ప్రతిపక్షం, నవంబర్ 11: మానవ సేవే మాధవ సేవ అనే గొప్ప సందేశాన్ని తన సేవా కార్యక్రమాల ద్వారా మాతా అమృతానందమయి దేవి ప్రపంచానికి చాటిచెబుతున్నారని తెలంగాణ గవర్నర్ శివ ప్రతాప్ శుక్లా కొనియాడారు. భారతీయ సంస్కృతిలోని ‘వసుధైవ కుటుంబకం’ అనే భావనను అమ్మ తన సేవా కార్యక్రమాల ద్వారా ప్రపంచవ్యాప్తంగా విస్తరిస్తున్నారని ప్రశంసించారు. హైదరాబాద్‌లో నిర్వహించిన బ్రహ్మస్థానం మహోత్సవంలో పాల్గొన్న గవర్నర్, విద్య, వైద్యం, సామాజిక సంక్షేమం వంటి రంగాల్లో మాతా అమృతానందమయి మఠం అందిస్తున్న సేవలను ప్రత్యేకంగా ప్రస్తావించారు.
గత 25 సంవత్సరాలుగా విద్య, ఆరోగ్య సంరక్షణ, మానవతా కార్యక్రమాల ద్వారా మఠం సమాజానికి అందిస్తున్న సేవలు అభినందనీయమని గవర్నర్ పేర్కొన్నారు. ప్రజల అవసరాలను గుర్తించి వారికి అండగా నిలవడం, ఆర్థికంగా వెనుకబడిన వర్గాలకు సహాయం చేయడం, విద్యార్థులకు మెరుగైన భవిష్యత్తు కల్పించేందుకు కృషి చేయడం వంటి కార్యక్రమాలు సమాజానికి ఎంతో ఉపయోగకరమని అన్నారు. నమామి గంగే, స్వచ్ఛ భారత్ కార్యక్రమాలకు మఠం రూ.100 కోట్ల విరాళం అందించిన విషయాన్ని ఈ సందర్భంగా గుర్తుచేశారు. ప్రజాప్రతినిధులు తమ అధికారిక బాధ్యతలను నిర్వర్తించడంతో పాటు సామాజిక సేవకు కూడా సమాన ప్రాధాన్యత ఇవ్వాలని సూచించారు.
విద్యార్థులు చిన్ననాటి నుంచే కరుణ, క్రమశిక్షణ, సేవాభావం, దేశభక్తి వంటి విలువలను అలవర్చుకోవాలని గవర్నర్ సూచించారు. యువతలో నైతిక విలువలను పెంపొందించేందుకు అమ్మ చేపడుతున్న కార్యక్రమాలు ఆదర్శంగా నిలుస్తున్నాయని అన్నారు. విలువలతో కూడిన యువతను తీర్చిదిద్దడం ద్వారా సమాజానికి బాధ్యతాయుతమైన పౌరులను అందించవచ్చని పేర్కొన్నారు. మఠం దత్తత తీసుకున్న గ్రామాలకు చెందిన మహిళలకు చీరలు, ఆర్థిక సహాయం కోసం చెక్కులు పంపిణీ చేయడంతో పాటు దివ్యాంగులకు వీల్‌చైర్లు అందజేయడం వంటి సేవా కార్యక్రమాలను గవర్నర్ అభినందించారు.
కేంద్ర బొగ్గు, గనుల శాఖ మంత్రి జి. కిషన్ రెడ్డి మాట్లాడుతూ, సనాతన ధర్మం, భారతీయ ఆధ్యాత్మిక సంప్రదాయాలకు సంబంధించిన సందేశాన్ని మాతా అమృతానందమయి ప్రపంచ వేదికపై బలంగా వినిపిస్తున్నారని పేర్కొన్నారు. భారతీయ సాంస్కృతిక విలువల ఆధారంగా సమాజ నిర్మాణానికి ఆమె చేస్తున్న కృషి ప్రశంసనీయమని అన్నారు. సమాజంలో సేవాభావం, మానవత్వం, పరస్పర సహకారం పెంపొందించడంలో ఆధ్యాత్మిక సంస్థలు కీలక పాత్ర పోషిస్తున్నాయని అభిప్రాయపడ్డారు.
ఈ సందర్భంగా మాతా అమృతానందమయి మాట్లాడుతూ, ప్రకృతి నుంచి ప్రతి ఒక్కరూ ఎన్నో విషయాలు నేర్చుకోవాలని సూచించారు. మనుషుల మధ్య మాత్రమే కాకుండా ప్రకృతితో కూడా సహకారం, సామరస్య భావనను పెంపొందించుకోవాలని తెలిపారు. ప్రకృతిని గౌరవిస్తూ జీవించడం ద్వారా ప్రపంచ పురోగతికి, సర్వజన సంక్షేమానికి తోడ్పడగలమని పేర్కొన్నారు. వ్యక్తిగత జీవితంలోనూ, సమాజంలోనూ సామరస్యం ఎంతో అవసరమని ఆమె సందేశమిచ్చారు.
మహోత్సవంలో భాగంగా అమృతశ్రీ సభ్యులకు వస్త్రాలు, ఆర్థిక సహాయం అందజేశారు. దివ్యాంగులకు వీల్‌చైర్లు పంపిణీ చేశారు. అమ్మ సందేశాలు, దేశవిదేశీ పర్యటనలు, భజనలతో కూడిన ‘అమృత గంగా’ కార్యక్రమం తెలుగు సంచికను ప్రముఖులు ఆవిష్కరించారు. అనంతరం మాతా అమృతానందమయి భజనలు, ధ్యాన కార్యక్రమాలకు నేతృత్వం వహించి భక్తులకు దర్శనం ఇచ్చారు. ఈ కార్యక్రమంలో ఎంపీ ఈటల రాజేందర్, తెలంగాణ బీజేపీ అధ్యక్షుడు రామచందర్ రావు, కరీంనగర్ ఉపాధ్యాయ నియోజకవర్గ ఎమ్మెల్సీ మల్క కొమరయ్య, జైళ్ల శాఖ డీజీ సౌమ్య మిశ్రా, హైదరాబాద్ చిన్మయ మిషన్ అధిపతి స్వామి సర్వేశానంద సరస్వతి తదితరులు పాల్గొన్నారు. ప్రత్యేక పూజలతో నిర్వహించిన ఈ బ్రహ్మస్థానం మహోత్సవానికి వేలాది మంది భక్తులు హాజరయ్యారు.
