ప్రతిపక్షం, సెప్టెంబర్ 22, హైదరాబాద్: దళితులు, గిరిజనులు, ఆదివాసీల అభివృద్ధి, సంక్షేమానికి ప్రభుత్వం ప్రాధాన్యత ఇస్తోందని ముఖ్యమంత్రి రేవంత్ రెడ్డి తెలిపారు. విద్య, ఉపాధి, నైపుణ్యాభివృద్ధి ద్వారానే అట్టడుగు వర్గాల జీవితాల్లో శాశ్వత మార్పు తీసుకురాగలమని పేర్కొన్నారు. ఎస్సీ, ఎస్టీలపై అణిచివేత, వివక్షకు వ్యతిరేకంగా రాజకీయాలకు అతీతంగా అందరూ కలిసి పనిచేయాల్సిన అవసరం ఉందని పిలుపునిచ్చారు.
ఎస్సీ, ఎస్టీలపై అత్యాచారాల నిరోధక చట్టం అమలుపై ముఖ్యమంత్రి అధ్యక్షతన డాక్టర్ బీఆర్ అంబేద్కర్ రాష్ట్ర సచివాలయంలో రాష్ట్రస్థాయి ఉన్నత నిఘా, పర్యవేక్షణ కమిటీ సమావేశం జరిగింది. తెలంగాణ రాష్ట్రం ఏర్పడిన తర్వాత ఈ చట్టం అమలుపై ముఖ్యమంత్రి అధ్యక్షతన రాష్ట్రస్థాయి సమావేశం జరగడం ఇదే తొలిసారి అని అధికారులు తెలిపారు. ఉమ్మడి ఆంధ్రప్రదేశ్లో 2013 ఫిబ్రవరి 11న అప్పటి ముఖ్యమంత్రి అధ్యక్షతన ఇలాంటి రాష్ట్రస్థాయి సమావేశం జరిగినట్లు ప్రభుత్వం పేర్కొంది.
సమావేశంలో రాష్ట్రంలో ఎస్సీ, ఎస్టీలపై అత్యాచారాల నిరోధక చట్టం అమలు తీరు, నమోదైన కేసులు, దర్యాప్తు పురోగతి, విచారణ, కేసుల పరిష్కారం, బాధితులకు అందుతున్న సహాయం, నష్టపరిహారం, పునరావాస చర్యలపై సుదీర్ఘంగా సమీక్షించారు. చట్టంపై ప్రజల్లో అవగాహన పెంచేందుకు చేపడుతున్న కార్యక్రమాలతో పాటు కేసుల విచారణ కోసం ఏర్పాటు చేసిన ప్రత్యేక న్యాయస్థానాలు, మొబైల్ న్యాయస్థానాల పనితీరుపైనా చర్చించారు.
గత ఐదేళ్లలో రాష్ట్రంలో ఎస్సీ, ఎస్టీలపై నమోదవుతున్న అత్యాచార కేసులు క్రమంగా తగ్గుముఖం పట్టాయని అధికారులు సమావేశంలో వివరించినట్లు ప్రభుత్వం తెలిపింది. అయితే కొన్ని జిల్లాల్లోని 73 గ్రామాల్లో ఎక్కువ సంఖ్యలో కేసులు నమోదవుతున్నట్లు అధికారులు నివేదించారు. ఈ ప్రాంతాలపై పోలీసు శాఖ ప్రత్యేక దృష్టి పెట్టాల్సిన అవసరం ఉందని ముఖ్యమంత్రి సూచించారు. ఆయా ప్రాంతాల్లో పరిస్థితిని నిరంతరం పర్యవేక్షిస్తూ, చట్టం అమలులో ఎలాంటి లోపాలు లేకుండా చూడాలని అధికారులను ఆదేశించారు.
జిల్లా స్థాయి విజిలెన్స్, పర్యవేక్షణ కమిటీ సమావేశాలు క్రమం తప్పకుండా నిర్వహించేలా చర్యలు తీసుకోవాలని ముఖ్యమంత్రి రేవంత్ రెడ్డి అధికారులను ఆదేశించారు. కేసులు నమోదైన తర్వాత దర్యాప్తు, విచారణ ప్రక్రియ వేగంగా సాగడంతో పాటు బాధితులకు ప్రభుత్వం నుంచి అందాల్సిన సహాయం ఆలస్యం కాకుండా చూడాలని సూచించారు. చట్టం ఉద్దేశం కేవలం కేసులు నమోదు చేయడం మాత్రమే కాకుండా బాధితులకు రక్షణ, న్యాయం, పునరావాసం కల్పించడమని స్పష్టం చేశారు.
