ప్రతిపక్షం, నవంబర్ 12: హైదరాబాద్‌లోని అల్వాల్ టిమ్స్ ఆసుపత్రిని 2027 జనవరి నాటికి ప్రజలకు అందుబాటులోకి తీసుకురానున్నట్లు రాష్ట్ర వైద్య, ఆరోగ్యశాఖ మంత్రి దామోదర రాజనర్సింహ వెల్లడించారు. ఆసుపత్రి నిర్మాణ పనులను డిసెంబర్ చివరి నాటికి పూర్తిచేసి, కొత్త ఏడాదిలో వైద్య సేవలు ప్రారంభించేలా చర్యలు తీసుకుంటున్నామని తెలిపారు. గురువారం అల్వాల్ టిమ్స్ ఆసుపత్రిని సందర్శించిన మంత్రి నిర్మాణ పనులు, వైద్య పరికరాల ఏర్పాటు, మౌలిక సదుపాయాల పురోగతిని క్షేత్రస్థాయిలో పరిశీలించారు. స్థానిక ఎమ్మెల్యే శ్రీగణేశ్‌, రోడ్లు, భవనాల శాఖతో పాటు వైద్య ఆరోగ్యశాఖ ఉన్నతాధికారులతో కలిసి దాదాపు మూడు గంటల పాటు ఆసుపత్రిలోని వివిధ విభాగాలను సందర్శించారు. ప్రతి బ్లాక్‌ను పరిశీలించి, ఇంకా పూర్తికావాల్సిన పనుల వివరాలను అధికారులను అడిగి తెలుసుకున్నారు.
ఆసుపత్రిలోని ఓపీ విభాగం, వైద్య పరీక్షల కేంద్రం, సీటీ స్కాన్‌, ఎక్స్‌రే విభాగాలు, ఆపరేషన్ థియేటర్లు, ఇతర వైద్య విభాగాలను మంత్రి స్వయంగా పరిశీలించారు. ఆయా విభాగాల్లో ఏర్పాటు చేసిన సదుపాయాలు, అందుబాటులోకి తీసుకురావాల్సిన వైద్య పరికరాలు, పెండింగ్‌లో ఉన్న పనులపై అధికారులతో చర్చించారు. అనంతరం రోడ్లు, భవనాల శాఖ అధికారులు, వైద్య ఆరోగ్యశాఖ ఉన్నతాధికారులు, నిర్మాణ పనులు చేపడుతున్న కాంట్రాక్టు సంస్థ ప్రతినిధులతో సమీక్ష నిర్వహించారు. ఆసుపత్రిలో మిగిలిపోయిన సివిల్, విద్యుత్‌ సంబంధిత పనులను వేగవంతం చేయాలని ఆదేశించారు. ప్రారంభానికి ముందే అన్ని విభాగాలు పూర్తిస్థాయిలో సిద్ధంగా ఉండాలని, పనుల్లో ఎలాంటి జాప్యం జరగకూడదని స్పష్టం చేశారు.
ఆసుపత్రికి వచ్చే రోగులకు ఎలాంటి అసౌకర్యం కలగకుండా అన్ని ఏర్పాట్లు చేయాలని మంత్రి అధికారులకు సూచించారు. మెడికల్ గ్యాస్ పైప్‌లైన్ వ్యవస్థ, ఆక్సిజన్ సరఫరా, సహాయ కేంద్రాలు, ఓపీ కౌంటర్లు, ఫార్మసీ, మరుగుదొడ్లు, వైద్యుల సంప్రదింపుల గదులు, ఆపరేషన్ థియేటర్లకు అవసరమైన అనుబంధ సదుపాయాలను పూర్తిస్థాయిలో ఏర్పాటు చేయాలని చెప్పారు. ముఖ్యంగా అత్యవసర విభాగానికి వచ్చే రోగులకు ఇబ్బందులు కలగకుండా ప్రవేశ, నిష్క్రమణ మార్గాలను క్రమబద్ధీకరించాలని సూచించారు. ఆసుపత్రి ప్రారంభమైన తర్వాత వైద్య సేవలు సజావుగా కొనసాగేందుకు ముందుగానే సమగ్ర ప్రణాళిక రూపొందించాలని అధికారులను ఆదేశించారు.
