ప్రతిపక్షం, ఆగస్టు 18, హైదరాబాద్: తెలంగాణలో ఓటర్ల జాబితా సవరణ ప్రక్రియపై టీపీసీసీ అధ్యక్షుడు మహేశ్కుమార్ గౌడ్ తీవ్ర ఆందోళన వ్యక్తం చేశారు. ఎన్నికల సంఘం వ్యవహరిస్తున్న తీరుపై ఆయన అసంతృప్తి వ్యక్తం చేస్తూ, ప్రజల ఓటు హక్కును కాపాడాల్సిన బాధ్యత ఎన్నికల సంఘంపై ఉందన్నారు. కేంద్రంలోని బీజేపీ ప్రభుత్వం రాజ్యాంగ సంస్థలను బలహీనపరుస్తోందని ఆరోపించిన ఆయన.. ఎన్నికల సంఘం కూడా బీజేపీకి అనుబంధ సంస్థగా వ్యవహరిస్తోందంటూ తీవ్ర వ్యాఖ్యలు చేశారు.
హైదరాబాద్లోని గాంధీభవన్లో ఆయన మాట్లాడుతూ.. తెలంగాణలో సుమారు 3.38 కోట్ల ఓట్లు ఉన్నాయని తెలిపారు. ఓటర్ల జాబితాలో పెద్ద సంఖ్యలో ఓట్లను వివిధ కారణాలతో సందేహాస్పదంగా చూపిస్తున్నారని ఆరోపించారు. ఎఎస్బీడీల పేరుతో ఓట్లను తొలగించే ప్రయత్నం జరుగుతోందని, దీనివల్ల ముఖ్యంగా పేదలు, సామాన్య ప్రజలు తమ ఓటు హక్కును కోల్పోయే ప్రమాదం ఉందని ఆందోళన వ్యక్తం చేశారు.
తెలంగాణలో సుమారు 1.60 కోట్ల ఓట్లపై ప్రశ్నార్థకత ఎలా ఏర్పడిందో ఎన్నికల సంఘం స్పష్టత ఇవ్వాలని మహేశ్కుమార్ గౌడ్ డిమాండ్ చేశారు. ఇందులో అన్మ్యాప్డ్ ఓట్లు సుమారు 32.37 లక్షలు ఉన్నాయని, మరో 60.50 లక్షల ఓట్లు సందేహాస్పదంగా ఉన్నట్లు చూపిస్తున్నారని తెలిపారు. ఈ లెక్కల ప్రకారం దాదాపు 92 లక్షల ఓట్లపై అనుమానాలు వ్యక్తమవుతున్నాయని పేర్కొన్నారు. మిగిలిన ఓట్ల విషయంలోనూ ఎందుకు ప్రశ్నార్థక గుర్తులు పెట్టారో ఈసీ వివరించాలని కోరారు.
ఓటర్ల జాబితా పరిశీలనలో భాగంగా 2002 నాటి ఓటింగ్ వివరాలను ఆధారంగా చేసుకోవడం వల్ల అనేక మంది ఇబ్బందులు ఎదుర్కొంటున్నారని ఆయన అన్నారు. కొందరు పాత వివరాలకు సంబంధించిన పత్రాలు సమర్పించలేకపోతున్నారని, అలాంటి కారణాలతో వారి ఓటు హక్కును తొలగించడం సరికాదని స్పష్టం చేశారు. అర్హత ఉన్న ప్రతి పౌరుడికి ఓటు హక్కు ఉండేలా చర్యలు తీసుకోవాలని డిమాండ్ చేశారు.
కాంగ్రెస్ పార్టీ తరఫున 35 వేల మంది బూత్ లెవల్ ఏజెంట్లను నియమించామని మహేశ్కుమార్ గౌడ్ తెలిపారు. అయితే ఎన్నికల సంఘం లెక్కల్లో మాత్రం 13,100 మంది మాత్రమే ఉన్నట్లు చూపిస్తున్నారని ఆరోపించారు. ఓటర్ల జాబితా పరిశీలనలో పార్టీ ప్రతినిధుల పాత్రను తగ్గించడం వల్ల సామాన్య ఓటర్లకు నష్టం జరుగుతుందని పేర్కొన్నారు.
ప్రజాస్వామ్యంలో ఓటు హక్కు అత్యంత కీలకమైనదని, ఏ కారణంతోనైనా అర్హులైన వ్యక్తుల ఓట్లు తొలగించకూడదని మహేశ్కుమార్ గౌడ్ అన్నారు. ఓటర్ల జాబితాలో తప్పులు ఉంటే వాటిని సరిదిద్దేందుకు ప్రజలకు తగినంత సమయం ఇవ్వాలని కోరారు. తెలంగాణలో ఎస్ఐఆర్ ప్రక్రియకు మరింత గడువు ఇవ్వాలని ఎన్నికల సంఘాన్ని డిమాండ్ చేశారు.
అర్హులైన ప్రతి ఒక్కరినీ ఓటర్ల జాబితాలో కొనసాగిస్తూ, అనర్హులైన ఓట్లపై నిబంధనల ప్రకారం చర్యలు తీసుకోవాలని ఆయన సూచించారు. ప్రజల ఓటు హక్కును కాపాడేందుకు కాంగ్రెస్ పార్టీ పోరాడుతుందని స్పష్టం చేశారు. ఓట్ల తొలగింపు విషయంలో ఎన్నికల సంఘం పారదర్శకంగా వ్యవహరించి ప్రతి అనుమానానికి సమాధానం ఇవ్వాలని మహేశ్కుమార్ గౌడ్ డిమాండ్ చేశారు.
