*ప్రతి కూలీకి పని కల్పించడమే లక్ష్యం – పారదర్శకతే మా విధానం – సర్పంచ్ గాలంక రాంబాబు.
*పారదర్శకతే మా ఆయుధం – అవకతవకలకు తావు లేదు – ఎంపీడీఓ యాదగిరి.
*ఉపాధి పనులు గ్రామాభివృద్ధికి పునాది – నాణ్యతా ప్రమాణాలు పాటించాలని ఆదేశం
*క్షేత్రస్థాయిలో మస్టర్ రోల్స్ పరిశీలన – కూలీలతో ముఖాముఖి .
*కేంద్ర ప్రభుత్వ ప్రతిష్టాత్మక VB-G RAM G పథకం అమలుపై క్షేత్రస్థాయిలో తనిఖీలు.
ప్రతిపక్షం చండూరు అక్టోబర్ 30 : చండూరు మండలం పడమటితాళ్ల గ్రామంలో కేంద్ర, రాష్ట్ర ప్రభుత్వాల అత్యంత ప్రతిష్టాత్మక గ్రామీణ ఉపాధి పథకమైన VB-G RAM G (వికసిత్ భారత్ – గ్యారెంటీ ఫర్ రోజ్‌గార్ అండ్ ఆజీవికా మిషన్) పనుల్లో వేగం పెంచే దిశగా అధికార యంత్రాంగం కదిలింది. శుక్రవారం గ్రామ పరిధిలో జరుగుతున్న వివిధ అభివృద్ధి, ఉపాధి హామీ పనులను అధికారులు, ప్రజాప్రతినిధులు సంయుక్తంగా క్షేత్రస్థాయిలో నిశితంగా పరిశీలించారు.గ్రామ సర్పంచ్ గాలంక రాంబాబు, మండల పరిషత్ అభివృద్ధి అధికారి (ఎంపీడీఓ) బి. యాదగిరి సంయుక్త ఆధ్వర్యంలో ఉప సర్పంచ్, ఎంపీఓ, పంచాయతీ కార్యదర్శి, మరియు ఫీల్డ్ అసిస్టెంట్‌ల బృందం గ్రామంలోని పలు వార్డుల్లో పర్యటించింది. పనుల పురోగతిని, నాణ్యతా ప్రమాణాలను కొలతలతో సహా పరిశీలించి, అక్కడ పనిచేస్తున్న ఉపాధి కూలీలతో నేరుగా మాట్లాడి వారి సమస్యలు, ఇబ్బందులను అడిగి తెలుసుకున్నారు. మస్టర్ రోల్స్, వర్క్ సైట్ సౌకర్యాలను కూడా తనిఖీ చేశారు.
ఈ సందర్భంగా సర్పంచ్ గాలంక రాంబాబు, ఎంపీడీఓ బి. యాదగిరి మాట్లాడుతూ.. గ్రామీణ ప్రాంతాల్లోని నిరుపేద కూలీల ఆర్థికాభివృద్ధికి, వారి జీవన ప్రమాణాలు పెంపొందేందుకు VB-G RAM G వంటి ఉపాధి పథకాలు ఎంతో కీలకమన్నారు. ఈ పథకం కేవలం ఉపాధి కల్పన మాత్రమే కాదు, గ్రామాభివృద్ధికి పునాది అని అన్నారు.ప్రభుత్వం ప్రతిష్టాత్మకంగా అమలు చేస్తున్న ఈ పథకం లక్ష్యం నూటికి నూరు శాతం నెరవేరాలని, పనుల్లో ఎలాంటి అలసత్వం, నిర్లక్ష్యం వహించినా సహించేది లేదని క్షేత్రస్థాయి సిబ్బందికి గట్టిగా హెచ్చరించారు. పూర్తి నాణ్యతా ప్రమాణాలతో, పారదర్శకతతో, వేగవంతంగా పనులు పూర్తి చేయాలని ఆదేశాలు జారీ చేశారు. అర్హులైన ప్రతి ఒక్క కూలీకి నిరంతరం పని కల్పించడమే తమ ప్రధాన లక్ష్యమని, నిబంధనల ప్రకారం పనుల నిర్వహణలో ఎక్కడా అవకతవకలకు, అవినీతికి తావులేకుండా చూడాలని స్పష్టం చేశారు.ఈ క్షేత్రస్థాయి పర్యటనలో గ్రామ ఉప సర్పంచ్, ఎంపీఓ, పంచాయతీ కార్యదర్శి, ఫీల్డ్ అసిస్టెంట్ మరియు పెద్ద సంఖ్యలో ఉపాధి హామీ కూలీలు, గ్రామస్తులు పాల్గొన్నారు.
