ఏఐసీసీ జాబితా విడుదల
హైదరాబాద్, ప్రతిపక్షం స్టేట్బ్యూరో:
కాంగ్రెస్ అధిష్టానవర్గం త్వరలో మూడు రాష్ట్రాలలో జరగనున్న రాజ్యసభ ఎన్నికలకు అభ్యర్థులను ప్రకటించింది. ముఖ్యంగా తెలంగాణ నుంచి మాజీ మంత్రి రేణుకాచౌదరితో పాటు యువజన కాంగ్రెస్ నాయకుడు ఎం.అనీల్కుమార్ యాదవ్ను ప్రకటించింది. రాజ్యసభ అభ్యర్థిత్వం కోసం పలువురు నేతలు ప్రయత్నించారు. బుధవారంనాడు ఏఐసీసీ ప్రధాన కార్యదర్శి కేసీ వేణుగోపాల్ ఈ మేరకుజాబితాను విడుదల చేశారు. అలాగే కర్నాటక నుంచి అజయ్మాకెన్, డాక్టర్ సయ్యద్ నాసిర్ హుస్సేన్చ జి.సి.చంద్రశేఖర్ను ఎంపిక చేశారు. మధ్య ప్రదేశ్నుంచి ఆశోక్సింగ్ను ఎంపిక చేశారు. అయితే తెలంగాణ నుంచి యువజన కాంగ్రెస్కు చెందిన యువకుడు అనీల్కుమార్ను ఎంపిక చేయడంతో యువతకు కాంగ్రెస్పార్టీ గ్రీన్సిగ్నల్ ఇచ్చినట్లైంది. ఇటీవల ఎమ్మెల్సీ ఎన్నికల్లో విద్యార్థి నాయకుడు బల్మూరు వెంకట్కు అవకాశం కల్పించిన రాహుల్, రాజ్యసభకు అనీల్కుమార్ను అవకాశం కల్పించడం విశేషం. రాజ్యసభ సభ్యత్వం కల్పించినందుకు ఏఐసీసీ అధినాయకురాలు సోనియాగాంధీకి, ఏఐసీసీ అధ్యక్షుడు మల్లికార్జున ఖర్గేతో పాటు రాహుల్గాంధీ, సీఎం రేవంత్కు రేణుకాచౌదరి, అనీల్కుమార్ యాదవ్ ప్రత్యేకంగా కృతజ్ఞతలు తెలిపారు.
