ప్రతిపక్షం, ఆగస్టు 14, హైదరాబాద్: ముఖ్యమంత్రి ఎ. రేవంత్రెడ్డి అధ్యక్షతన డాక్టర్ బీఆర్ అంబేద్కర్ తెలంగాణ రాష్ట్ర సచివాలయంలో జరిగిన రాష్ట్ర మంత్రివర్గ సమావేశంలో పలు కీలక నిర్ణయాలు తీసుకున్నారు. స్వాతంత్య్ర దినోత్సవం సందర్భంగా రాష్ట్రంలోని రేషన్ కార్డుదారులకు స్మార్ట్ రేషన్ కార్డుల పంపిణీని ఘనంగా చేపట్టాలని కేబినెట్ నిర్ణయించింది. దీంతో పాటు తెలంగాణ రైజింగ్ గ్లోబల్ సమ్మిట్ 2.0, రైతులు, నైపుణ్య విద్య, పాఠశాలలు, ఈవీ ఆటోలు, సాగునీటి ప్రాజెక్టులకు సంబంధించి కీలక నిర్ణయాలకు ఆమోదం తెలిపింది.
3.42 కోట్ల మందికి స్మార్ట్ రేషన్ కార్డులు
గతంలో రాష్ట్రంలో 2.81 కోట్ల మంది రేషన్ కార్డు లబ్ధిదారులు ఉండగా.. ప్రజా ప్రభుత్వం అధికారంలోకి వచ్చిన తర్వాత కొత్తగా రేషన్ కార్డులు జారీ చేసి మరో 62 లక్షల మందిని లబ్ధిదారులుగా చేర్చినట్లు ప్రభుత్వం తెలిపింది. ప్రస్తుతం రాష్ట్రంలో మొత్తం 3.42 కోట్ల మంది రేషన్ లబ్ధిదారులు ఉన్నారు. వీరందరికీ స్మార్ట్ రేషన్ కార్డులు జారీ చేసేందుకు ప్రభుత్వం ఏర్పాట్లు పూర్తి చేసింది.
డిసెంబర్లో తెలంగాణ రైజింగ్ గ్లోబల్ సమ్మిట్ 2.0
గత ఏడాది నిర్వహించిన తరహాలోనే ఈ ఏడాది కూడా తెలంగాణ రైజింగ్ గ్లోబల్ సమ్మిట్ 2.0 నిర్వహించాలని కేబినెట్ నిర్ణయించింది. డిసెంబర్ 7, 8, 9 తేదీల్లో సదస్సు నిర్వహించేందుకు సూత్రప్రాయంగా ఆమోదం తెలిపింది. ఉప ముఖ్యమంత్రి మల్లు భట్టి విక్రమార్కతో పాటు మంత్రులు శ్రీధర్బాబు, ఎన్. ఉత్తమ్కుమార్రెడ్డి, వివేక్ వెంకటస్వామి ఆధ్వర్యంలో సబ్ కమిటీని ఏర్పాటు చేయనున్నారు.
ఈసారి ‘ఇన్వెస్ట్ తెలంగాణ’ అనే ప్రధాన ఇతివృత్తంతో సదస్సు నిర్వహించనున్నారు. భారత్ ఫ్యూచర్ సిటీ ప్రణాళికను ప్రపంచానికి పరిచయం చేయడంతో పాటు డిఫెన్స్, ఏరోస్పేస్, ఫార్మా తదితర రంగాల్లో తెలంగాణలో ఉన్న పెట్టుబడి అవకాశాలను అంతర్జాతీయ స్థాయిలో చాటిచెప్పేలా సదస్సును నిర్వహించనున్నారు.
ఏడు రకాల సన్న ధాన్యం సాగుకు ప్రోత్సాహం
వానాకాలం పంటల్లో ఏడు రకాల సన్న ధాన్యం సాగును ప్రోత్సహించాలని మంత్రివర్గం నిర్ణయించింది. ఈ రకాల సాగు విస్తీర్ణాన్ని పెంచేందుకు రైతులకు అవగాహన కల్పించాలని అధికారులను ఆదేశించింది.
81.16 లక్షల టన్నుల ధాన్యం కొనుగోలు
యాసంగి ధాన్యం సేకరణలో తెలంగాణ దేశంలోనే అగ్రస్థానంలో నిలిచిందని ప్రభుత్వం తెలిపింది. ఈసారి రికార్డు స్థాయిలో 81.16 లక్షల మెట్రిక్ టన్నుల ధాన్యాన్ని కనీస మద్దతు ధరకు ప్రభుత్వం కొనుగోలు చేసింది.
ఇందులో 63.62 లక్షల మెట్రిక్ టన్నులను కేంద్ర ప్రభుత్వం సేకరించనుండగా.. మిగిలిన 17.54 లక్షల మెట్రిక్ టన్నుల ధాన్యాన్ని ఈ-వేలం ద్వారా విక్రయించాలని కేబినెట్ నిర్ణయించింది. క్వింటాల్కు రూ.2,389 ప్రాథమిక ధరగా నిర్ణయించి విక్రయించనున్నారు.
