ప్రతిపక్షం, ఆగస్టు 10: కాళ్లు, చేతులు లేదా పాదాల్లో అప్పుడప్పుడు తిమ్మిర్లు పడటం సాధారణమే. అయితే తరచూ ఇదే సమస్య ఎదురవుతుంటే నిర్లక్ష్యం చేయకూడదని వైద్యులు సూచిస్తున్నారు. ఎక్కువసేపు ఒకే భంగిమలో కూర్చోవడం, పడుకోవడం వల్ల నరాలపై ఒత్తిడి ఏర్పడి తిమ్మిర్లు రావచ్చు. రక్తప్రసరణలో తాత్కాలిక మార్పులు కూడా ఇందుకు కారణమవుతాయి.
ఒకే స్థితిలో ఎక్కువసేపు ఉండటం వల్ల నరాలపై ఒత్తిడి పెరిగి శరీరంలోని ఆ భాగం నుంచి మెదడుకు వెళ్లే సంకేతాలకు తాత్కాలికంగా అంతరాయం ఏర్పడుతుంది. దీంతో కాళ్లు, చేతులు మొద్దుబారినట్లు లేదా సూదులతో గుచ్చినట్లుగా అనిపించవచ్చు. సాధారణంగా భంగిమ మార్చుకుని కొద్దిసేపు కదిలితే ఈ సమస్య తగ్గిపోతుంది.
అయితే తిమ్మిర్లు పదేపదే వస్తుంటే విటమిన్ బి12, బి6, మెగ్నీషియం వంటి పోషకాల లోపం కూడా కారణం కావచ్చని వైద్యులు చెబుతున్నారు. అలాగే మెడ లేదా నడుము భాగంలోని వెన్నుపూసల మధ్య నరాలపై ఒత్తిడి పడటం, కొన్ని ఇతర నరాల సంబంధిత సమస్యల వల్ల కూడా చేతులు, కాళ్లలో తిమ్మిర్లు ఏర్పడే అవకాశం ఉంది.
రోజువారీ జీవనశైలిలో కొన్ని మార్పులు చేసుకోవడం ద్వారా సాధారణంగా వచ్చే తిమ్మిర్లను తగ్గించుకోవచ్చు. ఎక్కువసేపు ఒకే చోట కూర్చోకుండా మధ్య మధ్యలో లేచి నడవడం, క్రమం తప్పకుండా వ్యాయామం చేయడం, పోషక విలువలు ఉన్న ఆహారం తీసుకోవడం ఉపయోగకరంగా ఉంటుంది. తగినంత నీరు తాగడం, శరీరానికి అవసరమైన విటమిన్లు, ఖనిజాలు అందేలా ఆహారాన్ని తీసుకోవడం కూడా ముఖ్యం.
అయితే తిమ్మిర్లు తరచూ రావడం, ఎక్కువసేపు కొనసాగడం లేదా బలహీనత, నొప్పి, నడవడంలో ఇబ్బంది వంటి ఇతర లక్షణాలతో కలిసి కనిపిస్తే వైద్యులను సంప్రదించడం మంచిది. కారణం తెలియకుండా సొంతంగా విటమిన్ మందులు తీసుకోవడం కంటే అవసరమైన పరీక్షలు చేయించుకుని సరైన కారణాన్ని గుర్తించడం ఉత్తమం.