ఎస్సీ, ఎస్టీలపై అత్యాచార ఘటనల విషయంలో ప్రభుత్వం మానవీయ కోణంతో స్పందిస్తోందని ముఖ్యమంత్రి పేర్కొన్నారు. బాధితులకు సకాలంలో నష్టపరిహారం, సహాయం, పునరావాసం అందేలా చూడాలని ఆదేశించారు. నష్టపరిహారం విడుదలకు బడ్జెట్ పరిమితులు అడ్డంకిగా మారకుండా అవసరమైన నిధులను గ్రీన్ ఛానల్ ద్వారా విడుదల చేయాలని అధికారులకు సూచించారు. బాధిత కుటుంబాలకు తక్షణ సహాయం అందించడం ద్వారా వారు ఆర్థికంగా, సామాజికంగా నిలదొక్కుకునేలా ప్రభుత్వం అండగా ఉండాలని అన్నారు.
ఇటీవల షాబాద్లో జరిగిన హత్యల కేసుతో పాటు తుక్కుగూడలో నర్సుపై జరిగిన హత్యాచారం కేసును ముఖ్యమంత్రి సమావేశంలో ప్రత్యేకంగా ప్రస్తావించారు. ఈ కేసుల్లో బాధిత కుటుంబాలకు సత్వర న్యాయం అందేలా దర్యాప్తు, విచారణ ప్రక్రియను వేగవంతం చేయాలని అధికారులను ఆదేశించారు. ఇలాంటి ఘటనల్లో బాధితులకు ప్రభుత్వం నుంచి అందాల్సిన సహాయం, నష్టపరిహారం, పునరావాస చర్యలు ఆలస్యం కాకుండా చూడాలని స్పష్టం చేశారు.
అణగారిన వర్గాల అభ్యున్నతి కోసం ప్రభుత్వం చిత్తశుద్ధితో పనిచేస్తోందని ముఖ్యమంత్రి పేర్కొన్నారు. మాజీ ప్రధానమంత్రి ఇందిరా గాంధీ దళితులు, గిరిజనులు, పేదల సంక్షేమానికి ప్రాధాన్యత ఇచ్చారని ఆయన ప్రస్తావించారు. ఆమె స్ఫూర్తితోనే ప్రజా ప్రభుత్వం పనిచేస్తోందని చెప్పారు. జనాభా దామాషా ప్రకారం బడ్జెట్లో నిధుల కేటాయింపులకు ప్రాధాన్యత ఇస్తున్నామని ముఖ్యమంత్రి వివరించారు.
రాష్ట్రంలో ఎస్సీ జనాభా దాదాపు 16 శాతం ఉంటే, ఇందిరమ్మ ఇళ్ల కేటాయింపుల్లో ఎస్సీ వర్గాలకు 31 శాతం లబ్ధిదారుల వాటా ఉందని ముఖ్యమంత్రి తెలిపారు. అదేవిధంగా ఎస్టీ జనాభా సుమారు 10 శాతం ఉండగా, వారికి 17 శాతం ఇళ్లు మంజూరు చేసినట్లు వివరించారు. అట్టడుగు వర్గాలకు సంక్షేమ పథకాల ప్రయోజనాలు మరింత విస్తృతంగా అందేలా ప్రభుత్వం చర్యలు తీసుకుంటోందని పేర్కొన్నారు.
రాష్ట్రంలో 27.5 లక్షల మంది విద్యార్థులకు నర్సరీ నుంచి 12వ తరగతి వరకు అల్పాహారం అందిస్తున్నామని ముఖ్యమంత్రి తెలిపారు. విద్యార్థులకు పౌష్టికాహారం అందించడంతో పాటు చదువుపై వారి దృష్టి నిలిపేలా ఈ కార్యక్రమం ఉపయోగపడుతుందని చెప్పారు. అదేవిధంగా రాష్ట్రంలో 3.48 కోట్ల మందికి సన్నబియ్యం పంపిణీ చేయడం ద్వారా పేద, దళిత, గిరిజన వర్గాలకు ఆహార భద్రత కల్పించేందుకు ప్రభుత్వం చర్యలు తీసుకుంటోందని వివరించారు.
