ప్రతిపక్షం, ఆగస్టు 05: తమిళనాడు మాజీ ఉప ముఖ్యమంత్రి ఉదయనిధి స్టాలిన్ మరోసారి తన వ్యాఖ్యలతో రాజకీయ, సామాజిక వర్గాల్లో చర్చనీయాంశంగా మారారు. నటుడు విజయ్, నటి త్రిషపై చేసిన వ్యాఖ్యల నేపథ్యంలో ఆయనపై తీవ్ర విమర్శలు వ్యక్తమవుతున్నాయి. అయితే ఉదయనిధి వివాదాల్లో చిక్కుకోవడం ఇదే తొలిసారి కాదు. గత కొన్నేళ్లుగా చేసిన పలు వ్యాఖ్యలు దేశవ్యాప్తంగా పెద్ద దుమారం రేపాయి.
2021లో ఏఐఏడీఎంకే నేత శశికళ పాదాలను తాకేందుకు అప్పటి ముఖ్యమంత్రి ఎడప్పాడి కె. పళనిస్వామి పాకుతూ వెళ్లారంటూ ఉదయనిధి చేసిన వ్యాఖ్యలు రాజకీయ దుమారం రేపాయి. ఆ వ్యాఖ్యలపై ఆయనపై పరువునష్టం దావా కూడా దాఖలైంది.
అనంతరం 2023లో సనాతన ధర్మాన్ని మలేరియా, డెంగీ వంటి వ్యాధులతో పోలుస్తూ చేసిన వ్యాఖ్యలు దేశవ్యాప్తంగా తీవ్ర వివాదానికి దారితీశాయి. ఈ ఏడాది తమిళనాడు అసెంబ్లీలో కూడా సనాతన ధర్మాన్ని నిర్మూలించాలని చేసిన వ్యాఖ్యలు మరోసారి రాజకీయ వేడిని పెంచాయి. బీజేపీ సహా పలు హిందూ సంస్థలు దీనిని తీవ్రంగా ఖండించాయి.
తాజాగా నటుడు విజయ్, నటి త్రిషపై చేసిన వ్యాఖ్యలు మరోసారి వివాదానికి కారణమయ్యాయి. ఈ వ్యాఖ్యలపై రాజకీయ నేతలు, సినీ వర్గాలు భిన్నాభిప్రాయాలు వ్యక్తం చేస్తుండగా, ఉదయనిధి పేరు మరోసారి జాతీయ స్థాయిలో చర్చనీయాంశంగా మారింది. వరుస వివాదాస్పద వ్యాఖ్యలతో ఆయన రాజకీయ ప్రస్థానంలో వివాదాలు కొనసాగుతూనే ఉన్నాయి.
