టీడీపీ అధినేత, ఏపీ సీఎం చంద్రబాబు నాయుడు తెలంగాణలోనూ పార్టీకి పునర్వైభవం తీసుకురావాలని చూస్తున్నారు. అందుకే అవకాశం దొరికినప్పుడల్లా తెలంగాణకు వస్తూ ఇక్కడి నేతలతో సమావేశాలు నిర్వహిస్తూ వారిలో ఉత్సాహం నింపుతున్నారు. పార్టీ బలోపేతానికి చర్యలు తీసుకుంటున్నారు. ఇటీవల తెలంగాణలో నిర్వహించిన పార్టీ సమావేశంలోనూ కీలక వ్యాఖ్యలు చేశారు. పార్టీకి మళ్లీ గత వైభవాన్ని తీసుకురావడమే లక్ష్యంగా ప్రతి కార్యకర్త కృషి చేయాలని పిలుపునిచ్చారు. అందుకు తగిన కార్యాచరణను కూడా రూపొందించాలని ఆదేశించారు.
ఈ క్రమంలోనే చంద్రబాబు నాయుడు ఇవాళ మరోసారి తెలంగాణలో పర్యటించనున్నారు. మధ్యాహ్నం 3 గంటలకు ఎన్టీఆర్ భవన్‌లో టీ టీడీపీ నేతలతో సమావేశం కానున్నారు. నూతన అధ్యక్షుడి ఎంపిక, పార్టీ బలోపేతం వంటి అంశాలపై నేతలతో కీలక సమావేశం నిర్వహించనున్నారు. అంతేకాదు, అన్నీ కుదిరితే టీ టీడీపీ కొత్త అధ్యక్షుడిని ఇవాళే ప్రకటించే ఛాన్స్ ఉందని కూడా పార్టీ వర్గాల్లో వినిపిస్తోంది. పార్టీని బలోపేతం చేసే దిశగా.. సభ్యత్వ నమోదు కార్యక్రమంపై కార్యకర్తలకు చంద్రబాబు కీలక ఆదేశాలు ఇవ్వనున్నట్లు సమాచారం.
