ప్రతిపక్షం, నవంబర్ 10: కొడంగల్ నియోజకవర్గాన్ని అన్ని రంగాల్లో సమగ్రంగా అభివృద్ధి చేయడమే లక్ష్యంగా ముఖ్యమంత్రి ఎ. రేవంత్ రెడ్డి తన పర్యటన మూడో రోజున భారీ అభివృద్ధి కార్యక్రమాలకు శ్రీకారం చుట్టారు. మొత్తం రూ.9,053.48 కోట్ల అంచనా వ్యయంతో చేపట్టనున్న 13 కీలక పనులకు శంకుస్థాపనలు చేశారు. రహదారులు, సాగునీటి ప్రాజెక్టులు, విద్య, వ్యవసాయం, రవాణా, నైపుణ్యాభివృద్ధి, పారిశ్రామిక, పర్యాటక రంగాలకు ప్రాధాన్యతనిస్తూ పలు ప్రాజెక్టులను ప్రారంభించేందుకు చర్యలు చేపట్టారు. ఈ పనులు పూర్తయితే కొడంగల్ నియోజకవర్గంలో మౌలిక సదుపాయాలు మెరుగుపడటంతో పాటు స్థానికంగా విద్య, ఉపాధి, వ్యవసాయ రంగాల్లో కొత్త అవకాశాలు అందుబాటులోకి రానున్నాయి.
ఈ అభివృద్ధి పనుల్లో ప్రధానంగా కొత్వాల్‌గూడ నుంచి నాచారం వరకు రూ.5,060 కోట్ల అంచనా వ్యయంతో రేడియల్ రోడ్డు-2 నిర్మాణం చేపట్టనున్నారు. ఈ రహదారి నిర్మాణం ద్వారా ప్రాంతీయ రవాణా సదుపాయాలు మెరుగుపడటంతో పాటు పారిశ్రామిక, వాణిజ్య కార్యకలాపాలకు మరింత ఊతం లభించనుంది. ప్రత్యేక అభివృద్ధి నిధుల కింద రూ.1,410 కోట్లతో 223 కొత్త బీటీ రహదారుల నిర్మాణం, అసంపూర్తిగా ఉన్న రహదారుల పనులను పూర్తి చేయనున్నారు. గ్రామీణ ప్రాంతాల నుంచి పట్టణ కేంద్రాలకు రాకపోకలు సులభతరం కావడంతో పాటు ప్రజలకు రవాణా ఇబ్బందులు తగ్గనున్నాయి. అదేవిధంగా రూ.59.30 కోట్లతో మరికొన్ని రహదారుల నిర్మాణ పనులు చేపట్టనున్నారు.
సాగునీటి రంగంలో మక్తల్‌–నారాయణపేట్‌–కొడంగల్ లిఫ్ట్ ఇరిగేషన్ పథకం రెండో దశ పనులను రూ.2,100 కోట్లతో ప్రారంభించనున్నారు. ఈ ప్రాజెక్టు ద్వారా సాగునీటి సౌకర్యాలను విస్తరించి వ్యవసాయ రంగానికి మేలు చేయాలని ప్రభుత్వం లక్ష్యంగా పెట్టుకుంది. నీటి వనరుల అందుబాటును మెరుగుపరచడం ద్వారా రైతులకు సాగులో మరింత భరోసా కల్పించే దిశగా ఈ పనులు చేపట్టనున్నారు. వ్యవసాయ రంగానికి అవసరమైన సాంకేతిక పరిజ్ఞానం, ఉన్నత విద్యను అందుబాటులోకి తీసుకురావడంలో భాగంగా కొడంగల్‌లో రూ.123 కోట్లతో వ్యవసాయ కళాశాలను నిర్మించనున్నారు. ఈ కళాశాల ద్వారా వ్యవసాయ విద్యను అభ్యసించే విద్యార్థులకు స్థానికంగానే ఉన్నత విద్యా అవకాశాలు కలగనున్నాయి.
