ప్రతిపక్షం, ఆగస్టు 18: వరి నాట్లు పూర్తి చేసుకుని స్వగ్రామానికి తిరిగి వెళ్తున్న కూలీలను ఘోర రోడ్డు ప్రమాదం బలిగొంది. మధ్యప్రదేశ్లోని భిండ్ జిల్లాలో జరిగిన ఈ ప్రమాదంలో 8 మంది కూలీలు మృతి చెందగా.. మరో 32 మంది తీవ్రంగా గాయపడ్డారు. ప్రమాద తీవ్రతతో ఘటనాస్థలిలో విషాదకర పరిస్థితులు నెలకొన్నాయి.
పోలీసుల వివరాల ప్రకారం.. ఉత్తరప్రదేశ్లోని లఖీంపూర్ ఖేరికి చెందిన పలువురు కూలీలు గ్వాలియర్ ప్రాంతంలో వరి నాట్ల పనులకు వెళ్లారు. పనులు పూర్తయ్యాక పికప్ వాహనంలో స్వగ్రామానికి తిరుగు ప్రయాణమయ్యారు. మార్గమధ్యలో అకస్మాత్తుగా రోడ్డుపైకి వచ్చిన పశువులను తప్పించేందుకు డ్రైవర్ ప్రయత్నించినట్లు తెలుస్తోంది.
ఈ క్రమంలో పికప్ వాహనం అదుపుతప్పి రోడ్డుకు అవతలి వైపు నుంచి వస్తున్న ట్రక్కును బలంగా ఢీకొట్టింది. ప్రమాద ధాటికి పికప్ వాహనం తీవ్రంగా దెబ్బతింది. అందులో ప్రయాణిస్తున్న కూలీలు పలువురు వాహనంలోనే చిక్కుకుపోయారు.
సమాచారం అందుకున్న పోలీసులు, సహాయక సిబ్బంది వెంటనే ఘటనాస్థలికి చేరుకుని సహాయక చర్యలు చేపట్టారు. క్షతగాత్రులను బయటకు తీసి సమీపంలోని ఆసుపత్రులకు తరలించారు. అయితే అప్పటికే 8 మంది కూలీలు మృతి చెందినట్లు వైద్యులు నిర్ధారించారు. మరో 32 మంది తీవ్రంగా గాయపడటంతో వారికి చికిత్స అందిస్తున్నారు.
ప్రమాదానికి పశువులను తప్పించేందుకు డ్రైవర్ చేసిన ప్రయత్నమే కారణమా? లేక వాహనం వేగం, రహదారి పరిస్థితులు వంటి ఇతర అంశాలు కూడా ఉన్నాయా? అనే కోణాల్లో పోలీసులు దర్యాప్తు చేస్తున్నారు. మృతుల కుటుంబాలకు సమాచారం అందించి, వారి స్వస్థలాలకు మృతదేహాలను తరలించే ఏర్పాట్లు చేస్తున్నట్లు అధికారులు తెలిపారు.
పనుల కోసం ఇతర ప్రాంతాలకు వెళ్లి తిరిగి ఇళ్లకు వస్తున్న సమయంలో కూలీలు ప్రమాదానికి గురికావడం స్థానికంగా తీవ్ర విషాదాన్ని నింపింది. ఈ ఘటనపై అధికారులు పూర్తి వివరాలు సేకరిస్తున్నారు.
