26,000 rockets fired at Israel: ఇజ్రాయెల్‌పై హమాస్ దాడి చేసి నేటితో ఏడాది పూర్తయిన సందర్భంగా ఇజ్రాయెల్ డిఫెన్స్ ఫోర్స్ కీలక డేటా విడుదల చేసింది. గాజా పట్టణంలో 17,000 మంది హమాస్ ఆపరేటివ్‌లను, ఇజ్రాయెల్‌లో 1,000 మంది ఉగ్రవాదులను అంతం చేసినట్లు ప్రకటించింది. అలాగే ఈ గ్రూపును పూర్తిగా ధ్వంసం చేసినట్లు తెలిపింది. ఇందులో 30 మంది హమాస్ బెటాలియన్‌, 165 మంది కంపెనీ కమాండర్లు ఉన్నారని తెలిపింది. గాజా ప్రాంతంలో 40,300 లక్ష్యాలను లక్ష్యంగా చేసుకుని దాడులు జరిపామని మొత్తం 4,700 సొరంగ ప్రవేశ మార్గాలను ధ్వంసం చేసినట్లు వెల్లడించింది. అక్టోబర్ 8న లెబనాన్‌లోని హెజ్‌బొల్లా వారి మీద దాడులు ప్రారంభించారని ఇజ్రాయెల్ సైన్యం తెలిపింది. ఈ ఎదురు దాడుల్లో మొత్తం 800 మంది చనిపోయినట్లు ప్రకటించింది. ఇదే సమయంలో 11,000 హెజ్‌బొల్లా స్థావరాలను పేల్చేసినట్లు నివేదికలో పేర్కొంది. అదే విధంగా ఈ ఏడాది కాలంలో యుద్ధం ప్రారంభమైనప్పటి నుంచి ఇజ్రాయెల్‌పై 26వేల రాకెట్లు, క్షిపణులు, డ్రోన్‌ల దాడులు జరిగాయి. ఇందులో గాజా నుంచి 13,200, లెబనాన్‌ నుంచి 12,400 దూసుకొచ్చినట్లు తెలిపారు.
