ప్రతిపక్షం, ఆగస్టు 17, హైదరాబాద్: నిషేధిత భూముల జాబితా పేరుతో సామాన్య ప్రజలను ఇబ్బందులకు గురిచేస్తే ఏమాత్రం సహించబోమని తెలంగాణ మంత్రి పొంగులేటి శ్రీనివాస్రెడ్డి అధికారులను హెచ్చరించారు. భూముల సమస్యల పరిష్కారం కోసం కార్యాలయాల చుట్టూ ప్రజలను తిప్పడం, దరఖాస్తులను అనవసరంగా పెండింగ్లో ఉంచడం, నిర్ణయాల్లో జాప్యం చేయడం వంటి చర్యలకు ఇకపై తావివ్వొద్దని స్పష్టం చేశారు.
22-ఏ భూములకు సంబంధించిన అంశాలపై సోమవారం సచివాలయంలో మంత్రి పొంగులేటి శ్రీనివాస్రెడ్డి సమీక్ష నిర్వహించారు. హైదరాబాద్, రంగారెడ్డి, మేడ్చల్-మల్కాజిగిరి, సంగారెడ్డి జిల్లాలకు చెందిన రెవెన్యూ, రిజిస్ట్రేషన్ శాఖ అధికారులతో మంత్రి పలు అంశాలపై చర్చించారు. ఆయా జిల్లాల్లో 22-ఏ కింద పెండింగ్లో ఉన్న దరఖాస్తులు, వాటి పరిష్కారానికి తీసుకుంటున్న చర్యలు, భూములు నిషేధిత జాబితాలోకి చేరడానికి గల కారణాలపై అధికారులను వివరాలు అడిగి తెలుసుకున్నారు.
పెండింగ్ దరఖాస్తులపై మంత్రి ఆరా
సబ్రిజిస్ట్రార్ కార్యాలయాల వారీగా ఎన్ని దరఖాస్తులు వచ్చాయి? వాటిలో ఎన్ని పరిష్కరించారు? ఎన్ని పెండింగ్లో ఉన్నాయి? దరఖాస్తులు ఎప్పటి నుంచి పెండింగ్లో ఉన్నాయి? అనే అంశాలపై మంత్రి అధికారులను ప్రశ్నించారు. పెండింగ్ దరఖాస్తులను ఎప్పటిలోగా పరిష్కరిస్తారో స్పష్టమైన గడువు ఇవ్వాలని ఆదేశించారు. ప్రజలు పదేపదే కార్యాలయాలకు తిరిగే పరిస్థితి లేకుండా సమస్యలను నిర్ణీత సమయంలో పరిష్కరించాలని సూచించారు.
22-ఏ జాబితాలో భూమి ఉందనే ఒక్క కారణంతో దరఖాస్తును తిరస్కరించవద్దని మంత్రి స్పష్టం చేశారు. సంబంధిత భూమి ఎందుకు నిషేధిత జాబితాలోకి చేరిందో ముందుగా పరిశీలించాలని అధికారులకు సూచించారు. రికార్డులు, పాత దస్తావేజులు, భూమికి సంబంధించిన వాస్తవ పరిస్థితులను సమగ్రంగా పరిశీలించిన తర్వాతే తుది నిర్ణయం తీసుకోవాలని ఆదేశించారు.
ఫిర్యాదుల కోసం ప్రత్యేక టోల్ఫ్రీ నంబర్
భూముల సమస్యలపై ప్రజల నుంచి ఫిర్యాదులు స్వీకరించేందుకు ప్రత్యేక టోల్ఫ్రీ నంబర్ ఏర్పాటు చేయనున్నట్లు మంత్రి పొంగులేటి వెల్లడించారు. 22-ఏ భూముల విషయంలో ప్రజలకు ఎదురవుతున్న సమస్యలు, అధికారుల స్థాయిలో జరుగుతున్న జాప్యం, దరఖాస్తుల పరిష్కారంలో ఇబ్బందులను ఈ వ్యవస్థ ద్వారా ప్రభుత్వం తెలుసుకునే అవకాశం కల్పించనున్నట్లు తెలిపారు.
ప్రజల సమస్యలను నేరుగా ప్రభుత్వ దృష్టికి తీసుకొచ్చేలా ఫిర్యాదుల వ్యవస్థను మరింత సులభతరం చేయాలని అధికారులను ఆదేశించారు. దరఖాస్తుల పరిష్కారంలో పారదర్శకత, జవాబుదారీతనం ఉండేలా చర్యలు తీసుకోవాలని స్పష్టం చేశారు.
నిజమైన హక్కుదారులకు న్యాయం చేయాలి
ఒకవైపు నిజమైన భూ హక్కుదారులకు న్యాయం చేయడంతో పాటు మరోవైపు ప్రభుత్వ భూములు, ఆస్తులను కాపాడాల్సిన బాధ్యత అధికారులపై ఉందని మంత్రి పేర్కొన్నారు. 22-ఏ నిబంధనల ఉద్దేశం ప్రభుత్వ భూములు, వివాదాస్పద ఆస్తులను రక్షించడమే తప్ప, నిజమైన హక్కుదారులను ఇబ్బంది పెట్టడం కాదని స్పష్టం చేశారు.
భూమి నిషేధిత జాబితాలోకి వచ్చిన నేపథ్యం, అందుకు సంబంధించిన రికార్డులు, ప్రస్తుత వాస్తవ పరిస్థితులను అధికారులు క్షుణ్ణంగా పరిశీలించాలని సూచించారు. అర్హత ఉన్న భూ యజమానులకు న్యాయం జరిగేలా చర్యలు తీసుకోవాలని ఆదేశించారు.
నిర్లక్ష్యం చేస్తే కఠిన చర్యలు
ప్రభుత్వ భూముల రక్షణతో పాటు ప్రజల హక్కుల పరిరక్షణ విషయంలో అధికారులు సమతుల్యంగా వ్యవహరించాలని మంత్రి సూచించారు. ప్రజల సమస్యలను పట్టించుకోకుండా దరఖాస్తులను పెండింగ్లో ఉంచడం, అనవసరంగా కార్యాలయాల చుట్టూ తిప్పడం వంటి చర్యలను తీవ్రంగా పరిగణిస్తామని హెచ్చరించారు.
22-ఏ పేరుతో సామాన్యులు ఇబ్బందులు పడకుండా వ్యవస్థలో అవసరమైన మార్పులు తీసుకురావాలని అధికారులను ఆదేశించిన మంత్రి.. ప్రతి దరఖాస్తును నిబంధనల ప్రకారం పరిశీలించి, అర్హత ఉన్న కేసుల్లో వేగంగా పరిష్కారం చూపాలని స్పష్టం చేశారు. ప్రజలకు న్యాయం చేయడంతో పాటు ప్రభుత్వ భూములు, ఆస్తులకు రక్షణ కల్పించేలా అధికారులు బాధ్యతాయుతంగా పనిచేయాలని మంత్రి పొంగులేటి శ్రీనివాస్రెడ్డి ఆదేశించారు.