అయితే సంక్షేమ పథకాలతో పాటు విద్యకే అత్యంత ప్రాధాన్యత ఇవ్వాల్సిన అవసరం ఉందని ముఖ్యమంత్రి రేవంత్ రెడ్డి స్పష్టం చేశారు. అట్టడుగు వర్గాల పిల్లలను చదువు వైపు తీసుకెళ్లకుండా సామాజిక సమస్యలకు శాశ్వత పరిష్కారం సాధ్యం కాదని పేర్కొన్నారు. పిల్లలను విద్యతో పాటు క్రీడల వైపు కూడా ప్రోత్సహించాలని తల్లిదండ్రులు, ప్రజాప్రతినిధులు, అధికారులు కలిసి పనిచేయాలని సూచించారు.
విద్య, ఉపాధి, నైపుణ్యాభివృద్ధి ద్వారా దళితులు, గిరిజనులు, ఆదివాసీలకు మెరుగైన అవకాశాలు కల్పించాల్సిన అవసరం ఉందని ముఖ్యమంత్రి తెలిపారు. కేవలం ఆర్థిక సహాయం అందించడం కంటే విద్య, నైపుణ్యం, ఉపాధి అవకాశాల ద్వారా కుటుంబాలు శాశ్వతంగా అభివృద్ధి చెందేలా చర్యలు తీసుకోవడం ముఖ్యమని పేర్కొన్నారు. ఈ దిశగా ప్రభుత్వ శాఖలు సమన్వయంతో పనిచేయాలని సూచించారు.
దళితులు, గిరిజనులు, ఆదివాసీల అభివృద్ధి విషయంలో రాజకీయాలకు అతీతంగా అందరూ కలిసి పనిచేయాలని ముఖ్యమంత్రి పిలుపునిచ్చారు. ఈ వర్గాల హక్కులు, రక్షణ, విద్య, ఉపాధి, సంక్షేమం కోసం ప్రభుత్వం అవసరమైన సహకారం అందించేందుకు సిద్ధంగా ఉందని తెలిపారు. సమాజంలో అణిచివేత, వివక్షకు తావులేకుండా ప్రతి ఒక్కరికీ సమాన అవకాశాలు లభించేలా చర్యలు తీసుకోవాల్సిన బాధ్యత అందరిపైనా ఉందని అన్నారు.
ఈ సమావేశంలో ఉప ముఖ్యమంత్రి మల్లు భట్టి విక్రమార్క, మంత్రి అడ్లూరి లక్ష్మణ్ కుమార్, ప్రభుత్వ సలహాదారు షబ్బీర్ అలీ, ఎంపీలు మల్లు రవి, బలరాం నాయక్, కడియం కావ్య, ఎమ్మెల్సీ గోరటి వెంకన్న, ఎమ్మెల్యేలు తోట లక్ష్మీకాంతరావు, మేడిపల్లి సత్యం, కవ్వంపల్లి సత్యనారాయణ, వేముల వీరేశం, మందుల సామేల్, మట్టా రాగమయి, వెడ్మ బొజ్జు, మురళి నాయక్ తదితరులు పాల్గొన్నారు.
ప్రభుత్వ ప్రధాన కార్యదర్శి సంజయ్ జాజు, డీజీపీ సీవీ ఆనంద్, రాష్ట్ర ఎస్సీ కమిషన్ ఛైర్మన్ బక్కి వెంకటయ్య, జాతీయ ఎస్సీ కమిషన్ డైరెక్టర్ సునీల్ బాబు, ఎస్సీ కమిషన్ సభ్యులు, వివిధ శాఖల ఉన్నతాధికారులు సమావేశంలో పాల్గొన్నారు. ఎస్సీ, ఎస్టీలపై అత్యాచారాల నిరోధక చట్టం సమర్థవంతంగా అమలయ్యేలా క్షేత్రస్థాయి నుంచి రాష్ట్రస్థాయి వరకు పర్యవేక్షణ వ్యవస్థను మరింత బలోపేతం చేయాలని సమావేశంలో నిర్ణయించినట్లు అధికారులు తెలిపారు.
