ప్రతిపక్షం, నవంబర్ 12: 2024 లోక్‌సభ, రాష్ట్ర శాసనసభ ఎన్నికల్లో పోలైన ఓట్లకు, లెక్కించిన ఓట్లకు మధ్య భారీ వ్యత్యాసాలు ఉన్నాయంటూ సామాజిక మాధ్యమాల్లో ప్రచారం జరుగుతున్న ఆరోపణలను భారత ఎన్నికల సంఘం తీవ్రంగా ఖండించింది. ఈ ఆరోపణలు పూర్తిగా తప్పుదోవ పట్టించేలా ఉన్నాయని స్పష్టం చేసింది. వాస్తవాలను ప్రజలకు తెలియజేసేందుకు మహారాష్ట్ర, హర్యానా, జమ్మూ కాశ్మీర్‌లోని పలు నియోజకవర్గాలకు సంబంధించిన అధికారిక గణాంకాలను వెల్లడిస్తూ వరుస వాస్తవ నిర్ధారణ వివరాలను విడుదల చేసింది. నమోదైన మొత్తం ఓటర్ల సంఖ్యను, పోలైన ఓట్ల సంఖ్యగా కొందరు పొరపాటుగా చూపిస్తున్నారని, మరికొందరు అధికారిక గణాంకాలను తప్పుగా అర్థం చేసుకుని ఓట్లు లెక్కించలేదంటూ ప్రచారం చేస్తున్నారని ఈసీ వివరించింది.
మహారాష్ట్రలోని ముంబై నార్త్ పార్లమెంటరీ నియోజకవర్గానికి సంబంధించి 18.11 లక్షల ఓట్లు పోలవగా, కేవలం 10.33 లక్షల ఓట్లనే లెక్కించారని, దాదాపు 7.78 లక్షల ఓట్లు లెక్కింపునకు నోచుకోలేదని సామాజిక మాధ్యమాల్లో ప్రచారం జరిగింది. అయితే అధికారిక రికార్డుల ప్రకారం ఆ నియోజకవర్గంలో మొత్తం 18,12,115 మంది నమోదిత ఓటర్లు ఉండగా, వారిలో 10,36,496 మంది మాత్రమే ఓటు హక్కును వినియోగించుకున్నారు. వీటిలో ఈవీఎంల ద్వారా 10,33,268 ఓట్లు, పోస్టల్ బ్యాలెట్ల ద్వారా 3,228 ఓట్లు నమోదయ్యాయి. నిబంధనల ప్రకారం 765 టెస్ట్ ఓట్లను, కంట్రోల్ యూనిట్ల నుంచి తిరిగి పొందలేని ఓట్లను మినహాయించిన తర్వాత 10,35,731 ఓట్లు లెక్కింపునకు స్వీకరించినట్లు ఈసీ తెలిపింది. ఇక్కడ కనిపిస్తున్న భారీ వ్యత్యాసం ఓటు వేయని నమోదిత ఓటర్ల సంఖ్య మాత్రమేనని, లెక్కించకుండా వదిలేసిన ఓట్లు కాదని స్పష్టం చేసింది. ఈ నియోజకవర్గంలో పోలింగ్ శాతం 57.20గా నమోదైంది.
జమ్మూ కాశ్మీర్‌లోని శ్రీనగర్ పార్లమెంటరీ నియోజకవర్గంలోనూ పోలైన ఓట్ల కంటే ఎక్కువ ఓట్లు లెక్కించారంటూ మరో ఆరోపణ వచ్చింది. ఈ నియోజకవర్గంలో 6,66,046 ఓట్లు పోలవగా, 6,72,942 ఓట్లు లెక్కించారని సామాజిక మాధ్యమాల్లో ప్రచారం చేశారు. దీనిపై స్పందించిన ఎన్నికల సంఘం, అక్కడ మొత్తం 17,48,803 మంది నమోదిత ఓటర్లు ఉండగా, వాస్తవంగా 6,76,408 మంది ఓటు వేశారని వివరించింది. ఈవీఎంల ద్వారా 6,72,942 ఓట్లు, పోస్టల్ బ్యాలెట్ల ద్వారా 3,466 ఓట్లు నమోదయ్యాయి. 1,009 టెస్ట్ ఓట్లను, కంట్రోల్ యూనిట్ల నుంచి సేకరించలేని ఓట్లను మినహాయించిన తర్వాత లెక్కింపునకు స్వీకరించిన ఓట్ల సంఖ్య 6,75,399గా ఉందని తెలిపింది. ఈ గణాంకాలను పరిశీలిస్తే అదనపు ఓట్లు లెక్కించినట్లు వస్తున్న ఆరోపణల్లో వాస్తవం లేదని కమిషన్ పేర్కొంది. శ్రీనగర్‌లో పోలింగ్ శాతం 38.68గా నమోదైంది.
