•వరుస చోరీలతో ఆందోళన!
•భక్తుల్లో ఆందోళన.. భద్రత ఏమైంది?
వనపర్తి ప్రతినిధి, సెప్టెంబర్ 26, ప్రతిపక్షం: శ్రీరంగాపురం మండలంలోని ప్రసిద్ధి శ్రీరంగనాయక స్వామి గుడికి దొంగల బెడద తప్పడం లేదు. గుడిలో వరుసగా చోరీలు జరుగుతున్నా భద్రతా ఏర్పాట్లు మాత్రం అంతంతమాత్రంగానే ఉండటంతో భక్తులు ఆందోళన చెందుతున్నారు. తాజాగా శుక్రవారం ఉదయం గుడి తలుపులు తీసే సమయానికి కొన్ని తాళాలు, తలుపులు తెరిచి ఉండటంతో అర్చకులు కంగుతిన్నారు. లోపలికి వెళ్లి చూడగా రాముడు, లక్ష్మణుడు, ఆంజనేయస్వామి విగ్రహాలు కనిపించకపోవడంతో వెంటనే పోలీసులకు సమాచారం ఇచ్చారు.
వరుసగా చేతివాటం..
శ్రీరంగనాయక స్వామి గుడిలో ఇంతకుముందూ దొంగలు చేతివాటం చూపిన ఘటనలు ఉన్నాయి. వెండి ఆభరణాలు, ఉత్సవ విగ్రహం, గర్భగుడి తలుపులకు అమర్చిన వెండి తొడుగులు మాయమైనట్లు స్థానికులు చెబుతున్నారు. శ్రీరామానుజాచార్య స్వామి పంచలోహ విగ్రహం సైతం గతంలో చోరీకి గురైనట్లు సమాచారం. గుడి చుట్టుపక్కల ఉన్న మరో ఆలయంలోనూ గతంలో చోరీ జరిగిన ఘటన ఉందనీ పలువురు పేర్కొంటున్నారు.
భక్తుల్లో ఆందోళన.. భద్రత ఏమైంది?
ప్రసిద్ధ ఆలయంలో వరుసగా చోరీలు జరుగుతున్నా అధికారులు భద్రతపై పెద్దగా దృష్టి పెట్టడం లేదన్న విమర్శలు వినిపిస్తున్నాయి. రాత్రిపూట గుడి దగ్గర గస్తీ లేకపోవడం, నిఘా ఏర్పాట్లు అంతంతమాత్రంగానే ఉండటంతో దొంగలకు పని ఈజీ అవుతోందని భక్తులు అంటున్నారు. కనీసం సీసీ కెమెరాలు ఏర్పాటు చేసి, రాత్రివేళ గస్తీ పెట్టాలని కోరుతున్నారు.రంగనాయక స్వామి ఆలయానికి దూరదూర ప్రాంతాల నుంచి భక్తులు వస్తుంటారు. ఇలాంటి చోట వరుస చోరీలు జరగడం కలవరపెడుతోందని వారు అంటున్నారు. గుడిలోని విగ్రహాలు, ఆభరణాలకు పటిష్ఠ భద్రత కల్పించి, చోరీలకు పాల్పడుతున్న వారిని త్వరగా పట్టుకోవాలని భక్తులు కోరుతున్నారు.
