ప్రతిపక్షం, నవంబర్ 14: భారత తొలి ప్రధానమంత్రి పండిట్ జవహర్‌లాల్ నెహ్రూ జయంతి సందర్భంగా ప్రతి సంవత్సరం నవంబర్ 14న దేశవ్యాప్తంగా బాలల దినోత్సవాన్ని ఘనంగా నిర్వహిస్తారు. పిల్లలంటే ఎంతో ఇష్టపడే నెహ్రూను చిన్నారులు ప్రేమగా ‘చాచా నెహ్రూ’ అని పిలుచుకునేవారు. బాలల పట్ల ఆయనకు ఉన్న ప్రత్యేక అభిమానం, వారి విద్య, అభివృద్ధిపై చూపిన శ్రద్ధకు గుర్తుగా ఆయన జన్మదినాన్ని బాలల దినోత్సవంగా జరుపుకుంటున్నారు. ఈ రోజు పాఠశాలల్లో సాధారణ తరగతులకు భిన్నంగా ప్రత్యేక కార్యక్రమాలు నిర్వహించడంతో విద్యార్థుల్లో ఉత్సాహం నెలకొంటుంది. ఆటపాటలు, సాంస్కృతిక ప్రదర్శనలు, వివిధ పోటీలు, బహుమతుల ప్రదానోత్సవాలతో పాఠశాలలన్నీ సందడిగా మారతాయి.
బాలల దినోత్సవం సందర్భంగా పాఠశాలల్లో విద్యార్థుల కోసం ప్రత్యేకంగా ఆటల పోటీలు, పాటలు, నృత్యాలు, నాటికలు, వక్తృత్వ పోటీలు, చిత్రలేఖనం వంటి కార్యక్రమాలు నిర్వహిస్తారు. కొన్నిచోట్ల ఉపాధ్యాయులు కూడా విద్యార్థులను అలరించేందుకు ప్రత్యేక ప్రదర్శనలు ఇస్తారు. సాధారణంగా పాఠాలు, పరీక్షలు, హోంవర్క్‌తో గడిపే చిన్నారులకు ఈ రోజు రొటీన్‌కు భిన్నంగా ఉల్లాసాన్ని అందిస్తుంది. క్విక్ కాంపిటీషన్లు, సరదా ఆటలు, బహుమతుల పంపిణీ, స్వీట్ల పంపిణీతో విద్యార్థులు రోజంతా ఆనందంగా గడుపుతారు. పోటీల్లో విజేతలుగా నిలిచిన విద్యార్థులకు బహుమతులు అందజేసి ప్రోత్సహిస్తారు. ఈ వేడుకలు పిల్లల్లో దాగి ఉన్న ప్రతిభను వెలికితీయడంతో పాటు వారిలో ఆత్మవిశ్వాసాన్ని పెంపొందించేందుకు ఉపయోగపడతాయి.
భారతదేశంలో బాలల దినోత్సవాన్ని తొలుత నవంబర్ 20న నిర్వహించేవారు. అంతర్జాతీయ బాలల దినోత్సవంగా ఐక్యరాజ్యసమితి నవంబర్ 20ను పాటించడంతో భారత్‌లోనూ అదే రోజున బాలల దినోత్సవం జరుపుకునేవారు. అయితే 1964లో జవహర్‌లాల్ నెహ్రూ మరణించిన తర్వాత, ఆయనపై ఉన్న గౌరవం, పిల్లల పట్ల ఆయనకున్న ప్రత్యేక ప్రేమకు గుర్తుగా ఆయన జన్మదినమైన నవంబర్ 14ను భారత బాలల దినోత్సవంగా నిర్ణయించారు. అప్పటి నుంచి ప్రతి సంవత్సరం ఈ రోజున దేశవ్యాప్తంగా పాఠశాలలు, విద్యాసంస్థల్లో ప్రత్యేక వేడుకలు నిర్వహిస్తున్నారు. పిల్లలకు ఆనందాన్ని పంచడంతో పాటు వారి హక్కులు, విద్య, ఆరోగ్యం, భద్రత, సమగ్ర అభివృద్ధి ప్రాధాన్యాన్ని గుర్తుచేసే సందర్భంగానూ బాలల దినోత్సవం నిలుస్తోంది.
