ప్రతిపక్షం, ఆగస్టు 19: తిరుమల శ్రీవారి ఆలయానికి భక్తుల రాక భారీగా కొనసాగుతోంది. భక్తుల కానుకలతో శ్రీవారి హుండీకి రికార్డు స్థాయిలో ఆదాయం సమకూరింది. మంగళవారం ఒక్కరోజే హుండీ ద్వారా ఏకంగా రూ.6.12 కోట్ల ఆదాయం లభించింది. ఇటీవల కాలంలో ఒకే రోజులో నమోదైన అత్యధిక ఆదాయాల్లో ఇది ఒకటిగా నిలిచింది. స్వామివారిని దర్శించుకునేందుకు పెద్ద సంఖ్యలో భక్తులు తరలిరావడంతో తిరుమలలో రద్దీ నెలకొంది.
మంగళవారం మొత్తం 80,905 మంది భక్తులు శ్రీవారిని దర్శించుకున్నారు. స్వామివారిపై భక్తితో 33,539 మంది తలనీలాలు సమర్పించారు. హుండీ ఆదాయం భారీగా రావడం శ్రీవారిపై భక్తుల విశ్వాసానికి నిదర్శనంగా నిలుస్తోందని అధికారులు తెలిపారు.
మరోవైపు తిరుమలలో భక్తుల రద్దీ కొనసాగుతోంది. శ్రీవారి దర్శనానికి ప్రస్తుతం సుమారు 20 నుంచి 24 గంటల సమయం పడుతోంది. భారీ సంఖ్యలో భక్తులు క్యూలైన్లలో వేచి ఉండటంతో క్యూలైన్ శిలాతోరణం వరకు చేరింది. దీంతో దర్శనానికి వచ్చే భక్తులు రద్దీ పరిస్థితులను దృష్టిలో ఉంచుకుని తమ ప్రయాణాన్ని ప్రణాళిక చేసుకోవాలని అధికారులు సూచిస్తున్నారు.
ప్రత్యేక ప్రవేశ దర్శనం, ఇతర దర్శనాల కోసం వచ్చే భక్తులు కూడా పరిస్థితులను గమనించి తిరుమలకు రావాలని సూచించారు. మరోవైపు ఎస్ఎస్డీ టోకెన్లు లేని భక్తులు నేరుగా తిరుమలకు చేరుకుని శ్రీవారిని దర్శించుకోవాలని టీటీడీ సూచించింది. రద్దీ దృష్ట్యా భక్తులకు ఎలాంటి ఇబ్బందులు కలగకుండా అధికారులు ఏర్పాట్లను పర్యవేక్షిస్తున్నారు.
శ్రీవారి దర్శనానికి భారీగా భక్తులు తరలిరావడంతో ఒకవైపు ఆలయ పరిసరాలు కిటకిటలాడుతుండగా.. మరోవైపు హుండీ ఆదాయం కూడా గణనీయంగా పెరుగుతోంది. ఒక్కరోజులోనే రూ.6 కోట్లకు పైగా ఆదాయం రావడం తిరుమల చరిత్రలో మరోసారి హుండీ కానుకల రికార్డును చాటిచెప్పింది.
