ప్రతిపక్షం, నవంబర్ 10: కరీంనగర్‌లో ఈ నెల 18న నిర్వహించనున్న బీజేపీ మహా పాదయాత్రను దేశవ్యాప్తంగా చర్చనీయాంశంగా మార్చేలా భారీ ఏర్పాట్లు చేస్తున్నామని కేంద్ర హోంశాఖ సహాయ మంత్రి, కరీంనగర్ ఎంపీ బండి సంజయ్ కుమార్ తెలిపారు. బీజేపీ జాతీయ అధ్యక్షుడు నితిన్ నబిన్ తొలిసారిగా కరీంనగర్‌కు వస్తున్న నేపథ్యంలో ఈ కార్యక్రమాన్ని అత్యంత ప్రతిష్ఠాత్మకంగా నిర్వహించాలని పార్టీ నాయకత్వం నిర్ణయించింది. కనీసం లక్ష మంది ప్రజలు, పార్టీ కార్యకర్తలు పాల్గొనేలా ఏర్పాట్లు చేస్తున్నట్లు బండి సంజయ్ వెల్లడించారు. ఈ మహా పాదయాత్రలో నితిన్ నబిన్‌తో పాటు బీజేపీ రాష్ట్ర అధ్యక్షుడు ఎన్. రామచందర్ రావు, బండి సంజయ్ స్వయంగా పాల్గొని ప్రజలతో కలిసి అడుగులు వేయనున్నారు.
ఈ నెల 18న కరీంనగర్‌లోని గాంధీ సర్కిల్, వైశ్య భవన్ ప్రాంతం నుంచి ప్రారంభమయ్యే పాదయాత్ర టవర్ సర్కిల్ మీదుగా కమాన్ వరకు కొనసాగనుంది. లక్ష మందితో నిర్వహించనున్న ఈ కార్యక్రమం ద్వారా కరీంనగర్‌కు దేశవ్యాప్త గుర్తింపు తీసుకురావాలని బీజేపీ నేతలు భావిస్తున్నారు. నితిన్ నబిన్ తొలిసారి జిల్లాకు వస్తుండటంతో పార్టీ శ్రేణుల్లో ఉత్సాహం నెలకొంది. పాదయాత్రకు పెద్ద ఎత్తున జనసమీకరణ చేయడంతో పాటు కార్యక్రమాన్ని విజయవంతం చేసేందుకు అన్ని స్థాయిల్లో నాయకులు, కార్యకర్తలను సమన్వయం చేయాలని నిర్ణయించారు.
మహా పాదయాత్ర ఏర్పాట్లపై చర్చించేందుకు మంగళవారం కరీంనగర్ ఎంపీ కార్యాలయంలో బండి సంజయ్ పార్లమెంట్ నియోజకవర్గ కోర్ కమిటీ నాయకులతో సమావేశమయ్యారు. కరీంనగర్, సిరిసిల్ల జిల్లాల పార్టీ అధ్యక్షులు సాయిని మల్లేశం, రెడ్డబోయిన గోపీ, నగర మేయర్ కొలగాని శ్రీనివాస్, డిప్యూటీ మేయర్ సునీల్ రావు, మాజీ జిల్లా అధ్యక్షులు బాస సత్యనారాయణ, గంగాడి కృష్ణారెడ్డి, సీనియర్ నాయకులు కోమాల అంజనేయులు, నల్లాల ఓదేలు, మోహన్ రెడ్డి, బోయినిపల్లి ప్రవీణ్ రావు, గుజ్జ శ్రీను, కోమటిరెడ్డి రాంగోపాల్ రెడ్డి, కోహెడ వెంకన్న, తిరుపతిరెడ్డి తదితరులు ఈ సమావేశానికి హాజరయ్యారు. పాదయాత్ర నిర్వహణ, జనసమీకరణ, ప్రచార కార్యక్రమాలు, నాయకులు మరియు కార్యకర్తలకు అప్పగించాల్సిన బాధ్యతలపై సమావేశంలో చర్చించారు.
ఈ సందర్భంగా బండి సంజయ్ మాట్లాడుతూ.. ‘సర్’ అంశంపై కాంగ్రెస్, ఇండీ కూటమి పేరుతో విపక్షాలు ప్రజల్లో అనవసరమైన అపోహలు సృష్టిస్తున్నాయని ఆరోపించారు. ఎన్నికల సంఘం ప్రతిష్ఠను దెబ్బతీసేలా, రాజ్యాంగ సంస్థలపై దాడి చేస్తూ ప్రజాస్వామ్యాన్ని అపహాస్యం చేస్తున్నాయని విమర్శించారు. ఈ అంశానికి సంబంధించిన వాస్తవాలను ప్రజలకు వివరించేందుకే బీజేపీ జాతీయ అధ్యక్షుడు నితిన్ నబిన్ కరీంనగర్ పర్యటనకు వస్తున్నారని పేర్కొన్నారు. ఈ నేపథ్యంలో నిర్వహిస్తున్న మహా పాదయాత్రకు ప్రత్యేక ప్రాధాన్యత ఉందని చెప్పారు.
పాదయాత్రకు కనీసం లక్ష మంది హాజరయ్యేలా పార్టీ నాయకులు కృషి చేయాలని బండి సంజయ్ సూచించారు. పోలింగ్ బూత్ స్థాయి నుంచి శక్తి కేంద్రాలు, మండలాల వారీగా సమావేశాలు నిర్వహించి ప్రజలను కార్యక్రమంలో భాగస్వాములను చేయాలని కోరారు. పార్టీ కార్యకర్తలతో పాటు ప్రజలకు కూడా పాదయాత్ర ఉద్దేశాన్ని వివరించాలని చెప్పారు. మీడియా, సామాజిక మాధ్యమాల ద్వారా విస్తృత ప్రచారం చేపట్టి కార్యక్రమంపై ప్రజల్లో ఆసక్తి పెంచాలని సూచించారు. నితిన్ నబిన్ తొలి కరీంనగర్ పర్యటనను పురస్కరించుకుని నిర్వహించనున్న ఈ మహా పాదయాత్రను విజయవంతం చేయడం ద్వారా పార్టీ బలాన్ని చాటుకోవాలని బీజేపీ నాయకత్వం లక్ష్యంగా పెట్టుకుంది.
