ప్రతిపక్షం, ఆగస్టు 14: హైదరాబాద్ నడిబొడ్డున మహాత్మా జ్యోతిబా పూలే, సావిత్రిబాయి పూలే దంపతుల విగ్రహాలను ప్రతిష్ఠించడం చారిత్రాత్మక ఘట్టమని మంత్రి పొన్నం ప్రభాకర్ అన్నారు. ఈ విగ్రహాలు నేటి యువతకు సామాజిక న్యాయం, సమానత్వం, విద్య ప్రాధాన్యతను గుర్తుచేసే స్ఫూర్తిదాయక చిహ్నాలుగా నిలుస్తాయని పేర్కొన్నారు. పూలే దంపతులు, డాక్టర్ బీఆర్ అంబేద్కర్ ఆశయాలను ముందుకు తీసుకెళ్లేందుకు ప్రభుత్వం కట్టుబడి ఉందన్నారు.
ఈ సందర్భంగా మంత్రి మాట్లాడుతూ.. ఇది కేవలం విగ్రహాల ఆవిష్కరణ కార్యక్రమం కాదని, వారి ఆశయాలకు ఇస్తున్న గౌరవానికి, సామాజిక న్యాయంపై ప్రభుత్వం ఇస్తున్న హామీకి ప్రతీక అని అన్నారు. ఈ కార్యక్రమం సాకారం కావడంలో ముఖ్యమంత్రి రేవంత్రెడ్డి, ఉప ముఖ్యమంత్రి భట్టి విక్రమార్క, మంత్రివర్గ సహచరులు, ప్రజాప్రతినిధులు, బీసీ సంఘాలు, సామాజికవేత్తల సహకారం ఉందని తెలిపారు.
సామాజిక న్యాయమే కాంగ్రెస్ ప్రభుత్వ లక్ష్యం
కులం, మతం, లింగం, ఆర్థిక పరిస్థితి ఆధారంగా ఎలాంటి వివక్ష ఉండకూడదని పొన్నం ప్రభాకర్ అన్నారు. మహిళలకు విద్యతో పాటు ఆర్థిక స్వావలంబన కల్పించాల్సిన అవసరం ఉందన్నారు. మహాత్మా జ్యోతిబా పూలే, సావిత్రిబాయి పూలే ఆశయాలను కేవలం స్మరించుకోవడం కాకుండా వాటిని పాలనలో ఆచరణలో పెట్టడమే కాంగ్రెస్ ప్రజా ప్రభుత్వ లక్ష్యమని స్పష్టం చేశారు.
వెనుకబడిన తరగతుల సామాజిక, ఆర్థిక స్థితిగతులను శాస్త్రీయంగా అర్థం చేసుకునేందుకు బీసీ కులగణన చేపట్టడం సామాజిక న్యాయ దిశగా కీలక అడుగని పేర్కొన్నారు. సామాజిక న్యాయం కోసం కులగణన నిర్వహించి తెలంగాణ దేశానికి ఆదర్శంగా నిలిచిందని అన్నారు.
కామారెడ్డి డిక్లరేషన్ అమలుకు చర్యలు
కామారెడ్డి డిక్లరేషన్లో పేర్కొన్న అంశాల అమలుపై ప్రభుత్వం నిరంతరం చర్చిస్తూ ముందుకు సాగుతోందని మంత్రి తెలిపారు. బీసీ వర్గాల అభ్యున్నతి, సామాజిక న్యాయానికి సంబంధించిన అంశాలను ప్రాధాన్యంగా తీసుకుని అమలు దిశగా చర్యలు కొనసాగుతున్నాయని చెప్పారు.
అదేవిధంగా ఆత్మగౌరవ భవనాల నిర్మాణానికి ఉప ముఖ్యమంత్రి భట్టి విక్రమార్క నిధులు కేటాయించారని, మిగిలిన పనులను కూడా త్వరలో పూర్తి చేస్తామని వెల్లడించారు.
