ప్రతిపక్షం, జూలై 14, హైదరాబాద్: షాబాద్లో జరిగిన కుటుంబ హత్యల కేసులో నిందితుడిగా భావిస్తున్న రాజ్కుమార్ మృతదేహానికి పోస్టుమార్టం ప్రక్రియ పూర్తయింది. అయితే, అతడి మృతదేహాన్ని స్వీకరించేందుకు కుటుంబ సభ్యులు పూర్తిగా నిరాకరించారు. రాజ్కుమార్తో తమకు ఎలాంటి సంబంధం లేదని వారు పోలీసులకు రాతపూర్వకంగా తెలియజేశారు.
దీంతో పోలీసులు మున్సిపల్ అధికారుల సహకారంతో చేవెళ్ల శ్మశానవాటికలో రాజ్కుమార్కు అంత్యక్రియలు నిర్వహించారు. కుటుంబ సభ్యులు ఎవరూ హాజరు కాకపోవడంతో అధికారులే అంత్యక్రియల బాధ్యతలు చేపట్టారు.
షాబాద్లో జరిగిన దారుణ ఘటన అనంతరం రాజ్కుమార్ పురుగుల మందు తాగి ఆత్మహత్య చేసుకున్నట్లు పోలీసులు ప్రాథమికంగా నిర్ధారించారు. ఈ ఘటన రాష్ట్రవ్యాప్తంగా తీవ్ర సంచలనం సృష్టించగా, నిందితుడి మృతదేహాన్ని కుటుంబ సభ్యులే స్వీకరించకపోవడం చర్చనీయాంశంగా మారింది. పోలీసులు కేసుకు సంబంధించిన అన్ని కోణాల్లో దర్యాప్తు కొనసాగిస్తున్నారు.