విద్యారంగ అభివృద్ధికి కూడా ప్రభుత్వం ప్రత్యేక ప్రాధాన్యత ఇచ్చింది. రూ.118.80 కోట్ల వ్యయంతో నియోజకవర్గంలో 10 తెలంగాణ పబ్లిక్ స్కూళ్లను ఏర్పాటు చేయనున్నారు. నాణ్యమైన విద్యను అందరికీ అందుబాటులోకి తీసుకురావడంతో పాటు ప్రభుత్వ పాఠశాలల్లో మెరుగైన విద్యా సదుపాయాలు కల్పించడమే ఈ ప్రాజెక్టుల ప్రధాన ఉద్దేశంగా ఉంది. మరోవైపు యువతకు ఉపాధి అవకాశాలు పెంచేందుకు మద్దూరులో రూ.20 కోట్లతో నేషనల్ అకాడమీ ఆఫ్ కన్‌స్ట్రక్షన్ నైపుణ్యాభివృద్ధి కేంద్రాన్ని ఏర్పాటు చేయనున్నారు. నిర్మాణ రంగానికి అవసరమైన నైపుణ్యాల్లో యువతకు శిక్షణ అందించడం ద్వారా ఉద్యోగ, ఉపాధి అవకాశాలను మెరుగుపరచాలని లక్ష్యంగా పెట్టుకున్నారు.
రవాణా సదుపాయాల విస్తరణలో భాగంగా కొడంగల్, కోస్గి, మద్దూరులో రూ.41.83 కోట్లతో ఆధునిక బస్టాండ్లను నిర్మించనున్నారు. ప్రయాణికులకు మెరుగైన వసతులు కల్పించడంతో పాటు ప్రజా రవాణా వ్యవస్థను బలోపేతం చేయడానికి ఈ పనులు చేపట్టనున్నారు. పరిపాలనా సౌలభ్యం కోసం రూ.20 కోట్లతో సమీకృత డివిజనల్ కార్యాలయ సముదాయాన్ని నిర్మించనున్నారు. ఒకే ప్రాంగణంలో వివిధ ప్రభుత్వ కార్యాలయాలు అందుబాటులోకి రావడం ద్వారా ప్రజలకు ప్రభుత్వ సేవలు మరింత సులభంగా అందే అవకాశం ఉంటుంది.
పర్యాటక, ఆధ్యాత్మిక రంగాల అభివృద్ధికి కూడా ఈ ప్రణాళికలో చోటు కల్పించారు. తిమ్మారెడ్డిపల్లిలో రూ.4.45 కోట్లతో గురులోక మసంద్ ప్రభు మందిరం అభివృద్ధి పనులు, కొడంగల్‌లో రూ.5.10 కోట్లతో నిరంజన్ మఠం అభివృద్ధి పనులు చేపట్టనున్నారు. హకీంపేట ఇండస్ట్రియల్ కారిడార్‌లో రూ.10 కోట్లతో పర్యాటక హోటల్ నిర్మించనున్నారు. పారిశ్రామిక రంగంలో స్థానికంగా అవకాశాలను పెంచే లక్ష్యంతో రూ.81 కోట్లతో ఎకోపామ్ పామాయిల్ ఫ్యాక్టరీని ఏర్పాటు చేయనున్నారు. దీని ద్వారా పామాయిల్ సాగు, పరిశ్రమకు సంబంధించిన కార్యకలాపాలకు ప్రోత్సాహం లభించడంతో పాటు స్థానికంగా ఉపాధి అవకాశాలు పెరిగే అవకాశం ఉంది.
మొత్తంగా రహదారులు, సాగునీరు, విద్య, వ్యవసాయం, నైపుణ్య శిక్షణ, రవాణా, పారిశ్రామిక, పర్యాటక రంగాలను అనుసంధానిస్తూ కొడంగల్ నియోజకవర్గ అభివృద్ధికి ప్రభుత్వం ఈ ప్రాజెక్టులను చేపట్టింది. కేవలం మౌలిక సదుపాయాల కల్పనకే పరిమితం కాకుండా యువతకు ఉపాధి, రైతులకు సాగునీటి వసతి, విద్యార్థులకు నాణ్యమైన విద్య, ప్రజలకు మెరుగైన ప్రభుత్వ సేవలు అందించేలా ఈ పనులను రూపొందించినట్లు ప్రభుత్వం పేర్కొంది. ఈ ప్రాజెక్టులు నిర్ణీత సమయంలో పూర్తయితే కొడంగల్ ప్రాంత ఆర్థిక, సామాజిక అభివృద్ధికి దోహదపడనున్నాయి.