200 ఏళ్ల క్రితమే వివక్షపై పోరాటం
దాదాపు 200 ఏళ్ల క్రితం సమాజంలో కుల వివక్ష, లింగ వివక్ష, మూఢనమ్మకాలు, బాల్య వివాహాలు, వితంతువులపై వివక్ష తీవ్రంగా ఉన్న సమయంలో మహాత్మా జ్యోతిబా పూలే వాటిని ప్రశ్నించారని పొన్నం ప్రభాకర్ గుర్తుచేశారు. సమాజాన్ని మార్చేందుకు విద్యే అత్యంత శక్తివంతమైన ఆయుధమని ఆయన విశ్వసించారని తెలిపారు.
అణగారిన వర్గాలకు విద్య, గౌరవం, సమాన అవకాశాలు కల్పించేందుకు జ్యోతిబా పూలే జీవితాంతం పోరాడారని, సత్యశోధక సమాజం ద్వారా సమానత్వం, సామాజిక చైతన్యం కోసం ఉద్యమించారని చెప్పారు.
మహిళా విద్యకు సావిత్రిబాయి పూలే కృషి
సావిత్రిబాయి పూలే భారతదేశ మహిళా విద్యా ఉద్యమానికి మహత్తర సేవలు అందించారని మంత్రి పేర్కొన్నారు. మహిళలు చదువుకోకూడదనే అప్పటి సామాజిక భావజాలాన్ని ఆమె ధైర్యంగా ఎదిరించి ఉపాధ్యాయురాలిగా మారారని తెలిపారు.
బాలికలకు విద్య అందించేందుకు ఎదురైన అవమానాలు, ప్రతిఘటనలను సైతం లెక్కచేయకుండా ముందుకు సాగారని, మహిళలకు విద్య అందించడంలో ఆమె చేసిన కృషి తరతరాలకు స్ఫూర్తిగా నిలుస్తుందని అన్నారు. ఒక మహిళ చదువుకుంటే ఒక కుటుంబం విద్యావంతమవుతుందనే భావనను సావిత్రిబాయి పూలే ఆచరణలో చూపించారని పేర్కొన్నారు.
పూలే దంపతుల ఆశయాలను ముందుకు తీసుకెళ్లాలి
కుల వివక్ష, అంటరానితనం, లింగ వివక్షకు వ్యతిరేకంగా మహాత్మా జ్యోతిబా పూలే పోరాడారని, మహిళల విద్య, అభ్యున్నతి కోసం సావిత్రిబాయి పూలే విశేష కృషి చేశారని మంత్రి గుర్తుచేశారు. సమాజంలో సమానత్వం నెలకొల్పేందుకు వారు చూపిన మార్గాన్ని నేటి తరం ఆదర్శంగా తీసుకోవాలని సూచించారు.
పూలే దంపతుల ఆశయాలను పాలనలో అమలు చేయడం ద్వారా సామాజిక న్యాయాన్ని మరింత బలోపేతం చేయాలని ప్రభుత్వం లక్ష్యంగా పెట్టుకుందని పొన్నం ప్రభాకర్ తెలిపారు.
బీజేపీపై పొన్నం ప్రభాకర్ విమర్శలు
బీజేపీ పాలనలో రాజ్యాంగాన్ని అవమానించే విధంగా కొన్ని ఘటనలు చోటుచేసుకున్నాయని పొన్నం ప్రభాకర్ విమర్శించారు. కాంగ్రెస్ అధ్యక్షుడు మల్లికార్జున ఖర్గే పాల్గొన్న కార్యక్రమం అనంతరం ఆ ప్రదేశాన్ని శుద్ధి చేశారంటూ ఆరోపించారు. ఇది వారి నియంతృత్వ ధోరణికి నిదర్శనమని వ్యాఖ్యానించారు.
“కాంగ్రెస్ పార్టీ సామాజిక న్యాయానికి చాంపియన్” అని మంత్రి పేర్కొన్నారు. పూలే, సావిత్రిబాయి పూలే, అంబేద్కర్ వంటి మహనీయుల ఆశయాలను ముందుకు తీసుకెళ్లడంతో పాటు సమాజంలోని అన్ని వర్గాలకు సమాన అవకాశాలు కల్పించడమే ప్రభుత్వ లక్ష్యమని స్పష్టం చేశారు.