మహారాష్ట్రలోని బీడ్ అసెంబ్లీ నియోజకవర్గానికి సంబంధించి కూడా ఇదే తరహా ప్రచారం జరిగింది. అక్కడ 3.84 లక్షల ఓట్లు పోలవగా, కేవలం 2.39 లక్షల ఓట్లు మాత్రమే లెక్కించారని, సుమారు 1.45 లక్షల ఓట్లు లెక్కించకుండా వదిలేశారని కొన్ని పోస్టులు పేర్కొన్నాయి. అయితే ఆ నియోజకవర్గంలో 3,84,885 మంది నమోదిత ఓటర్లు ఉండగా, మొత్తం 2,42,983 మంది మాత్రమే ఓటు వేశారని ఈసీ స్పష్టం చేసింది. వీటిలో 2,38,845 ఈవీఎం ఓట్లు, 4,138 పోస్టల్ బ్యాలెట్లు ఉన్నాయి. పోలైన అన్ని ఓట్లను నిబంధనల ప్రకారం లెక్కించామని, అక్కడ 63.13 శాతం పోలింగ్ నమోదైందని తెలిపింది. అలాగే మహారాష్ట్రలోని దహాను అసెంబ్లీ నియోజకవర్గంలో 3.01 లక్షల ఓట్లు పోలవగా, 2.21 లక్షల ఓట్లు మాత్రమే లెక్కించారన్న ఆరోపణలను కూడా తోసిపుచ్చింది. ఆ నియోజకవర్గంలో 3,01,257 మంది నమోదిత ఓటర్లు ఉండగా, 2,21,818 మంది ఓటు వేశారు. పోలైన ఓట్లన్నీ లెక్కించామని, 73.63 శాతం పోలింగ్ నమోదైందని వివరించింది.
హర్యానాలోని తోషమ్ అసెంబ్లీ నియోజకవర్గానికి సంబంధించి కూడా ఓట్ల లెక్కింపులో భారీ వ్యత్యాసాలు ఉన్నాయంటూ ప్రచారం జరిగింది. అక్కడ 2.21 లక్షల ఓట్లు పోలవగా, కేవలం 1.60 లక్షల ఓట్లనే లెక్కించారని ఆరోపించారు. దీనిపై ఈసీ అధికారిక గణాంకాలను వెల్లడించింది. తోషమ్‌లో మొత్తం 2,23,609 మంది నమోదిత ఓటర్లు ఉండగా, 1,61,872 మంది ఓటు హక్కును వినియోగించుకున్నారు. టెస్ట్ ఓట్లకు సంబంధించిన నిబంధనలను పరిగణనలోకి తీసుకున్న తర్వాత 1,61,020 ఓట్లు లెక్కించినట్లు తెలిపింది. అక్కడ పోలింగ్ శాతం 72.39గా నమోదైందని, మిగిలిన వ్యత్యాసం ఓటు వేయని వారి సంఖ్య వల్ల ఏర్పడిందని వివరించింది.
