ప్రతిపక్షం, వెబ్‌డెస్క్: మోసపూరిత హామీలిచ్చి గెలిచారని.. కాంగ్రెస్‌పై మాజీ మంత్రి హరీష్ రావు ఫైరయ్యారు. గ్రాడ్యుయేట్ ఎన్నికల ప్రచారంలో భాగంగా సత్తుపల్లిలో నిర్వహించిన సభలో హరీష్ రావు పాల్గొన్నారు. అనంతరం ఆయన మాట్లాడుతూ.. కాంగ్రెస్ ప్రభుత్వం ఉద్యోగులను, నిరుద్యోగులను మోసం చేసింది. ఆరు గ్యారంటీలను వంద రోజుల్లో అమలు చేస్తామని మోసపూరిత హామీలిచ్చి గెలిచారు. గెలిచాక మోసం చేశారని.. ఒక్క హామీ కూడా అమలు కాలేదు. హామీలను అమలు చేయకుండా మొద్ద నిద్రపోతున్న కాంగ్రెస్‌ను తట్టి లేపాలంటే ఆ పార్టీని ఓడగొట్టాలని పిలుపునిచ్చారు. అధికారంలోకి వచ్చి ఆరు నెలలై ఒక్క జాబ్ నోటిఫికేషన్ లేదు. జాబ్ కాలెండర్ లేదు. 2 లక్షలు ఉద్యోగాలు భర్తీ చేసేది ఇలాగేనా..? అని ఆయన ప్రశ్నించారు. నిరుద్యోగులకు 4 వేల భృతి, విద్యార్థులకు 5 లక్షల భరోసా కార్డు, అమ్మాయిలకు ఉచిత స్కూటీ.. ఒక్క హామీ అమలు కాలేదని గుర్తు చేశారు. ఉద్యోగులకు 4 డీఏలు పెండింగులో ఉన్నాయి. డీఏపై కేబినెట్లో నిర్ణయం తీసుకుంటామని చెప్పిన రేవంత్ రెడ్డి మాటమీద నిలబడలేదు. ఉపాధాయ్యులపై లాఠీ చార్జీ చేశారు. ఇంతకన్నా అమానుషం ఉంటుందా..? అని మండిపడ్డారు.
నిరుద్యోగ భృతి ఇస్తామని కాంగ్రెస్ తన ఎన్నికల మేనిఫెస్టోలో చెప్పింది. రాహుల్ గాంధీ, రేవంత్ రెడ్డి, ప్రియాంకా స్వయంగా చెప్పారు. కానీ అలాంటి హామీనే ఇవ్వలేదని అసెంబ్లీ సాక్షిగా అబద్ధాలాడుతున్నారు. మహిళలకు రూ. 2500, వడ్లకు రూ. 500 బోనస్, కౌలు రైతులకు రూ. 15 వేలు, రైతు భరోస రూ. 15 వేలు, వ్యవసాయ కూలీలకు రూ. 12 వేలు, పింఛన్ రూ. 4వేలు, రైతులకు రూ. 2 లక్షణ రుణమాఫీ.. వీటిలో ఒక్క హామీ కూడా అమలు కాలేదు. వడ్లకు 500 బోనస్ ఇస్తామని మీ మేనిఫెస్టోలో చెప్పి.. ఇప్పుడు సన్నవడ్లకే అని సిగ్గులేకుండా రైతులను మోసం చేశారన్నారు. విద్యావంతుడైన రాకేశ్ రెడ్డిని గెలిపించి కాంగ్రెస్‌కు గుణపాఠం నేర్పాలి. హైదరాబాద్‌ను మరో పదేళ్లు ఉమ్మడి రాజధానిగా చేసేందు బీజేపీ కుట్ర చేస్తోంది. మన హైదరాబాద్ మనకే దక్కాలంటే అందరూ బీఆర్ఎస్ పార్టీకే ఓటు వేయాలి. తెలంగాణ హక్కుల కోసం పోరాడే ఏకైక పార్టీ బీఆర్ఎస్. కాంగ్రెస్, బీఆర్ఎస్ ద్రోహం వల్లే ఏడు మండలాలు ఏపీకి వెళ్లాయి. ఖమ్మం జిల్లా విజ్ఞులు, మేధావులు, విద్యావంతులు, నిరుద్యోగులు, ఉద్యోగులు రాకేశ్ రెడ్డికి ఓటు వేయండి. మీ తరఫున ఆయన శాసన మండలిలో పోరాడతారని పిలుపునిచ్చారు.