ఐటీఐలు, పాలిటెక్నిక్ కళాశాలలకు కీలక మార్పులు
రాష్ట్రంలోని ఐటీఐలు, ఏటీసీలు, పాలిటెక్నిక్ కళాశాలలను యంగ్ ఇండియా స్కిల్స్ యూనివర్సిటీ పరిధిలోకి తీసుకురావడానికి కేబినెట్ ఆమోదం తెలిపింది. ప్రస్తుతం పరిశ్రమల శాఖ పరిధిలో ఉన్న ఈ సంస్థలను ఇకపై శక్తి శాఖ పరిధిలోకి తీసుకురావాలని నిర్ణయించారు.
ఏడు నియోజకవర్గాల్లో ఇంటిగ్రేటెడ్ రెసిడెన్షియల్ స్కూళ్లు
ఆదిలాబాద్, నిర్మల్, ముధోల్, బోథ్, సిర్పూర్, గజ్వేల్, దుబ్బాక నియోజకవర్గాల్లో యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల నిర్మాణానికి కేబినెట్ గ్రీన్సిగ్నల్ ఇచ్చింది.
తొలి దశలో రాష్ట్రంలోని 113 నియోజకవర్గాల్లో స్కూల్ కాంప్లెక్స్ల నిర్మాణానికి ప్రణాళిక రూపొందించగా.. ఇప్పటివరకు 86 స్కూల్ కాంప్లెక్స్లకు అనుమతులు మంజూరైనట్లు ప్రభుత్వం వెల్లడించింది.
హైదరాబాద్లో 18,766 ఆటోలు ఈవీలుగా
హైదరాబాద్ను గ్రీన్ సిటీగా మార్చే లక్ష్యంతో మరో కీలక నిర్ణయం తీసుకున్నారు. నగరంలో ప్రస్తుతం ఉన్న 18,766 పెట్రోల్, డీజిల్ ఆటోరిక్షాలను ఎలక్ట్రిక్ వాహనాలుగా మార్చేందుకు రూ.200 కోట్లతో ప్రత్యేక పథకానికి ఆమోదం తెలిపారు.
‘తెలంగాణ ఆటో రిక్షా ఎలక్ట్రిక్ కన్వర్షన్ స్కీమ్’ కింద అర్హులైన ఆటో డ్రైవర్లకు ఒక్కో వాహనానికి గరిష్ఠంగా రూ.1.50 లక్షల సబ్సిడీ అందించనున్నారు. పాత ఆటోకు విద్యుత్ కిట్ అమర్చుకోవడంతో పాటు.. పాత వాహనాన్ని స్క్రాప్ చేసి కొత్త ఎలక్ట్రిక్ ఆటో కొనుగోలు చేసుకునే అవకాశం కూడా కల్పించనున్నారు.
పరిశ్రమల తరలింపునకు గడువు పొడిగింపు
హైదరాబాద్ నగర పరిధిలోని కాలుష్యకారక పరిశ్రమలను నగర శివార్లకు తరలించేందుకు ఉద్దేశించిన హెచ్ఐఎల్టీ పాలసీ దరఖాస్తు గడువును మరో మూడు నెలలు పొడిగించారు. దరఖాస్తుదారుల విజ్ఞప్తుల మేరకు అక్టోబర్ 31 వరకు దరఖాస్తు చేసుకునేందుకు అవకాశం కల్పించారు.
మక్తల్-నారాయణపేట-కొడంగల్ ఎత్తిపోతలకు రూ.2,100 కోట్లు
మక్తల్-నారాయణపేట-కొడంగల్ ఎత్తిపోతల పథకం రెండో దశ పనులకు రూ.2,100 కోట్ల అంచనా వ్యయానికి కేబినెట్ ఆమోదం తెలిపింది. ఈ ప్రాజెక్టు ద్వారా దాదాపు లక్ష ఎకరాలకు సాగునీరు అందించడంతో పాటు సంబంధిత ప్రాంతాలకు తాగునీరు, పారిశ్రామిక అవసరాలకు నీటిని అందించే అవకాశం ఏర్పడనుంది.
గూడెందొడ్డి ప్రాజెక్టుపై కీలక నిర్ణయం
గూడెందొడ్డి పంప్డ్ స్టోరేజీ ప్రాజెక్టు సామర్థ్యాన్ని 1.19 టీఎంసీల నుంచి 15 టీఎంసీలకు పెంచేందుకు కేబినెట్ ఆమోదం తెలిపింది. అలాగే సోలార్ విద్యుత్ ఉత్పత్తి అవకాశాలపై అధ్యయనం చేసేందుకు కన్సల్టెంట్ను నియమించాలని నిర్ణయించింది.
మొత్తంగా రాష్ట్ర కేబినెట్ సమావేశంలో ప్రజా పంపిణీ వ్యవస్థ, పెట్టుబడులు, వ్యవసాయం, నైపుణ్య విద్య, పాఠశాలలు, పర్యావరణ పరిరక్షణ, ఎలక్ట్రిక్ వాహనాలు, సాగునీటి ప్రాజెక్టులకు సంబంధించి పలు కీలక నిర్ణయాలు తీసుకుంది.
