష్ రావు తమ వద్ద ఉన్న ఆధారాలను ప్రజల ముందుకు తీసుకురావాలని మంత్రి సవాల్ విసిరారు. కేవలం మీడియా సమావేశాలు నిర్వహించి ఆరోపణలు చేయడం కాకుండా, సంబంధిత పత్రాలు, వివరాలను బయటపెట్టాలని డిమాండ్ చేశారు. ఆధారాలు లేకుండా ప్రభుత్వ ప్రతిష్ఠను దెబ్బతీసే వ్యాఖ్యలు చేయడం బాధ్యతారాహిత్యమని విమర్శించారు.
రాష్ట్ర ప్రభుత్వం ప్రజాధనాన్ని అత్యంత బాధ్యతాయుతంగా వినియోగిస్తోందని, విద్యార్థుల భవిష్యత్తు కోసం చేపడుతున్న కార్యక్రమాలను రాజకీయ వివాదాలుగా మార్చే ప్రయత్నాలు విజయవంతం కావని మంత్రి పేర్కొన్నారు. ప్రజలు వాస్తవాలను గుర్తిస్తారని, నిరాధార ఆరోపణలను నమ్మబోరని ఆయన అన్నారు.
