ప్రతిపక్షం, ఆగస్టు 16: ఆంధ్రప్రదేశ్ విమానయాన చరిత్రలో కీలక ఘట్టానికి తెరలేవనుంది. దాదాపు ఐదు దశాబ్దాలుగా ప్రయాణికులకు సేవలందించిన విశాఖపట్నం విమానాశ్రయం నుంచి సాధారణ విమాన సర్వీసులు నేటి అర్ధరాత్రితో ముగియనున్నాయి. ఇకపై అక్కడ ప్రత్యేక విమానాలు మాత్రమే రాకపోకలు సాగించే అవకాశం ఉంది.
విశాఖలో విమానయాన సేవలకు సుదీర్ఘ చరిత్ర ఉంది. 1941లో బ్రిటిష్ పాలనలో చిన్న ఎయిర్స్ట్రిప్గా ఏర్పాటైన ఈ ప్రదేశం అనంతరం నౌకాదళం ఆధీనంలోకి వెళ్లింది. 1972లో నేవీ ఆధ్వర్యంలో కార్యకలాపాలు కొనసాగగా.. ఆ తర్వాత దశలవారీగా పౌర విమాన సర్వీసులు ప్రారంభమయ్యాయి. కాలక్రమేణా విశాఖ విమానాశ్రయం రాష్ట్రంలోనే ముఖ్యమైన విమానయాన కేంద్రంగా ఎదిగింది.
విశాఖ నగరానికి పర్యాటకం, వ్యాపారం, పారిశ్రామిక రంగాల అభివృద్ధిలో ఈ విమానాశ్రయం కీలక పాత్ర పోషించింది. దేశంలోని పలు ప్రధాన నగరాలకు ఇక్కడి నుంచి విమాన సేవలు అందుబాటులో ఉండటంతో ప్రయాణికులకు ఎంతో సౌకర్యంగా మారింది. అయితే భోగాపురంలో కొత్త అంతర్జాతీయ స్థాయి విమానాశ్రయం అందుబాటులోకి రావడంతో విమాన సేవలను అక్కడికి తరలించనున్నారు.
భోగాపురం నుంచి కొత్త అధ్యాయం
రేపటి నుంచి భోగాపురం అల్లూరి సీతారామరాజు అంతర్జాతీయ విమానాశ్రయం నుంచి సాధారణ విమాన సర్వీసులు ప్రారంభం కానున్నాయి. తొలి రోజే ఏకంగా 31 విమానాలు రాకపోకలు సాగించనున్నట్లు సమాచారం. దీంతో ఉత్తరాంధ్రలో విమానయాన రంగానికి కొత్త దశ ప్రారంభం కానుంది.
కొత్త విమానాశ్రయం అందుబాటులోకి రావడంతో విశాఖపట్నంతో పాటు విజయనగరం, శ్రీకాకుళం, అనకాపల్లి, అల్లూరి సీతారామరాజు జిల్లాల ప్రజలకు మెరుగైన విమాన ప్రయాణ సదుపాయాలు అందుబాటులోకి రానున్నాయి. భవిష్యత్తులో అంతర్జాతీయ విమాన సర్వీసులు కూడా విస్తరించే అవకాశం ఉండటంతో ఉత్తరాంధ్రలో పర్యాటకం, వాణిజ్యం, పెట్టుబడులు, పరిశ్రమల అభివృద్ధికి ఇది దోహదపడుతుందని అధికారులు భావిస్తున్నారు.
ఐదు దశాబ్దాలకు పైగా ప్రయాణికులకు సేవలందించిన విశాఖ విమానాశ్రయానికి సాధారణ విమాన సర్వీసుల రూపంలో వీడ్కోలు పలుకుతుండగా.. కొత్త భోగాపురం విమానాశ్రయం నుంచి విమానయానానికి కొత్త అధ్యాయం ప్రారంభం కానుంది. దీంతో ఉత్తరాంధ్ర ప్రజల్లో కొత్త విమానాశ్రయంపై భారీగా అంచనాలు నెలకొన్నాయి.
