ప్రతిపక్షం, ఆగస్టు 03: హైదరాబాద్లోని ఎల్బీనగర్ పరిధిలో హృదయ విదారక ఘటన చోటుచేసుకుంది. తొమ్మిది నెలల పసికందును కన్నతల్లే చెరువులో పడేసి హత్య చేసిన ఘటన స్థానికంగా తీవ్ర కలకలం రేపింది. మద్యం మత్తులో ఈ దారుణానికి పాల్పడినట్లు పోలీసులు ప్రాథమిక విచారణలో గుర్తించారు.
పోలీసుల వివరాల ప్రకారం, కర్ణాటకలోని బీదర్కు చెందిన రాజేశ్వరి (34), రవీందర్ రెడ్డి దంపతులు ప్రస్తుతం హైదరాబాద్లోని ఇంజాపూర్ ప్రాంతంలో నివాసం ఉంటున్నారు. వీరికి తొమ్మిది నెలల కుమార్తె అనురాధ ఉంది. అయితే కుటుంబ పరిస్థితులు, మద్యం వ్యసనం నేపథ్యంలో రాజేశ్వరి ఆదివారం బైరామల్గూడ చెరువు వద్దకు వెళ్లి చిన్నారిని నీటిలో పడేసినట్లు పోలీసులు తెలిపారు.
చెరువులో పసికందు కనిపించడంతో స్థానికులు వెంటనే పోలీసులకు సమాచారం అందించారు. ఘటనాస్థలికి చేరుకున్న పోలీసులు చిన్నారిని బయటకు తీసి ఆస్పత్రికి తరలించగా, అప్పటికే ఆమె మృతి చెందినట్లు వైద్యులు నిర్ధారించారు. అనంతరం మృతదేహాన్ని పోస్టుమార్టం కోసం ప్రభుత్వ ఆస్పత్రికి తరలించారు.
ఘటన అనంతరం నిందితురాలు రాజేశ్వరిని పోలీసులు అదుపులోకి తీసుకున్నారు. ఆమె మద్యం మత్తులో ఉన్నట్లు గుర్తించినట్లు ఎల్బీనగర్ సీఐ వినోద్ కుమార్ తెలిపారు. ఈ ఘటనకు గల పూర్తి కారణాలపై దర్యాప్తు కొనసాగుతోందని, కుటుంబ సభ్యులు, స్థానికుల వాంగ్మూలాలను నమోదు చేస్తున్నట్లు పోలీసులు వెల్లడించారు.
ఈ విషాద ఘటనతో స్థానికులు తీవ్ర దిగ్భ్రాంతికి గురయ్యారు. కన్నతల్లే పసికందు ప్రాణాలు తీయడం పట్ల ఆవేదన వ్యక్తం చేస్తున్నారు. పోలీసులు కేసు నమోదు చేసి అన్ని కోణాల్లో విచారణ చేపట్టారు. దర్యాప్తు పూర్తయిన అనంతరం ఘటనకు సంబంధించిన పూర్తి వివరాలను వెల్లడించనున్నట్లు అధికారులు తెలిపారు.
