ప్రతిపక్షం, నవంబర్ 07: ప్రపంచవ్యాప్తంగా ఎంతో ప్రతిష్ఠాత్మకంగా భావించే మిస్ యూనివర్స్ అందాల పోటీల్లో భారత్ తరఫున 19 ఏళ్ల యువతి కజియా లిజ్ మేజో ప్రాతినిధ్యం వహించనున్నారు. కేరళ మూలాలున్న కజియా ఈ ఏడాది మిస్ యూనివర్స్ ఇండియా కిరీటాన్ని గెలుచుకుని జాతీయ స్థాయిలో గుర్తింపు తెచ్చుకున్నారు. ఇప్పుడు 75వ మిస్ యూనివర్స్ పోటీల్లో పాల్గొనేందుకు సిద్ధమయ్యారు. చిన్న వయసులోనే మోడలింగ్ రంగంలో తనకంటూ ప్రత్యేక గుర్తింపు తెచ్చుకుంటున్న ఆమె.. మరోవైపు ఉన్నత విద్యను కూడా కొనసాగిస్తున్నారు. అందాల పోటీలతో పాటు చదువుపై కూడా దృష్టి సారిస్తూ తన ప్రతిభను నిరూపించుకుంటున్నారు.
కజియా లిజ్ మేజో అబుదాబిలో జన్మించి అక్కడే పెరిగారు. అయితే ఆమె కుటుంబ మూలాలు కేరళ రాష్ట్రానికి చెందినవి. విదేశాల్లో పెరిగినప్పటికీ భారతీయ సంస్కృతి, సంప్రదాయాలతో తనకున్న అనుబంధాన్ని కొనసాగిస్తున్నారు. మోడలింగ్ రంగంలో ఆసక్తితో అడుగుపెట్టిన ఆమె అంచెలంచెలుగా ఎదుగుతూ ఈ ఏడాది మిస్ యూనివర్స్ ఇండియా పోటీల్లో విజేతగా నిలిచారు. ఈ విజయంతో అంతర్జాతీయ వేదికపై భారత్‌కు ప్రాతినిధ్యం వహించే అవకాశం దక్కించుకున్నారు. ప్రస్తుతం బెంగళూరులో న్యాయశాస్త్రం (లా) చదువుతున్న కజియా.. చదువుతో పాటు మోడలింగ్‌కు సమయం కేటాయిస్తూ ముందుకు సాగుతున్నారు.
ఈసారి జరగనున్న 75వ మిస్ యూనివర్స్ పోటీల్లో ప్రపంచంలోని వివిధ దేశాలకు చెందిన అందాల భామలు పాల్గొననున్నారు. ఈ పోటీల్లో భారత్ తరఫున కజియా తన ప్రతిభ, ఆత్మవిశ్వాసం, వ్యక్తిత్వంతో న్యాయనిర్ణేతలను ఆకట్టుకునేందుకు సిద్ధమవుతున్నారు. ఇప్పటికే అంతర్జాతీయ పోటీలకు అవసరమైన సన్నాహాలు పూర్తి చేసుకుని పోటీ జరిగే ప్రాంతానికి బయల్దేరారు. ఈ నెల 24న కరీబియన్ ప్రాంతంలోని ప్యూర్టో రికోలో మిస్ యూనివర్స్ ఫైనల్ జరగనుంది. ఈ నేపథ్యంలో ఆమె అక్కడికి ప్రయాణమయ్యారు.
మిస్ యూనివర్స్ వేదికపై భారత్‌కు ప్రాతినిధ్యం వహించడం తనకు లభించిన ప్రత్యేక అవకాశంగా కజియా భావిస్తున్నారు. యువ వయసులోనే విద్య, మోడలింగ్ రంగాలను సమన్వయం చేసుకుంటూ అంతర్జాతీయ స్థాయికి చేరుకోవడం ఆమె ప్రయాణంలో ముఖ్యమైన ఘట్టంగా నిలుస్తోంది. ఈ పోటీల్లో కజియా ఎలాంటి ప్రదర్శన ఇస్తారు? భారత్‌కు మరోసారి మిస్ యూనివర్స్ కిరీటం తీసుకొస్తారా? అన్న ఆసక్తి అందరిలోనూ నెలకొంది.