అల్వాల్ టిమ్స్ ఆసుపత్రి నిర్మాణానికి 2022 ఏప్రిల్‌లో శంకుస్థాపన చేయగా, 2023 ఫిబ్రవరిలో నిర్మాణ పనులు ప్రారంభమయ్యాయని అధికారులు మంత్రికి వివరించారు. 2023 డిసెంబర్ నాటికి సివిల్ పనులు కేవలం 14 శాతం మాత్రమే పూర్తయ్యాయని, ప్రస్తుతం మొత్తం నిర్మాణ పనులు 95 శాతానికి పైగా పూర్తయ్యాయని తెలిపారు. మిగిలిన పనులను నిర్ణీత గడువులోగా పూర్తి చేసి జనవరి 2027 నాటికి ఆసుపత్రిని ప్రారంభించేందుకు చర్యలు తీసుకోవాలని మంత్రి అధికారులను ఆదేశించారు. ఆసుపత్రి ప్రారంభం తర్వాత ప్రజలకు అవసరమైన అన్ని రకాల వైద్య సేవలు ఒకేచోట అందుబాటులోకి రావాలని పేర్కొన్నారు.
అల్వాల్ టిమ్స్‌ను కుత్బుల్లాపూర్ ప్రభుత్వ వైద్య కళాశాలకు అనుబంధ బోధనా ఆసుపత్రిగా అభివృద్ధి చేయనున్నట్లు మంత్రి తెలిపారు. ఇందుకు అనుగుణంగా వైద్య కళాశాల భవనాలు, విద్యార్థుల వసతి గృహాల నిర్మాణ పనులు కొనసాగుతున్నాయని వెల్లడించారు. ఆసుపత్రి ప్రాంగణంలో నర్సింగ్ కళాశాలను కూడా ఏర్పాటు చేయనున్నట్లు చెప్పారు. దీనివల్ల వైద్య విద్యార్థులకు మెరుగైన శిక్షణా అవకాశాలు లభించడంతో పాటు, ప్రజలకు నాణ్యమైన వైద్య సేవలు అందించేందుకు అవకాశం ఉంటుందని వివరించారు. వైద్య విద్య, వైద్య పరిశోధన, ప్రజారోగ్య సేవలను సమన్వయం చేస్తూ ఈ సంస్థను అభివృద్ధి చేయాలన్నది ప్రభుత్వ లక్ష్యమని పేర్కొన్నారు.
అల్వాల్ టిమ్స్‌ను న్యూరో సైన్సెస్‌, జన్యు శాస్త్ర విభాగాల్లో అత్యుత్తమ వైద్య కేంద్రంగా తీర్చిదిద్దనున్నట్లు దామోదర రాజనర్సింహ వెల్లడించారు. న్యూరాలజీ, న్యూరోసర్జరీ వంటి ప్రత్యేక వైద్య విభాగాలతో పాటు వివిధ రకాల అత్యున్నత వైద్య సేవలను ఒకేచోట అందుబాటులోకి తీసుకురానున్నట్లు తెలిపారు. అత్యాధునిక వైద్య పరికరాలు, నిర్ధారణ పరీక్షల సదుపాయాలను ఏర్పాటు చేసి రోగులకు సమగ్ర వైద్యం అందించేందుకు చర్యలు చేపడుతున్నామని చెప్పారు. ఈ విభాగాల్లో వైద్య సేవలతో పాటు పరిశోధనలకు కూడా ప్రాధాన్యత కల్పిస్తామని వివరించారు. దీనివల్ల క్లిష్టమైన నరాల సంబంధిత వ్యాధులు, జన్యుపరమైన సమస్యలతో బాధపడుతున్న వారికి మెరుగైన చికిత్స అందే అవకాశం ఉంటుందని ఆశాభావం వ్యక్తం చేశారు.
దూర ప్రాంతాల నుంచి ఆసుపత్రికి వచ్చే రోగుల కుటుంబ సభ్యులు, సహాయకులకు వసతి కల్పించేందుకు ఆసుపత్రి ప్రాంగణంలో ధర్మశాల నిర్మాణాన్ని కూడా చేపడుతున్నట్లు మంత్రి తెలిపారు. రోగుల వెంట వచ్చే వారికి వసతి సమస్యలు తలెత్తకుండా ఈ సదుపాయం ఉపయోగపడుతుందని చెప్పారు. ఆసుపత్రి ప్రారంభానికి అవసరమైన అన్ని పనులను వైద్య ఆరోగ్యశాఖ, రోడ్లు భవనాల శాఖ అధికారులు సమన్వయంతో పూర్తి చేయాలని స్పష్టం చేశారు. జనవరి 2027 నాటికి అల్వాల్ టిమ్స్‌ను ప్రజలకు అందుబాటులోకి తీసుకురావడమే లక్ష్యంగా ప్రభుత్వం ముందుకు సాగుతోందని మంత్రి వెల్లడించారు.
