ప్రతిపక్షం, ఆగస్టు 14: ఆగస్టు 15 స్వాతంత్ర్య దినోత్సవాన్ని పురస్కరించుకుని దేశవ్యాప్తంగా వేడుకలకు ఏర్పాట్లు జరుగుతున్నాయి. పాఠశాలలు, కార్యాలయాలు, ఇళ్లను మువ్వన్నెల జెండా రంగులతో అలంకరించేందుకు ప్రజలు సిద్ధమవుతున్నారు. ఈ సందర్భంగా ప్రత్యేకంగా ముగ్గులు, రంగోలీలతో దేశభక్తిని చాటుకోవాలనుకునే వారికి ఎన్నో అందమైన డిజైన్లు అందుబాటులో ఉన్నాయి.
అశోకచక్రంతో త్రివర్ణ ముగ్గు
ముగ్గు మధ్యలో అశోకచక్రాన్ని గీసి.. దాని చుట్టూ కాషాయం, తెలుపు, ఆకుపచ్చ రంగులతో అలంకరిస్తే ఎంతో ఆకర్షణీయంగా ఉంటుంది. చివరగా తెలుపు రంగుతో అంచులను అందంగా తీర్చిదిద్దితే ముగ్గు మరింత ప్రత్యేకంగా కనిపిస్తుంది.
పూలతో మువ్వన్నెల రంగోలి
కాషాయం రంగు బంతిపూలు, తెల్లని మల్లె లేదా చామంతి పూలు, ఆకుపచ్చ ఆకులను ఉపయోగించి త్రివర్ణ పూల రంగోలి వేయొచ్చు. మధ్యలో అశోకచక్రాన్ని ఏర్పాటు చేస్తే చూపరులను ఆకట్టుకునేలా ఉంటుంది.
భారతదేశ పటంతో ముగ్గు
తెల్లని రంగుతో భారతదేశ పటాన్ని గీసి.. అందులో కాషాయం, తెలుపు, ఆకుపచ్చ రంగులు నింపాలి. మధ్యలో అశోకచక్రాన్ని ఏర్పాటు చేసి, చుట్టూ పూలతో అలంకరిస్తే దేశభక్తిని ప్రతిబింబించే అందమైన రంగోలి సిద్ధమవుతుంది.
త్రివర్ణ ఆకులు, పూల డిజైన్
అశోకచక్రం చుట్టూ కాషాయం, తెలుపు, ఆకుపచ్చ రంగులతో పూలు, ఆకుల ఆకృతులను రూపొందించవచ్చు. చిన్న చిన్న తెల్లని చుక్కలు, పూల ఆకారాలతో అంచులను అలంకరిస్తే ముగ్గు మరింత అందంగా కనిపిస్తుంది.
ఈ స్వాతంత్ర్య దినోత్సవానికి ఇంటి ముందు, పాఠశాలల్లో లేదా కార్యాలయాల్లో ఇలాంటి త్రివర్ణ ముగ్గులు వేస్తే వేడుకల వాతావరణంతో పాటు దేశభక్తి భావన కూడా మరింత ఉట్టిపడుతుంది.