హర్యానాలోని కైతల్ అసెంబ్లీ నియోజకవర్గంలో కేవలం 215 మంది మాత్రమే ఓటు వేశారంటూ సామాజిక మాధ్యమాల్లో మరో ప్రచారం జరిగింది. అయితే ఈసీ ఈ ఆరోపణను కూడా తప్పుబట్టింది. 215 అనేది ఆ నియోజకవర్గంలోని పోలింగ్ కేంద్రాల సంఖ్య మాత్రమేనని, ఓటు వేసిన వ్యక్తుల సంఖ్య కాదని స్పష్టం చేసింది. అధికారిక గణాంకాల ప్రకారం కైతల్‌లో 2,23,449 మంది నమోదిత ఓటర్లు ఉండగా, 1,68,851 మంది ఓటు వేశారు. పోలింగ్ శాతం 75.57గా నమోదైందని తెలిపింది. జమ్మూ కాశ్మీర్‌లోని చెనాని, కోకెర్నాగ్, పుల్వామా అసెంబ్లీ నియోజకవర్గాల్లోనూ పోలైన ఓట్ల కంటే అధికంగా ఓట్లు లెక్కించారనే ఆరోపణలకు ఆధారాలు లేవని ఈసీ పేర్కొంది. చెనానిలో 85,189 ఓట్లు, కోకెర్నాగ్‌లో 57,542 ఓట్లు పోలవగా, వాటిని నిబంధనల ప్రకారం లెక్కించారు. పుల్వామాలో 51,011 ఓట్లు పోలవగా, ప్రామాణిక మినహాయింపుల అనంతరం 50,529 ఓట్లను లెక్కింపునకు స్వీకరించినట్లు వివరించింది.
ఈ సందర్భంగా ఎన్నికల సంఘం ఓట్ల లెక్కింపు ప్రక్రియలో అనుసరించే నిబంధనలను కూడా వివరించింది. పోస్టల్ బ్యాలెట్లు, టెస్ట్ ఓట్లు, కంట్రోల్ యూనిట్ల నుంచి తిరిగి పొందలేని ఓట్లను ఎన్నికల మార్గదర్శకాల ప్రకారం పరిగణనలోకి తీసుకుంటారని తెలిపింది. పోలింగ్ కేంద్రంలో వాస్తవంగా ఎన్ని ఓట్లు పోలయ్యాయనే విషయాన్ని నిర్ధారించేందుకు ఫారం 17సి కీలకమైన చట్టబద్ధమైన పత్రంగా ఉంటుందని పునరుద్ఘాటించింది. పోలింగ్ ముగిసిన వెంటనే ఈ ఫారంలోని మొదటి భాగాన్ని అభ్యర్థుల పోలింగ్ ఏజెంట్లకు అందజేస్తారని, ఓట్ల లెక్కింపు రోజున వారి సమక్షంలో రెండో భాగంలోని వివరాలతో సరిపోల్చుతారని వెల్లడించింది. ఎన్నికల ప్రక్రియలో పారదర్శకత ఉండేలా ఈ విధానం అమలు చేస్తున్నట్లు పేర్కొంది.
2024 ఎన్నికల్లో ఓట్లు పోలవడం, లెక్కింపు మధ్య భారీ వ్యత్యాసాలు ఉన్నాయంటూ వస్తున్న ప్రచారాన్ని నమ్మవద్దని పరోక్షంగా సూచించిన ఈసీ, అధికారిక గణాంకాలను పరిశీలించాలని ప్రజలకు తెలిపింది. సంబంధిత నియోజకవర్గాల వివరాలు, ఇండెక్స్ కార్డులు, గణాంక నివేదికలు ఎన్నికల సంఘం అధికారిక వెబ్‌సైట్‌లోని ‘స్టాటిస్టికల్ రిపోర్ట్స్ అండ్ ఇండెక్స్ కార్డ్స్’ విభాగంలో అందుబాటులో ఉన్నాయని పేర్కొంది. ఎన్నికల ప్రక్రియపై అనుమానాలు వ్యక్తం చేసే ముందు అధికారిక రికార్డులను పరిశీలించాలని, తప్పుడు అర్థాలతో ప్రచారం చేస్తున్న సమాచారాన్ని వాస్తవాలుగా భావించవద్దని ఎన్నికల సంఘం స్పష్టం చేసింది.
