ప్రతిపక్షం, ఆగస్టు 21: ఏడు దశాబ్దాలకు పైగా సాగిన సుదీర్ఘ సినీ ప్రయాణంలో ప్రముఖ నటి షావుకారు జానకి ఎన్నో అరుదైన ఘనతలను సొంతం చేసుకున్నారు. నటిగా మాత్రమే కాకుండా.. అప్పటి ప్రముఖ రాజకీయ నాయకులు, ముఖ్యమంత్రులుగా పనిచేసిన దిగ్గజ నటులతో కలిసి తెరపై కనిపించిన ప్రత్యేక గుర్తింపు ఆమెకు ఉంది. తాజాగా 94 ఏళ్ల వయసులో ఆమె కన్నుమూయడంతో సినీ అభిమానులు ఆమెకు సంబంధించిన అరుదైన విషయాలను గుర్తు చేసుకుంటున్నారు.
1950లో విడుదలైన ‘షావుకారు’ చిత్రంతో కథానాయికగా సినీ రంగ ప్రవేశం చేసిన జానకికి ఆ సినిమా పేరే ఇంటిపేరుగా మారిపోయింది. ఈ చిత్రంలో ఆమె అప్పటి అగ్ర కథానాయకుడు, ఉమ్మడి ఆంధ్రప్రదేశ్ మాజీ ముఖ్యమంత్రి ఎన్టీ రామారావుతో కలిసి నటించారు. ఆ తర్వాత తెలుగు, తమిళ చిత్ర పరిశ్రమల్లో వరుస అవకాశాలు అందుకుంటూ తనకంటూ ప్రత్యేక గుర్తింపు సంపాదించుకున్నారు.
తమిళనాడులో ప్రముఖ నటుడు, మాజీ ముఖ్యమంత్రి ఎంజీ రామచంద్రన్తోనూ షావుకారు జానకి పలు చిత్రాల్లో కలిసి నటించారు. ‘ఒళి విలక్కు’, పణం పదైతవన్’ వంటి సినిమాల్లో వీరిద్దరూ కలిసి తెరపై కనిపించారు. ఆ కాలంలో ఎంజీఆర్కు ఉన్న భారీ అభిమాన గణంలో జానకి కూడా తన నటనతో ప్రత్యేక గుర్తింపు పొందారు.
అలాగే తమిళనాడు మాజీ ముఖ్యమంత్రి, ప్రముఖ నటి జయలలితతోనూ షావుకారు జానకి కలిసి నటించారు. ‘ఒళి విలక్కు’, ‘నీతి’, ‘మోటార్ సుందరం పిళ్లై’ వంటి చిత్రాల్లో ఇద్దరూ కలిసి ప్రేక్షకులను అలరించారు. ఒకవైపు రాజకీయాల్లో కీలక స్థానాలకు ఎదిగిన నటీనటులతో కలిసి నటిస్తూ.. మరోవైపు తన నటనా ప్రస్థానాన్ని కొనసాగించడం జానకి కెరీర్లో ప్రత్యేకమైన అంశంగా నిలిచింది.
ఇక తమిళనాడు మాజీ ముఖ్యమంత్రి, రచయిత ఎం. కరుణానిధి అందించిన కథలు, స్క్రీన్ప్లేలకు సంబంధించిన పలు చిత్రాల్లోనూ జానకి నటించారు. దీంతో తమిళ సినీ, రాజకీయ రంగాల్లోని అనేక దిగ్గజాలతో ఆమెకు అనుబంధం ఏర్పడింది.
సినిమా రంగంలోకి వచ్చిన తొలి రోజుల్లోనే అగ్ర కథానాయకులతో కలిసి నటించిన జానకి.. ఆ తర్వాత క్యారెక్టర్ ఆర్టిస్ట్గా, తల్లి పాత్రల్లోనూ తనదైన ముద్ర వేశారు. తెలుగు, తమిళ భాషల్లో వందలాది చిత్రాల్లో నటించి ప్రేక్షకుల హృదయాల్లో చిరస్థాయిగా నిలిచారు. ఆమె నటించిన అనేక సినిమాలు ఇప్పటికీ సినీ అభిమానులకు గుర్తుండిపోయాయి.
షావుకారు జానకి సుదీర్ఘ సినీ ప్రస్థానంలో ఎన్నో విభిన్న పాత్రలు పోషించారు. మూడు తరాల నటీనటులతో కలిసి పనిచేసిన ఆమె.. తన సహజ నటన, హావభావాలు, డైలాగ్ డెలివరీతో ప్రత్యేక గుర్తింపు పొందారు. ప్రముఖ నటులుగా ఉన్నవారిలో కొందరు తర్వాత ముఖ్యమంత్రులుగా ఎదిగినా.. వారితో కలిసి తెరపై నటించిన నటిగా జానకి ప్రయాణం ప్రత్యేకంగా నిలిచింది.
