ప్రతిపక్షం, నవంబర్ 04: రాహుల్ గాంధీ దేశ ప్రధానమంత్రి కావాలా వద్దా అనేది కేంద్ర హోంమంత్రి అమిత్ షా నిర్ణయించలేరని, దేశ ప్రజలు, ఓటర్లే తుది నిర్ణయం తీసుకుంటారని టీపీసీసీ వర్కింగ్ ప్రెసిడెంట్ జగ్గారెడ్డి తీవ్రస్థాయిలో వ్యాఖ్యానించారు. రాహుల్ గాంధీ ప్రధానమంత్రి కాలేరంటూ అమిత్ షా చేసిన వ్యాఖ్యలపై ఆయన మండిపడ్డారు. ప్రధానమంత్రి పదవి ఎవరి సొంతం కాదని, ప్రజాస్వామ్య వ్యవస్థలో ప్రజల తీర్పే అత్యంత కీలకమని స్పష్టం చేశారు. ప్రజల మద్దతు, విశ్వాసంతోనే ఎవరైనా దేశ అత్యున్నత పదవిని చేపట్టగలరని పేర్కొన్నారు.
స్వాతంత్ర్యం వచ్చిన తర్వాత జవహర్‌లాల్ నెహ్రూ ప్రజల ఆదరణతోనే ప్రధానమంత్రి అయ్యారని జగ్గారెడ్డి గుర్తుచేశారు. 2004లో యూపీఏ కూటమి ఎంపీలంతా సోనియా గాంధీ ప్రధానమంత్రి కావాలని కోరినప్పటికీ, ఆమె ఆ పదవిని స్వీకరించకుండా మన్మోహన్ సింగ్‌కు అవకాశం కల్పించారని చెప్పారు. రాహుల్ గాంధీ కూడా సోనియా నిర్ణయానికి మద్దతు తెలిపారని, నెహ్రూ-గాంధీ కుటుంబం పదవుల కోసం కాకుండా ప్రజా సంక్షేమం కోసం పనిచేసిందని ఆయన పేర్కొన్నారు. ఉపాధి హామీ పథకం వంటి కార్యక్రమాలు ప్రజల జీవితాల్లో కీలక మార్పులు తీసుకొచ్చాయని వివరించారు.
రానున్న లోక్‌సభ ఎన్నికల్లో తెలంగాణలోని మొత్తం 17 ఎంపీ స్థానాల్లో 14 స్థానాలను కాంగ్రెస్ గెలుచుకోవడమే లక్ష్యంగా పార్టీ శ్రేణులు పనిచేస్తాయని జగ్గారెడ్డి ధీమా వ్యక్తం చేశారు. రాహుల్ గాంధీని ప్రధానమంత్రి పీఠంపై కూర్చోబెట్టేందుకు తెలంగాణ కాంగ్రెస్ నాయకులు, కార్యకర్తలు కష్టపడాలని పిలుపునిచ్చారు. రాష్ట్రంలో బీజేపీకి ఆశించిన స్థాయిలో బలం లేదని వ్యాఖ్యానిస్తూ, అమిత్ షా చేసిన వ్యాఖ్యలకు ప్రజలు ఎన్నికల్లో ఓటు ద్వారా సమాధానం చెబుతారని అన్నారు.
బీజేపీ శ్రీరాముడి పేరును రాజకీయ ప్రయోజనాల కోసం ఉపయోగించుకుంటోందని జగ్గారెడ్డి విమర్శించారు. రాముడు చూపిన ధర్మమార్గంలో పాలన సాగించడం లేదని ఆరోపించారు. మహాత్మా గాంధీ ‘రఘుపతి రాఘవ రాజారాం’ భజన చేసిన కాలంలో బీజేపీ ఉనికిలో కూడా లేదని వ్యాఖ్యానించారు. సర్దార్ వల్లభాయ్ పటేల్, జవహర్‌లాల్ నెహ్రూ వంటి కాంగ్రెస్ నాయకుల చరిత్రను తమ రాజకీయ ఖాతాలో వేసుకునేందుకు బీజేపీ ప్రయత్నిస్తోందని మండిపడ్డారు. తెలంగాణను భారత యూనియన్‌లో విలీనం చేసే ప్రక్రియలో నెహ్రూ నాయకత్వంలోని అప్పటి కాంగ్రెస్ ప్రభుత్వ పాత్ర కీలకమని పేర్కొన్నారు. అమిత్ షా వ్యాఖ్యలకు ప్రజాస్వామ్య పద్ధతిలో ప్రజలే సమాధానం చెబుతారని జగ్గారెడ్డి స్పష్టం చేశారు.
